Dutoronomi 1 - Ạḍinya Iigbia

Emiighom

¹ Ịphen kụ ịdi aMozis ạghaaph bọ ạḅeni oomo Ịzirel sịphe ẹdala phọ ạga emitenom Ọphiiny ạJodan. Bịdi ụrol sịphe Eḍiiny ạJodan dị etuman Suf, igbo ẹmha ạParan dị edi ḍiniin ạḍighaagh, rꞌạramha aTofel, Lẹban, Hazerot rꞌaDizahab ḍịeri phọ ạḍighaagh.

² (Bịdi orelhe bọ ḍioph rꞌaḍiniin aḍughul-otu, ọḍua Eegum aSainai, okiton ẹpe aroogbolom aIdom ọghi osi Kades Bania.)

³ Ḍịḅel aḍio omuneniom ḍioph rꞌoniin ụnwanyu esi ạlha dị emuneniom inyadi dị bịdi ọḍua bọ Ijipt ḍịḅel aḍughul-otu aḍioph rꞌoniin ụnwanyu, kụ aMozis ạghaaph ạḅeni we Ịzirel ạtuugh oomo iilogh phọ Ọmoogh-we phọ adoghoḍi bọ kụ ạghaaph ạḅeni bịdi.

⁴ Ịphen imite mem dị Ọmoogh-we phọ mạkpar apu Sihon ọdaam mọ Ạmorait phọ arugh bọ ẹpe Hesbon rꞌạOg ọdaam mọ ạBasan arugh bọ ẹpe Astarot ẹpe Edrei.

⁵ Mem dị awe phọ ọrol emitenom ạJodan ẹpe eelhe phọ ạMoab kụ ẹdi aMozis amiigh ogananami iilogh phọ rꞌịtughemi phọ Ẹnaan.

⁶ Ọdi ạḅeni bịdi mọ, “Ọmoogh-we Ẹnaan phọ ayira ạghaaph ụḅeni iyira ẹpe Eegum aSainai mọ, ‘Nyina merugh sịen ẹeḅaraph phọ ịdi mẹkasian.

⁷ Iḅula ekiton ẹphen erelhe ẹghi ẹpe ạraaḅaraph phọ edi bọ eelhe ạbuo Ạmorait phọ rꞌoomo ẹpe etuman reelhe ịpe ekitonom bọ ẹpe eḍiiny phọ ạJodan: ade phọ ẹyaghagha bọ, ẹpe aroogbolom mọ, ẹpe ade phọ eḍiinyaan bọ, ẹpe esoorom mọ, ẹpe ọgbal ọphiiny phọ. Ẹghi esi ẹpe ade phọ aKenan, ẹghi esi ẹpe Lẹbanon, ẹpe ogbogh Ọphiiny aYufratis phọ.

⁸ Ipogh. Mị miseenaan inyina oomo ade phọ ạḍiphe edi bọ risigh anyina; ịki ẹmoogh de phọ ạḍiphe Ọmoogh-we phọ aghunya bọ ạngo bụrude phọ anyina, Ebraham, Ạizik rꞌạJekob, rꞌạnmuny phọ ạbidi.’”

AMozis ạson bụo ịiruen

⁹ AMozis ạḅeni we phọ mọ, “Ịdipho mị ạghaaph bọ ịḅeni inyina mem mọ yira ọrol bọ ẹpe Eegum aSainai, ogina ạmi bịn ụ́moogh ịnyaam ọphamaghan anyina.

¹⁰ Ọmoogh-we Ẹnaan phọ anyina mịbughe inyina. Rodon nyina meḍiza ịdipho ạraanaan phọ ẹpe kꞌạke.

¹¹ Ọmoogh-we Ẹnaan ạburude phọ anyina mịbughe inyina eḍighi ḍiza oniin ọonir amem epu, ịseph inyina ịdipho ọdi iguanaan bọ inyina.

¹² Ogina phọ ạmina bịn kụ kaḍighi ika kụ atue bọ atool ẹemor phọ anyina, ịiḅaghami phọ anyina, rꞌasighiton phọ anyina?

¹³ Ịson we olegheri ịyaar dị rọnaghanan ghan ḍụghum sịphe arughunughun phọ anyina, mị kaḍighi bịdi bụo ịtooghi dị kiphogh inyina.

¹⁴ Nyina emeeraam mọ, ‘Ịphen nạ ạghaaph bọ, ẹkpe ni oḍighi.’

¹⁵ Mị ụtuan bọ ịphen phọ ạsighe bụo ạrumhu ịsiphe arughunughun phọ anyina, we olegheri ịyaar dị rọnaghanan ghan ḍụghum, aḍighi bịdi bụo ạrumhu dị kiphogh ghan inyina: buniin kọtooghi ghan ọngo oniin ọonir awe, buniin kọtooghi ghan ọngo oniin okuron awe, buniin kọtooghi ghan ọngo ooghdi awe, buniin kọtooghi ghan ọngo ḍioph awe rꞌạbudi kopogh ghan rughunughun phọ anyina ọkaaphogh ghan rạraar.

