Dutoronomi 10 - Ạḍinya Iigbia

AMozis ạḅile ạboor iilogh phọ

¹ “Mem mọ ạmuphe Ọmoogh-we phọ ụḅeni ịmi mọ, ‘Kịa ạka ịyal ịdaabili asighiigh ịdipho ịḅel phọ, kụ aru sịphe eegum mọ ụteeny ịmi, ạsighe oreeny ạka igbe ịyo.

² Mị kạḅile ạge loor ịsiphe asighiigh phọ oomo ịpe mị ạge bọ loor ạḍiḅel aḍighiigh phọ, ḍịphe nạ aḅomoghi bọ, ạngo nyịna nạ ạsighe ạlogh ologhi igbe ịyo phọ.’

³ “Kụ mị ạsighe obool oreeny ạka igbe phọ, kụ mị ạka ịyal iboom asighiigh ịdipho ịḅel phọ kụ mị ạpham ịyal phọ asighiigh phọ ạghimom ạsiiny ạnyu eegum mọ.

⁴ Kụ Ọmoogh-we phọ ạḅile ạge ḍioph phọ iilogh phọ sịphe aloor asighiigh phọ ịdipho ịḅel phọ ịpe ọdi ạrol bọ ologhi ạnian phọ sịphe eegum mọ kụ ạghaaph bọ ịḅeni inyina ḍio phọ ạḍiphe nyina eekpomoghan bọ, ạsighe ụngo ịmi.

⁵ Kụ mị ạḍua sịphe eegum mọ asoor ude, kụ mị ạsighe iboom mọ asighiigh phọ ạlogh ologhi igbe phọ ịpe mị ạka bọ, kụ ẹrol sịphe ologhi igbe phọ, ịdipho Ọmoogh-we phọ ạlogh bọ ologh ụngo ịmi.”

⁶ (Kụ awe Ịzirel ọḍua sịphe asighuḍia phọ awe aJaakan ọmoogh bọ, omiigh erelhe ọghi osi Mosera. Ẹpe kụ esi phọ Eeron amugh bọ, kụ oḍi nyọdi ẹpe phọ. Kụ Ẹliazar ọony phọ ọdi ạsighe esi phọ ọdi, aḍighi oyil ạrikia.

⁷ Kụ bịdi ọḍua sịphe ọghi osi Gudgoda; ọḍua Gudgoda ọghi osi Jotbata, de iiḍiph ạmuum.

⁸ Mem mọ ạmuphe Ọmoogh-we phọ ạgbatan ạsighe eghun phọ aLivai ạngo Igbe Ịyo phọ mọ bịdi kụ orool ghan, ọmeera ghan egbodo Ọmoogh-we phọ oḍighi ghan oḍighi phọ ọdi, oghol ḍien phọ ọdi ọsephom ghan we ẹteeny kꞌarodon.

⁹ Kụ iḍighi kụ ạbuo aLivai ụ́daph aani bumor phọ ọdi úphin aani bin ẹmoogh phọ. Ọmoogh-we phọ kụ abin ẹmoogh mụo ạbidi, ịdipho Ọmoogh-we Ẹnaan phọ anyina aguanaan bọ bịdi.)

¹⁰ “Kụ mị ạḅile ạrol ẹpe eegum mọ, ịdipho ẹḅel amem mọ, rꞌinyadi aḍughul-otu. Kụ Ọmoogh-we phọ ạḅile ụnaghanan ịmi mem mọ ạmuphe, kụ Ọmoogh-we phọ inyina íphiemi bọ.

¹¹ Kụ Ọmoogh-we phọ ụḅeni ịmi mọ, ‘Ḅetenu amiigh ẹghi phọ ạna aḍiemiom we phọ, ọbo bịdi ọghi osi ẹpe ade phọ ọmoogh, ịdipho mị aghunya bọ ạngo bụrude phọ ạbidi ọngo ạbidi.’

Ịdi Ẹnaan rẹwa

¹² “Kụ nyịidipho, we Ịzirel, ịphen phọ kụ ịdi Ọmoogh-we phọ Ẹnaan phọ anyina rạwa ḍịghaagh anyina: oghiilaan Ọmoogh-we phọ Ẹnaan phọ anyina, rꞌọdaph ghan oomo areten phọ ọdi, rꞌọphomoghian ọdi, rꞌooseeny ghan Ọmoogh-we Ẹnaan phọ anyina rꞌoomo ologhi phọ ạna rꞌuwaloor phọ ạna.

¹³ Rꞌooko ghan iilogh Ọmoogh-we phọ rꞌịtooghi phọ ọdi, ịphen mị ạlogh bọ rịḅeni ghan inyina rodon, ọbo ịnighenom inyina.

¹⁴ Ọmoogh-we phọ kụ ạmoogh kẹ phọ rꞌẹpe kꞌạke phọ, rꞌade phọ rꞌoomo ạraraar phọ edi bọ sịen ade phọ.

¹⁵ Kụ ạburude phọ anyina ọḅeeraan Ọmoogh-we phọ, kụ ạson bịdi sịphe esi oomo aḍita awe phọ rạpomoghian ghan nmụny phọ ạbidi kꞌarodon.

¹⁶ Kụ iḍighi kụ iḍuna yogh iloghi phọ anyina ẹwile oḅom ẹmhu,

¹⁷ loor esi dị Ọmoogh-we phọ Ẹnaan phọ anyina, ọdi kụ Ẹmugh dị epu oomo ạrumugh, egbogh Ẹmugh dị ẹbugh, eḍigh ruugu; oye ọ́ghigh ịyaar esi ọdi, rále ghan oti-ọman.

¹⁸ Ọdi kụ raagbo ghan ịiruen ạnmuny-ịgo rꞌarukpekele ạnmariir. Ọdi ạpomoghian ruuruen rạngo ghan bịdi eḍien rꞌarukpe.

¹⁹ Kụ iḍighi, ịpomoghian ghan ruuruen, ịdi eḍighi bọ nyina ịrol li dọl aruuruen ẹpe Ijipt.

²⁰ Ikueni Ọmoogh-we Ẹnaan phọ anyina. Ọdi kụ ọdi nyina keeseeny ghan. Iḍighom ghan nyọdi, eghunya ghan ḍien phọ ọdi,

²¹ eetumaam ghan nyọdi. Ọdi kụ Ẹnaan anyina, nyẹpe iḍighi bọ inyina iboom mọ ịphen eḍigh bọ ruugu ịpe nyina ẹsighe riḍien anyina ẹmiinom.

²² Ạburude phọ anyina ọpham bọ oḍualdi awe kụ ogheelom bọ Ijipt; kụ nyịidipho Ọmoogh-we Ẹnaan phọ anyina mịbughe inyina ịdipho ạraanaan phọ edi bọ kꞌạke eḍiza.