Dạniel 5 - Ạḍinya Iigbia

ẠBelsazar ạko igbogh igoni

¹ Ḍiniin aḍughul ạBelsazar ọdaam mọ ạamaghagh oniin okuron abugbogh awe kꞌọdi olhe amalhe, kụ bịdi ọḅophan ọphugholan miim.

² Bịdi odi ni rọpughol, ạBelsazar ạto ạḅeni mọ ọsighe oru sịmogo agol rꞌasilva rꞌạrukpa phọ ạNebukadnezar ạsighiogh bọ Otu Ịiḅereghi ẹpe Jeruselem. Ọdaam mọ arom mọ ọsighe oru pịdi ọdi, abugbogh awe phọ ọdi, ạnmariir rꞌạruga phọ ọdi ọsighe ọpugholom.

³ Mem mem mọ ụsighe ni oru sịmogo agol phọ rꞌạrukpa phọ, kụ oomo ạbidi ọphugholom miim

⁴ kụ rooseeny ghan rụmugh dị oḍighinom gol, silva, enaba, okuron, oreeny ḅịle rꞌaḍighiigh.

⁵ Ekperenom bịn ạḍighaagh oye emite, bịn emiigh ọge, sịphe iikpe ogiga phọ ogbul bọ, sịphe ạḍiḅaal ịtozi phọ ẹkaraghi bọ esoorom. Kụ ọdaam mọ ạmiin ni ḍịghaagh phọ ịduon phọ rẹge bọ.

⁶ Ọdi akpaghagha ḅịle aruugu asiph nyọdi tụtu aruukum ọdi emiigh ophiigha.

⁷ Ọdi ạlho mọ oye ạpham we ịiḍaany phọ arumom, buukia awe phọ, ḅịle rꞌạbuphe ọtuugha bọ ịlo ạraanaan phọ. Mem dị bịdi oruughi bọ, ọdaam mọ ạḅeni bịdi, “Oye lọ katue ạbal ịge phọ ịphen kụ ạgba ẹmhu phọ koonmenemi nyọdi ịgorogoro ibura oodor ạbudaam, ọlogh orum ọdi ikoli agol arughuenian, ḅịle ọdi kamuneniom ịraar esi ịikpo sịen ọmar phọ.”

⁸ Abutomoghiom ọdaam mọ uruughi ni, kụ ọlo rꞌoniin órue ạal ịge phọ, mụghumo ọḅeni ọdaam mọ ẹmhu phọ.

⁹ Ịdipho rẹnyagh bọ ni nyọdi, ạBelsazar ọdaam mọ ạkuami kụ akpaghagha, kụ abugbogh awe phọ ọdi úlegheri ịlo oḍighi.

¹⁰ Onhiin ọdaam eelhe phọ ạnaghan ni ọyugh ọdaam mọ rꞌabugbogh awe phọ ọdi kụ ạghi aḍigh sịphe ogbotu amalhe phọ. Ạnir phọ ạḅem mọ, “Nạ ọdaam mọ tọl kꞌagee-pọ! Aḍiigu nyịna kísiph ḅịle kákpaghagha ịdipho.

¹¹ Oniin oye odi ni sịen ọmar phọ ạna dị uwaloor ạruukpaany iigbia eḍigh loor ọdi. Mem mọ ọde phọ ạna ạda bọ, oye phọ ọphon phọ aḍeenaan ni ogey ologhi, olegheri-ịyaar ḅịle rꞌọnaghanan ạḍughum dị ạghigh ologhi ạruukpaany phọ. Kụ ạNebukadnezar ọdaam eelhe phọ, ọde phọ ạna, aḍighi nyọdi ogbogh sịphe aḍita ạbuo ịmiin phọ, bụo ịiḍaany phọ, rụḅaghama phọ ḅịle rꞌạbuphe ọtuugha bọ ịlo ạraanaan phọ.

¹² Ọdi ạmoogh ni ẹekia ẹmaar. Ọdi kụ oye ologhi ḅịle rꞌẹmaar ọgba ghan ạramalha, ọgba ghan ẹmhu asikar, ḅịle rꞌogananami ghan ạraraar ịbooghian. Kụ iḍighi kụ tom ạghiom oye phọ ọphon Dạniel, ọpo ọdaam mọ ạta bọ mọ ạBeltesazar, bịn ọdi kạḅeni ni nyịna ịdi oomo ịphen phọ eru.”

ẠDaniel ạgba ẹmhu ịge phọ

¹³ Ụsighe ni Dạniel mem mem mọ oru risigh ọdaam mọ, kụ ọdaam mọ apuru nyọdi mọ, “Nạ kụ ạDaniel ooruen phọ, ọlo aJu phọ ọpo ọde ạmi ọdaam eelhe phọ ạsighe bọ ẹpe Juda kụ aru ḍụghum?

¹⁴ Mị mạnaghan ni mọ uwaloor ạruukpaany iigbia eḍigh loor ạna ḅịle mọ nạ oye ẹmaar kụ ạmoogh olegheri-ịyaar rꞌọnaghanan ạḍughum.

