Dutoronomi 12 - Ạḍinya Iigbia

Eniin esi bịn ọoḅereghi ghan phọ

¹ “Ịphen kụ ịtooghi phọ rꞌịiruen phọ ịpe nyina kẹpamanam bọ kụ ẹdaph ghan eḍighi ẹpe ade phọ Ọmoogh-we Ẹnaan ạburude phọ anyina ịngo bọ inyina mọ ịmoogh, oomo asuḍughul-otu aghuḍum mọ anyina ịpe nyina kẹtol bọ sịen aḅirini phọ.

² Ekori ephiemi oomo ariisi phọ ịpe ạbuo areelhe phọ nyina rẹki bọ ọmoogh phọ rọoḅereghi ghan bọ rụmugh phọ ạbidi, ạnyu aruugum rꞌạnyu aroogbolom mọ rꞌạtorobo ẹlo edi ude aruurum mọ.

³ Elereghi renmeny ạrikia phọ ạbidi, eḅomoghi igbudu um-ạke phọ rꞌạsighom mọ Asera edoghoḍi nịan, elereghi ịkaaghineen ạrumugh ạbidi ephiemi siḍien phọ ạbidi ẹpe phọ.

⁴ “Íḍighinaan ghan Ọmoogh-we Ẹnaan phọ anyina ịphen phọ.

⁵ Esi dị nyina kẹki ghan kụ esi phọ ẹpe Ọmoogh-we phọ Ẹnaan phọ anyina kazua bọ sịphe oomo arughunughun phọ anyina, esi phọ ẹpe aḍien phọ ọdi kẹtol bọ.

⁶ Ịsiphe phọ kụ esi phọ nyina kẹsighe ghan ẹki rịkia oguom ạnian phọ anyina, ẹsighe ghan ẹki rịkia phọ anyina rꞌamuniin abin esi aḍioph phọ abin phọ, ẹkia oḅio-giph phọ anyina, rꞌịḅel ạnmuny dị ạsinam mọ anyina rꞌịga phọ anyina ẹmar.

⁷ Ịsiphe phọ kụ esi dị nyina rꞌọto anyina kẹtol ghan egbodo Ọmoogh-we Ẹnaan phọ anyina kụ ele ghan ẹmoogh iboh esi oomo ạraraar phọ ịpe ẹsighe bọ rạghaagh anyina kụ eḍighinom, ịdipho Ọmoogh-we Ẹnaan phọ anyina ịseph bọ inyina.

⁸ “Kẹ́daph ghan oomo phọ ịphen yira roḍighi bọ sịen rodon kụ eḍighi, uwo ịlo ọdi aḍighi ghan ịlo eḍighi elhiom esi ọdi.

⁹ Kụ nyịidipho nyina kẹ̋ghi esi, esi ophooghian rꞌẹmoogh phọ ịpe Ọmoogh-we Ẹnaan phọ anyina raḍighi bọ ịlo ọngo anyina.

¹⁰ Mem lọ nyina ẹḅeeny Jọdan ephun kụ erugh ẹpe de phọ Ọmoogh-we Ẹnaan phọ anyina ịngo bọ inyina ọmoogh, kịngo ni inyina ophooghian esi oomo ạbumulogh-ḍien phọ anyina iko bọ inyina ekitonom, ọbo nyina erugh ẹpe phọ rꞌẹepho.

¹¹ Eniin esi edi ni dị Ọmoogh-we phọ Ẹnaan phọ anyina kạsaḅar kụ nyina eḍighi ịdi aḍien phọ ọdi ketugh sịphe phọ, kụ nyina kẹsighe ghan oomo ạraraar phọ ịpe mị ạlogh bọ ologh ịngo inyina ẹkimom ẹpe phọ: rịkia oguom ạnian phọ anyina, oomo ạrikia phọ anyina, muniin abin esi aḍioph abin phọ, ẹkia oḅio-giph phọ anyina, rꞌoomo ịpe nyina eguanaan bọ Ọmoogh-we phọ.

¹² Nyina ebo ghan egbodo Ọmoogh-we phọ Ẹnaan phọ anyina, nmụny anyina rꞌạnmanyaan anyina, nmụny-otu anyina rꞌạnmanyaan-otu anyina, rꞌạbuo aLivait phọ ituman bọ inyina, loor ịdipho bịdi ụ́moogh aani bọ ẹku mꞌabin kẹn.

¹³ Igona siloor, ị́pighironaan ghan ẹkia oguom ạnian phọ anyina tọrobo esi,

¹⁴ eḍigh esi phọ ẹpe Ọmoogh-we phọ ạsaḅar bọ sịphe oomo arughunughun phọ anyina. Ịsiphe kụ esi dị nyina kẹpighironaan ghan rịkia oguom ạnian phọ anyina. Ịsiphe kụ esi dị nyina keḍighi oomo ịphen phọ mị ạlogh bọ ologh ịngo inyina.

¹⁵ “Ịlo eḍighi eḍighi nyina kẹze ghan ni ịnam ẹba sịphe ạramha phọ anyina oomo ịpe rịphu bọ inyina, ịdipho nyina kẹba bọ ni ọnuen rꞌezoogh, oomo ịpe rịphu bọ inyina. Ọdaph ịpe Ọmoogh-we Ẹnaan phọ anyina ịngo bọ inyina, bụlo ọḅaal rꞌạbulo ụ́ḅaal, olhe ni.

¹⁶ Kẹ́baam ghan ịḅaal phọ. Ịsighe ịḅaal phọ ẹghi eeku ude ịdipho ạmuum.