¹⁶ “Mem mọ ạmuphe mị ụlogh ni ologh ạngo bụo ịiruen phọ mọ, ‘Ịnaghanan ghan ịpe emite bọ ogbo abumor phọ anyina, kụ ẹsighe ruukuan kụ eegboom ghan riliom ịiruen kụ ẹngo bumor phọ anyina rꞌaruuruen phọ.

¹⁷ Íkueni ghan oye mem lọ nyina reegbo ịiruen, ẹnaghanan ghan ịlo ọbam oye rꞌịlo ogbogh oye phọ. Kékiilaan oye, ịdi eḍighi bọ ịiruen ịlo Ẹnaan. Ịpelom inyina ịlo ọghaaph, pọ ịsighe ghan iruom ịmi mị ụkaaph.’

¹⁸ Mem mọ ạmuphe mị ụghaaph ni oomo ịpe nyina keḍighi ghan bọ ịḅeni inyina.

Orom we ẹpe Kades Bania oḅiligha ade phọ

¹⁹ “Kụ yira ọtuugh ịpe Ọmoogh-we Ẹnaan phọ ayira ạto bọ ụḅeni iyira oḍighi kụ oḍighi. Yira ọḍua bọ sịphe Eegum aSainai kụ ọghi eten eboom ẹdala phọ eḍigh bọ ịikia ruugu ẹpe nyina ẹmiin bọ rẹki bọ roogbolom eelhe ạbuo Ạmorait phọ, osi Kades Bania.

²⁰ Kụ mị ịḅeni bọ inyina mọ, ‘Yira mosi roogbolom mọ Ạmorait, nyẹpe Ọmoogh-we Ẹnaan phọ ayira rịngo bọ iyira.

²¹ Ọmoogh-we Ẹnaan phọ anyina maseere de phọ risigh anyina. Ịki ẹmoogh de phọ Ọmoogh-we Ẹnaan ạburude phọ anyina iguanaan bọ inyina. Kékiilaan, ḅịle kẹn kéekpukian.’

²² “Ịphen reten, tọrobo ọnyo anyina aru utuman ịmi kụ ẹḅem ghan mọ, ‘Itu orom we dị kodia ghan ọki oḅiligha de phọ, kụ oḅula ụḅeni iyira egey eten orelhe, rꞌọdo igbogh ạramha lọ edi.’

²³ “Kụ ịpe bịdi ọghaaph bọ ịḅeeraan ịmi agey. Kụ mị ạson sịphe ogbo arughunughun phọ anyina ḍioph rꞌịyal awe, oniin oye eghun,

²⁴ kụ bịdi oḅerenu ọghi eten aroogbolom mọ, ọghi osi ẹpe ade phọ Eskol ekpululu bọ kụ ọnmanaghian oomo phọ ẹpe.

²⁵ Bịdi ọkuughi iimuma ade phọ ọsighe ọpham uruomonaan iyoor, kụ ọḅile ọghaaph ịlo ekpisi phọ ẹrol bọ ụḅeni iyoor mọ ade phọ Ọmoogh-we Ẹnaan phọ ayira rụngo bọ iyira mọ ẹnighe ni.

²⁶ “Kụ ọlo, nyina mẹkaaghi iilogh Ọmoogh-we Ẹnaan phọ anyina rẹ́wa ịlo ọghi oḍigh ade phọ.

²⁷ Nyina ẹrol ghan ni sịphe arugbogo phọ anyina bịn rẹgum ghan, rẹḅem ghan mọ, ‘Ọmoogh-we phọ ụlogh iyoor ḍien kụ ạtu bọ ụsighe iyoor ẹpe ade phọ Ijipt urorori iyoor aru ạngo bụo Ạmorait phọ mọ ụze iyoor.

²⁸ Yoor rọ́ki mun. Abumor phọ ayoor mọphue iloghi ayoor, ụlogh iyoor eepuph, ụḅeni iyoor mọ awe ẹpe kụ ụkpar ọḅile opophogh upu iyoor, ạramha phọ ẹbughogh ọḅiirogh iikpe phọ osiemi kꞌạke; kẹn yoor ụmiin ni weye aḍigbogh aḍimite ẹpe phọ.’

²⁹ “Kụ mị ịḅeni bọ inyina mọ, ‘Kékpereghaan, kékiilaan bịdi.

³⁰ Ọmoogh-we Ẹnaan phọ anyina iḍiemiom bọ inyina kieenaan ni inyina, ạḅile aḍighi risigh anyina oomo ịpe ọdi aḍighi bọ ẹpe Ijipt.

