Dutoronomi 11 - Ạḍinya Iigbia

Ạḍibugh Ọmoogh-we phọ

¹ “Kụ iḍighi, ịpomoghian Ọmoogh-we Ẹnaan phọ anyina, eeko ghan ịpe ọdi ịḅeni bọ inyina, ịtooghi phọ ọdi, ịiruen phọ ọdi, rꞌiilogh phọ ọdi, oomo amem.

² Ilegheri rodon mị ạkaaph rạ́ḅeni nmụny anyina bụphe úlegheri aani bọ ḅịle kẹn ụ́miin aani mem mọ Ọmoogh-we phọ Ẹnaan phọ anyina ịphur bọ inyina rụru. Mị ạkaaph rịḅeni ghan inyina. Nyina kụ ạbudi mọmiin igbogh phọ ọdi rꞌạḍighaagh iphelegbe phọ ọdi, mem mọ ọdi azin bọ ḍịghaagh iphelegbe phọ ọdi;

³ ịiḍaany phọ ọdi ịpe ọdi aḍighi yogh bọ ọdaam eelhe phọ Ijipt rꞌoomo ade phọ ọdi.

⁴ Nyina kụ ạbudi mọmiin ịpe ọdi aḍighi bọ we ẹgham mọ Ijipt, rꞌạrusu phọ ạbidi rꞌarughuugh-ude phọ ạbidi; rꞌịpe ọdi aḍighi bọ kụ ạmuum Ọphiiny Igbilha ạminoghom bọ bịdi mem mọ bịdi riphorogh bọ inyina, ịdipho Ọmoogh-we phọ aphiemi bọ bịdi kꞌarodon;

⁵ rꞌịpe ọdi iḍighi bọ inyina ẹpe ẹdala phọ, tụtu nyina ẹḍua bọ eru esi sịen;

⁶ rꞌịpe ọdi aḍighi bọ Datan rꞌAbiram, nmụny phọ Eliab, ọony phọ aRuben, ịpe ade phọ ephoghoghomi bọ ọnhu kụ ẹminogh bọ bịdi rꞌoomo ọto ạbidi rꞌarugbogo phọ ạbidi, rꞌoomo aruphua phọ ạbidi sịphe ogbo aḍita phọ anyina Ịzirel.

⁷ Nyina ịsighe ni riḍien anyina ẹmiin oomo inmananaan phọ ịpe Ọmoogh-we phọ aḍighi bọ.

Ẹeḍiom ade phọ oguanaan bọ

⁸ “Kụ iḍighi, ẹmaar eeko ghan oomo iilogh phọ ịphen mị ạlogh bọ ịngo inyina rodon, ọbo nyina ẹmoogh ịnyaam ẹghi esi ẹmoogh de phọ, ḍịphe nyina rẹki bọ ọmoogh phọ,

⁹ ọbo nyina ẹrol ẹpe ade phọ ẹkpo, ḍịphe Ọmoogh-we phọ aghunya bọ ạngo bụrude phọ anyina, de ẹetool rꞌọninom.

¹⁰ Ade phọ ạḍiphe nyina rẹki bọ ọmoogh phọ ị́tol ịdipho ade phọ Ijipt ẹpe nyina ẹḍua bọ, kụ ẹsighe ghan ruwol anyina kụ eeduom mụum ịdipho ozo ịizupha.

¹¹ Ade phọ ạḍiphe nyina rẹki bọ ọmoogh phọ, ade aroogbolom rꞌasikol, kụ rẹpughol ghan mụum ọlophia phọ rạloph ghan bọ ẹpe kꞌạke kameleghu;

¹² ade phọ Ọmoogh-we Ẹnaan phọ anyina kụ rapogh ghan: Ọmoogh-we Ẹnaan phọ anyina agbi riḍien ọdi sịphe ade phọ oomo amem emiigh kꞌegbiom ạlha phọ kụ esiemi kꞌeekuna ạlha phọ.

¹³ “Kụ eru mạar dị nyina kẹnaghanam ni iilogh phọ ạmi, ịphen mị ạlogh bọ ịngo inyina rodon, ẹpomoghian Ọmoogh-we Ẹnaan phọ anyina, eeseeny ghan nyọdi rꞌoomo ologhi anyina rꞌoomo uwaloor phọ anyina,

¹⁴ pọ mị kạloph ghan ọlophia ẹpe ade phọ anyina mem mọ ọdi, ọḅel ọlophia rꞌọpo asugha bọ ọman, ọbo nyina ekori ẹku ịbiakpa phọ rꞌavain phọ rꞌạmunum mọ anyina.

¹⁵ Kụ mị aḍighi ịdi ạroogho kasiighi sịphe asileeny phọ anyina ịlo ạsinam mọ anyina, ọbo nyina ele ghan ịpher inyina.

¹⁶ Igona siloor anyina, ologhi anyina inyina kíbi, ọbo nyina kekiton ghan bọ eeseeny ịnon ạrumugh ẹeḅereghi bịdi.