¹⁵ Ụsighe ni butomoghiom mọ rꞌawe ịiḍaany phọ oru mọ ạal ịge phọ ọḅile ọgba ẹmhu phọ ụḅeni ịmi. Kụ ọlo bịdi útue.

¹⁶ Nyịidipho mị mạnaghan mọ nạ katue ni ạwa amitiom ạḅile ạgba ạagelion rạraar ịbooghian. Eḍighi mạar dị nạ katue ni ạbal ịge phọ ịphen ạgba ẹmhu phọ ụḅeni ịmi, pọ koonmenemi nyịna ogorogoro ạsuoma oodor ạraalha, ọlogh orum ạna ikoli agol arughuenian, kụ nạ amuneniom ịraar esi ịikpo sịen ọmar phọ.”

¹⁷ ẠDaniel ạphagharanaan mọ, “Seerian inmo ạna mụghumo kẹn ngọ ọnon oye. Mị kạbalanaan ni ọdaam mọ ịphen phọ ọge bọ ạḅile ạḅeni nyịna ẹmhu phọ.

¹⁸ “Ọkaraghi Egbogh Ẹnaan phọ aḍighi ni ọde ạna Nẹbukadnezar ogbogh ọdaam kụ ạngo nyọdi rughuenian rꞌạgada igbogh.

¹⁹ Ọdi ạbugh ni ḍịbugh dị awe ạtorobo eelhe rꞌeḍighinom ịyaar rꞌọnhu kịrokiro oghiilaan ghan ni nyọdi kụ okpereghaan ghan. Eḍighi mạar lọ ọdi ạwa oghiigh oye, aghiigh ghan bịn; eḍighi mạar lọ ạwa oseere oye, ọdi aḍighi ghan bịn. Ọdi aghueni ghan mụghumo oofolomi oye ịlo ẹḅeeraan nyọdi.

²⁰ Loor esi dị ọdi aphoophe loor rꞌọḅaar ẹmhu ḅịle kẹn ọ́nma ghan ighirigiir, ugboton ni nyọdi ạgada igbogh phọ ọdi ạḅile aroph dọl arughuenian phọ ọdi.

²¹ Uphorogh ni nyọdi ọsighe eghoroghan awe, kụ ologhi ọdi aten ọlo ẹnam. Ọdi arughan rꞌilhom ịnam ologhi eḍum, ạraal ghan rọogho ịdipho ạnam, ạḅile ạmina ghan ephoghoghoony dị rꞌịyaar nyọdi íkoph ghan esi ooto phọ. Ekureriom mọ, ọdi aloghoma mọ Ọkaraghi Egbogh Ẹnaan phọ kụ repogh oomo ạramar awe, ọdi katue ni ạsaḅar tọrobo oye.

²² “Kụ ọlo nạ, ọony phọ ọdi, ósooromi loor ạna, ghạlamo ịduon nạ alegheri bọ ni oomo phọ ịphen phọ.

²³ Nạ mạpioman esi Ọmoogh-we kꞌạke phọ kụ ạḅile ạsighe sịmogo rꞌạrukpa phọ ọsighiogh bọ sịphe Otu Ịiḅereghi phọ ọdi. Nạ, rꞌabugbogh awe phọ ạna, ạnmariir phọ ạna rꞌạruga phọ ạna — oomo phọ anyina mọphugholom sịmogo phọ kụ ooseeny ịkaaneen ạrumugh dị oḍighinom gol, silva, enaba, okuron, oreeny rꞌaḍighiigh, rụmugh dị kẹ́miin mụghumo ọnaghan ịyaar ḅịle kẹn mạar ílegheri. Kụ ọlo nạ óghueni Ẹnaan phọ rẹto ghan bọ mọ oye ạrol mụghumo amugh ạḅile rapogh ghan bọ oomo ịlo nạ raḍighi.

²⁴ Pọ kụ ịyaar phọ Ẹnaan erom bọ ḍịghaagh phọ mọ ẹge ikpo ọnhu phọ ịphen.

²⁵ “Ịphen kụ ịdi ọge bọ: Mẹne, Mẹne, Tẹkel, Peres.

²⁶ Ẹmhu phọ ịduon: Mẹne: Ẹnaan megbi riiḍio ẹdaam mọ ạna ekureri.

²⁷ Tẹkel: Mọto ẹemor kụ nạ maaphoogh ạpughan.

²⁸ Peres: Modiighi eelhe phọ ạna ọngo bụo aMedia rꞌạbuo aPasia.”

²⁹ Mem mem mọ bịn ạBelsazar ạto ạngo butelhedom ọdi mọ oonmenemiom Dạniel ogorogoro ạsuoma oodor ạraalha kụ ọlogh ikoli agol arughuenian orum ọdi kụ ọdi aḍighi nyọdi oye dị amuneniom ịraar esi ịtooghi sịphe ọmar phọ.

³⁰ Ḍiniin phọ aḍughul phọ bịn oghiigh Bẹlsazar ọdaam eelhe phọ ạBabilon;

³¹ kụ ạDarios oye ọlo aMedia phọ aziton ạgada ọdaam eelhe phọ mem dị ọdi mạman odiinydi rꞌịyal ạsia.