³¹ Ịpe emite bọ ẹpe ẹdala phọ nyina ẹmiin aani bọ ni. Ịdipho oye raḅeton ghan bọ mọony ọdi kụ ịdi Ọmoogh-we phọ Ẹnaan phọ anyina iḅeton bọ inyina, ẹpe oomo areten phọ nyina erelhe bọ tụtu nyina eru bọ resi sịen.’

³² Kụ kꞌịphen kꞌịphen phọ nyina ímeeraam Ọmoogh-we phọ Ẹnaan phọ anyina,

³³ ọpo iḍiemiom bọ inyina ẹpe eten phọ, ụwaanaan ghan bọ iyira esi lọ yira kodoghoḍi rugbogo phọ ayira, ạkpooni ḍigbogh anem ạnian ḍughul oḍeenaan ghan ayira eten ịlo yira kotelhe, kụ ạngo ekpoogh ọotu ootaany.

Ọmoogh-we phọ ạliom bụo Ịzirel

³⁴ “Ọmoogh-we phọ ạnaghan ghan ịpe nyina rẹkaaph bọ kụ ẹghagh ologhi ọdi, kụ aghunya kụ ạḅem mọ,

³⁵ ‘Agey ni, rꞌoniin oye ólho sịen ọkaraph oghiil phọ ọphon dị kạmiin ịma phọ ạḍiphe mị aghunya bọ ạngo bụrude phọ ạbidi,

³⁶ omuton Kẹleb ọony phọ aJefune; ọdi bịn kụ kạmiin de phọ. Ọdi kụ ẹdi mị kạngo de phọ ạḍiphe ọdi mạazeghi bọ, ọdi rꞌạnmuny ọdi, ịdi eḍighi bọ ọdi ạtuugh ni ịpe eru bọ ịne kụ rạdaph Ọmoogh-we phọ.

³⁷ Ọmoogh-we phọ ạtuan rụmhu anyina kụ ụghagham aani bọ ịmi kụ ạḅem bọ mọ mị kási ẹpe phọ.

³⁸ AJosua ọony phọ ạNon ạmeera bọ esomanan ạna kụ kasi ẹpe phọ. Kpạrami ologhi ọdi. Ọdi kụ kaḍighi ịdi awe phọ Ịzirel kọmoogh de phọ.’

³⁹ “Ịbam ạnmuny phọ anyina, bụphe nyina ẹḅem bọ mọ kosiphi bịdi ọḍuanam mọ, rꞌạnmuny phọ anyina ḍio phọ ạḍiphe ologhi kọ̋su, igey rꞌịkaraph kőlhegheri, bịdi kụ kosi bọ ẹpe phọ, bịdi kụ ạbudi mị kạngo bọ, bịdi kụ kọmoogh bọ de phọ.

⁴⁰ Kụ nyina, iḅula ekiton ẹpe ẹdala phọ, ẹpe eten Ọphiiny Akaba.

⁴¹ “Kụ nyina ẹphagharanaan kụ ịḅeni ịmi mọ, ‘Yoor mọpioman ni oḍighi ịkaraph risigh Ọmoogh-we phọ. Yoor kọki ni obe, ọdaph oomo ịpe Ọmoogh-we Ẹnaan phọ ayira ạto bọ ụngo iyira.’ Nyina igbiom ni ologhi mọ mẹteeny ọghi ẹpe eelhe aroogbolom mọ, kụ ẹnyaaghian ịlo ẹgham.

⁴² “Kụ Ọmoogh-we phọ ụḅeni ịmi mọ, ‘Ḅẹni bịdi mọ kẹ́ki ee ẹgham mọ, ịdi eḍighi bọ mị úlhoonaan rꞌạbidi, ọbo ạbumulogh-ḍien phọ anyina kịze ghan bọ inyina.’

⁴³ Ịphen kụ ịdi mị ịḅeni bọ inyina, kụ nyina ị́magham ịyaar. Kụ nyina ímeeraam ologh phọ Ọmoogh-we phọ ạlogh bọ, ẹsighe bọ oḅom ẹmhu rꞌologhoma aloor bịn ẹghimom ẹpe eelhe aroogbolom mọ.

⁴⁴ Kụ bụo Ạmorait phọ bụphe orugh bọ ẹpe aroogbolom mọ aIdom oru izuom inyina ẹgham kụ iphorogh inyina ịdipho aḍiowo, kụ iphiemi inyina ọghi osi kꞌẹpe Homa.

⁴⁵ Kụ nyina rerigheel, kụ emoghi yogh risigh Ọmoogh-we phọ, kụ Ọmoogh-we phọ inyina ị́naghanan, ọ́ḅile kẹn ózuumaam.

⁴⁶ “Kụ nyina ẹrol ẹpe Kades ịminighan asiḍughul-otu ebianam.