¹⁷ Ị́tol ghan sịphe kꞌanyina kụ ele muniin abin esi aḍioph abin phọ anyina: mꞌịbiakpa, mꞌamiim, mꞌạmunum, mꞌịḅel ạnmuny ạsinam rꞌiyool-ịga phọ anyina, mꞌạtorobo ạraraar phọ ịpe nyina eguanaan bọ Ẹnaan, mꞌẹkia ophooph ologhi, mꞌẹkia oḅio-giph.

¹⁸ Ịtol ghan egbodo Ọmoogh-we Ẹnaan phọ anyina kụ ele, esi phọ ẹpe Ọmoogh-we Ẹnaan phọ anyina azua bọ, nyina rꞌạnmuny anyina rꞌạnmanyaan anyina, ạnmuny-otu anyina rꞌạnmanyaan-otu anyina, rꞌạbuo aLivait phọ; kụ ẹmoogh iboh, ebo ghan sịphe egbodo Ọmoogh-we Ẹnaan phọ anyina, oomo ịpe nyina ẹsighe bọ rạghaagh anyina kụ eḍighinom.

¹⁹ Igona siloor anyina, íkel ghan bụo aLivait phọ, oomo asuḍughul-otu phọ ịpe nyina kẹtol bọ sịen aḅirini phọ.

²⁰ “Mem dị Ọmoogh-we Ẹnaan phọ anyina kạbughe eelhe phọ anyina ịdipho dị iguanaan bọ inyina kụ nyina ẹḅem mọ yoor kọba iphulupul, mọ iphulupul kụ rịphu iyoor ạa, tọrobo ịpe rịphu bọ inyina, ạa.

²¹ Kụ eru mạar dị esi phọ ẹpe Ọmoogh-we phọ azua bọ mọ aḍien phọ ọdi ẹrol sịphe kụ ẹkel, pọ kiigh ni nạm mꞌọga ạna, ịpe Ọmoogh-we phọ ịngo bọ inyina, ịdipho mị ạlogh bọ ologh ịngo inyina. Ịtol ghan ni sịphe ạa tọrobo ịpe rịphu bọ inyina.

²² Ịdipho ezoogh rꞌọnuen rele ghan bọ, ịdipho kụ ịdi nyina kẹtuugh ele aani ghan. Bụlo ọḅaal rꞌạbulo ụ́ḅaal olhe aani ni.

²³ Kụ ọlo imiigha loor, ị́baam ghan ịḅaal phọ, ịdi eḍighi bọ ịḅaal kụ aghuḍum. Kụ iḍighi, ị́ḅaram ghan ghuḍum ịnam mọ kụ ạa.

²⁴ Ị́baam ghan ịḅaal phọ. Ịsighe ịḅaal phọ ẹghi eeku ude ịdipho ạmuum.

²⁵ Ị́baam ghan ịḅaal phọ, ọbo ịnighenom inyina rꞌạnmuny anyina, bụphe kọtol bọ dọl phọ anyina. Ịdipho phọ nyina keḍighi ghan ịpe ẹnighe bọ egbodo Ọmoogh-we phọ.

²⁶ Ạraraar iigbia phọ ịpe anyina rꞌịpe nyina eguanaan bọ Ẹnaan kụ ịdi nyina kẹsighe ghan ẹki sịphe Ọmoogh-we phọ azua bọ.

²⁷ Ịpighironaan ghan rịkia oguom ạnian phọ anyina, iphulupul phọ rꞌịḅaal phọ, sịphe ạnyu enmeny ạrikia phọ Ọmoogh-we Ẹnaan phọ anyina; kụ ẹsighe ghan ịḅaal phọ eeku sịphe ude enmeny ạrikia phọ Ọmoogh-we Ẹnaan phọ anyina kụ ạa ghan iphulupul phọ.

²⁸ Ịlogh elegh, ẹphamanam ịphen mị rịḅeni bọ inyina ọbo ịnighenom inyina rꞌạnmuny anyina bụphe kọtol bọ dọl phọ anyina kꞌagee-pọ. Ịdipho phọ nyina keḍighi ghan ịpe ẹnighe bọ egbodo Ọmoogh-we phọ Ẹnaan phọ anyina.

Ọpurogh rụru mọ kụ́uḅereghi rụmugh dị ọkaaghi

²⁹ “Mem mọ Ọmoogh-we Ẹnaan phọ anyina kaagulemi bọ rạmha phọ edi bọ risigh anyina nyina rẹki bọ ọmoogh phọ apiemi, kụ nyina kẹmoogh bọ kụ etugh sịphe ade phọ ạbidi,

³⁰ igona siloor anyina, ọbo bịdi kiikeleghi ghan bọ inyina bịn nyina ẹdaph bịdi, ịdipho mophiemi bọ bịdi risigh anyina. Ípuru ghan olegheri ịlo ạrumugh phọ ạbidi. Ípuru ghan mọ, ‘Ạramha phọ ịphen phọ ụuḅereghi ghan rụmugh phọ ạbidi ika?’ Ẹrol dị yira ọtuugh ọoḅereghi aani.

³¹ Íḍighi ghan ịphen phọ egbodo Ọmoogh-we Ẹnaan phọ anyina. Oomo ịpe eḍighi bọ ḅạphanya risigh Ọmoogh-we phọ, ịpe ekia bọ nyọdi, kụ ịdi bịdi roḍighi ghan kọngo rụmugh phọ ạbidi. Nmụny ạbidi rꞌạnmanyaan ạbidi kụ ịdi bịdi rọsighe ghan koguom nịan ọngo rụmugh phọ ạbidi.

³² “Tọrobo ịpe mị ạlogh bọ ologh ịngo inyina, ịpamanam ghan ịpe phọ kụ ẹdaph ghan eḍighinom. Ị́sighe ghan ịnon ẹḅaram, ḅịle kẹn ípiemi ghan.