¹⁷ Bịn Ọmoogh-we phọ mịghagham inyina ologhi bịn akughi okuaḍio phọ bịn ọlophia ọ́lhoph mun bịn ade phọ ísoor mun eḍien, bịn nyina eguul epe emuneen sịphe ịma ade phọ Ọmoogh-we phọ ịngo bọ inyina.

¹⁸ “Kụ iḍighi, ẹmaar ẹpham ịphen mị rịḅeni bọ inyina sịphe iloghi phọ anyina rꞌaruwaloor phọ anyina, ẹsighe ẹghoroghian rạghaagh anyina, eḍighi ghan ẹḅeni esi anyina, ẹrol ghan sịphe iidum ariḍien phọ anyina.

¹⁹ Kụ ẹsighe ghan ịphen phọ ẹtughemi nmụny anyina, ẹghaaph ghan ịphen phọ mem lọ nyina ẹrol ude sịphe aruutu phọ anyina, rꞌamem lọ nyina retelhe eten, rꞌamem lọ nyina ẹmina, rꞌamem lọ nyina eḅetenu.

²⁰ Kụ ẹsighe ẹge sịphe arughuugh ịnhu-aḍibuo aruutu phọ anyina,

²¹ ọbo asiḍughul-otu phọ anyina rꞌasiḍughul-otu ạnmuny phọ anyina ẹdoony, sịphe ade phọ Ọmoogh-we Ẹnaan phọ anyina aghunya bọ ạngo bụrude phọ anyina ọngo ạbidi, ịdipho asiḍughul-otu ẹpe kꞌạke phọ edi bọ sịen aḅirini phọ.

²² “Eru mạar dị nyina esereghian kụ eeko oomo iilogh phọ ịphen mị ạlogh bọ ịngo inyina kụ eḍighi ghan, ẹphomoghian Ọmoogh-we Ẹnaan phọ anyina, ẹdaph ghan reten phọ ọdi, eḍighom nyọdi,

²³ pụruku Ọmoogh-we phọ kaporogh bụo oomo areelhe phọ ịpe edi bọ risigh anyina, kụ nyina ẹmoogh rạmha phọ ẹbugh bọ ipu inyina, eḍiza ipu inyina.

²⁴ Tọrobo esi lọ ạrada aruwol phọ anyina ẹzer, pọ ẹlo anyina; ọku anyina amiigh sịen ẹdala phọ ạki asi ẹpe Lẹbanon. Emiigh sịphe Ọphiiny Yufratis ẹghi esiemi ẹpe iigbom ọphiiny phọ kụ ọku anyina.

²⁵ Oye ólho dị katue ạmeera egbodo anyina, ịdi eḍighi bọ Ọmoogh-we Ẹnaan phọ anyina kaḍighi ni ịdi kighiilaan inyina, nyina eḍigh ruugu ẹpe oomo ade phọ, ịdipho dị ịḅeni bọ inyina.

²⁶ “Rodon phọ ạḍien mị riseenaan inyina ophin abin ạḍiseph mꞌitulughian:

²⁷ ḍịseph, eru mạar dị nyina ẹnaghanan iilogh Ọmoogh-we phọ Ẹnaan phọ anyina ịpe mị ạlogh bọ rịngo inyina rodon;

²⁸ itulughian, eru mạar dị nyina iilogh phọ Ọmoogh-we phọ Ẹnaan phọ anyina ị́naghanan kụ nyina ẹwile reten phọ ịphen mị ạlogh bọ rịḅeni inyina rodon, kụ ẹdaph ịnon ạrumugh dị nyina ílegheri.

²⁹ Mem lọ Ọmoogh-we phọ Ẹnaan phọ anyina ịsighe inyina ạghi asiemi ẹpe ade phọ nyina rẹki bọ ọmoogh phọ, ẹsiiny ạnyu Eegum aGerizim ịlo ọsighe ạḍiseph oseenaan awe phọ, ẹsiiny ạnyu Eegum Ebal ịlo ọsighe itulughian ọḅam awe phọ.

³⁰ (Aruugum mọ ịphen phọ ịlo ẹpe ạḍieri phọ ạḍighaagh phọ ạJodan, ḍịghaagh phọ ẹpe erumuḍio phọ remeel ghan bọ ẹpe ade phọ ạbuo aKenanait, bụphe orugh bọ ẹpe Araba, oten Gịlgal, etuman bọ ḍịyaghaghaany ade phọ aMore.)

³¹ Nyina kẹḅeeny Jọdan epun, kụ ẹki ẹteeny de phọ ạḍiphe nyina rẹki bọ ọmoogh phọ, ḍịphe Ọmoogh-we Ẹnaan phọ anyina ịngo bọ inyina mọ ịmoogh phọ, erughogh sịphe.

³² Egona ghan siloor anyina, eḍighi ghan oomo ịtooghi phọ rꞌịiruen phọ ọdi ịpe mị rịḅeni bọ inyina rodon.