Dạniel 2 - Ạḍinya Iigbia

Ạmalha phọ ạNebukadnezar

¹ Lhạ phọ emuneniom bọ ịyal phọ kꞌamem mọ ạNebukadnezar amiigh bọ ọda phọ ọdi ạmalha ni mạlha. Ạmalha phọ ạaḅaghami ni nyọdi iboom dị ọdi órue mun ọ́naani.

² Kụ ọdi arom ọmagh bụo ịmiin, bụo ịiḍaany, we ạghama, rꞌabuukia awe ọdi mọ oru ọgba ẹmhu ạmalha phọ ọdi. Mem dị bịdi oruughi bọ ọmeera ghisigh ọdaam mọ,

³ ọdi ạḅeni bịdi mọ, “Ạmalha dị mị ạmalha rụuḅaghami ni ịmi. Mị rạwa olegheri ẹmhu phọ.”

⁴ Bịdi ọphagharanaan ọdaam mọ ọnhu Aramaik mọ, “Ọdaam, tọl kꞌagee-pọ. Kạaph mạlha phọ ụḅeni iyoor, kụ yoor kọgba ẹmhu phọ ọḅeni nyịna.”

⁵ Ọdaam mọ ạḅeni bịdi mọ, “Mị magbiighi sịen ologhi ạmi akureri mọ nyina ẹmoogh ọghaaph ạmalha phọ ọḅeni ạmi kụ ogbi ọgba ọḅeni ạmi ẹmhu phọ. Eḍighi ịyaar lọ nyina ítue, pọ mị kịkanyan inyina owol mem ḍịghaagh mem kụ atene ruutu anyina egu atopha.

⁶ Kụ ọlo eḍighi mạar lọ nyina erue ni ẹghaaph mạlha phọ ẹḅile ẹgba ẹmhu phọ, mị kiinmo ni inyina ruunmo ạḅile ighueni inyina. Nyịidipho, ịkaaph mạlha phọ ẹḅile ẹgba ẹmhu phọ.”

⁷ Bịdi ọḅile ọphagharanaan ọdaam mọ, “Eḍighi ịyaar dị ọdaam mọ katue ni ụḅeni iyoor mạlha phọ, yoor kọgba ni ẹmhu phọ.”

⁸ Pọ kụ esi dị ọdaam mọ amoogha, “Ịduon kụ ịdi mị ạatughian bọ ni! Nyina reebinyemi ọghaaph phọ loor esi dị nyina ẹmiin mọ mị magbiighi akureri

⁹ ọngo oniin ọdo ịminimiin oomo anyina eḍighi ịyaar lọ nyina ị́kaaph mạlha phọ. Nyina meepuruan ọgba ọkpe ọḅeni ạmi loor esi dị nyina eḍuom ologhi mọ amem edi ni dị ạraraar kenmia. Ịḅeni ịmi mạlha phọ, bịn mị kalegheri ni mọ nyina ketue ni ẹgba ẹmhu phọ.”

¹⁰ Abutomoghiom mọ ọphagharanaan mọ, “Rꞌoniin oye ólho sịen ade phọ dị katue ạḅeni ọdaam mọ ịphen nạ rạwa bọ olegheri phọ. Ọdaam ólho, ghạlamo ọkar ogbogh rꞌigbogh ịikpo, dị mapuru ghan ọdo phọ ịphen phọ bụo ịmiin, bụo ịiḍaany idike ạraanaan phọ ọdi.

¹¹ Ịphen ọdaam mọ rapuru bọ ẹkpar ri dị oye ólho dị katue aḍighi emuton rụmugh phọ, kụ ạri bịdi ítughan rꞌawe.”

¹² Ịphen phọ iphin ni ologhi ọdaam mọ iboom kụ ọdi ạto mọ ọze oomo abutomoghiom mọ ọno ẹpe Bạbilon.

¹³ Kụ iḍighi kụ ogbeel mọ ọze oomo phọ ạbidi, ọḅaram Dạniel rꞌạrighiri phọ ọdi.

Ẹnaan egananami ẹmhu ạmalha phọ eḍeenaan Dạniel

¹⁴ Pọ kụ amem dị ạDaniel ạghi ạteeny Ạriok, ogbogh ọnyo abukoriom ọdaam mọ. Ọdi kụ ẹdi ọḅeni bọ mọ ạze weye phọ. Rꞌomiighe aloor ọdi ạasonion ikpo ọnhu ọdi,

¹⁵ kụ apuru Ạriok ịpe eḍighi bọ kụ ọdaam mọ ạto bọ ịgbagara ịtooghi phọ ịphen. Kụ Ạriok ạḅeni Dạniel ịpe emite bọ.

¹⁶ ẠDaniel ạghi ni mem mem mọ ạlom ọdaam mọ mọ ạngo nyịno mem pịdi ọdi ạḅeni ọdaam mọ ẹmhu ạmalha phọ.

¹⁷ Kụ ạDaniel ạghi ologhi otu ạḅeni rịghiri phọ ọdi Hananaya, Mịsael rꞌAzaraya ịpe memite bọ.

¹⁸ Ọdi ạḅeni bịdi mọ ọoḅereghi Ẹnaan kꞌạke phọ ọlom ọnma ighirigiir ọḅile ọlom mọ ọdi agananami rạraar ịbooghian ạḅeni bịdi ọbo kọze ghan bọ bịdi ọḅaraghiom rꞌạbueri phọ abutomoghiom sịphe Bạbilon.

¹⁹ Kụ ḍughul aḍio phọ ạḍiphe phọ ni ugananami ni rạraar ịbooghian phọ ọḅeni Dạniel uḍien, kụ ọdi aboom ni Ẹnaan kꞌạke phọ:

²⁰ “Ẹnaan ẹsu ni ologhi kụ ẹmoogh ịikpo! Itu oboom nyọdi kꞌagee-pọ kꞌagee-pọ.

²¹ Ọdi kụ rạpam ghan mem mọ rꞌạrunwanyu phọ; ọdi kụ azu ạḅile azughuron eghoony rạalha; ọdi kụ rạngo olegheri-ịyaar rꞌọnaghan ạḍughum.

²² Ọdi kụ ragananami ghan rạraar ịbooghian; ọdi alegheri ni ịyaar lọ ạaghi esi ufiri, kụ ọdi rꞌaloor ạḍiḅaal kụ ikoom.

²³ Mị ạseph ni nyịna ạḅile aghueni nyịna, Ẹnaan ạburude ạburude phọ ạmi. Nạ mụngo ịmi olegheri-ịyaar ḅịle rꞌịnyaam; nạ mạnaghan ịiḅereghi phọ ạmi ạḅile uḍeenaan iyoor ịlo kọḅeni bọ ọdaam mọ.”

ẠDaniel ạkaaph ạḅeni ọdaam mọ mạlha phọ ạḅile ạgba ẹmhu phọ

²⁴ Kụ ạDaniel ạghi ạteeny Ạriok, ọpo ọdaam mọ ạto bọ ạḅeni mọ ạze butomoghiom ọdaam mọ. Ọdi ạḅeni nyọdi mọ, “Kạ́ze bịdi. Ụsighe ịmi ạghiom kꞌọdaam mọ. Mị kạḅeni nyọdi ẹmhu ạmalha phọ ọdi.”

²⁵ Mem mem mọ bịn Ạriok ạsighe Dạniel ạghiom kꞌạNebukadnezar kụ ạḅeni ọdaam mọ, “Mị mạmiin oniin ọlo aJu phọ odi bọ iiruen phọ, dị katue ni ạgba ẹmhu ạmalha phọ ạna.”

²⁶ Ọdaam mọ apuru Dạniel (ọpo oghol bọ mọ ạBeltesazar) mọ, “Nạ katue ni ụḅeni ịmi ịpe mị ạmalha bọ ḅịle rꞌẹmhu phọ ạmalha phọ?”

²⁷ ẠDaniel ạphagharanaan mọ, “Nạ ọdaam mọ. Ọḅaghama ólho, oye ịiḍaany ólho, oyil ịmiin ólho, ḅịle oye dị ạal ghan ạraanaan ólho dị katue ạḅeni nyịna ịphen phọ.

²⁸ Kụ ọlo eniin Ẹnaan edi ni kꞌạke dị regananami ghan rạraar ịbooghian. Ọdi mạḅeni ọdaam mọ rạraar dị kemite risigh. Nyịidipho mị kạḅeni nyịna mạlha phọ nạ ạmalha bọ mem mọ nạ ạnaani bọ.

²⁹ “Mem mọ ọdaam mọ rạnaani bọ, nạ ụmalha ạmiin ịdi kemite ẹpe risigh; kụ Ẹnaan phọ regananami ghan bọ rạraar ịbooghian phọ meḍeenaan nyịna ịdi retu omite.

³⁰ Nyịidipho mogananami uḍeenaan ịmi ịikia phọ ịphen, ụ́ḅile ụ́ḅem mọ mị kụ ụsu ologhi apu bụnon awe kụ ọlo ạtuan mọ nạ ọdaam mọ alegheri ẹmhu ạmalha phọ ạna ạḅile ạnaghanan ịitughian ạna.

³¹ “Nạ ọdaam mọ, ẹpe ạmalha phọ nạ ụmiin bọ, risigh ạna ịmeera ni ebadabada igbudu dị ẹḅaal rẹnmana ḅịle eḍigh ḍiigu.

³² Ẹmhu igbudu phọ oḍighinom ọkar ogey agol; ekpologhi phọ rꞌạraghaagh phọ oḍighinom silva, esin phọ rꞌikpati phọ oḍighinom enaba.

³³ Aruwol phọ eḍighi okuron, kụ ạrada phọ ekpisi okuron ekpisi ẹḍaany.

³⁴ Kụ nạ odi ni rapogh bịn aḍiboom aḍighiigh esophaan esi dị ekpululu dị rꞌoye kụ ụ́ḅogh bịn emeelom ekar rạda okuron rꞌẹḍaany phọ bịn eetughuḍi.

³⁵ Mem mem mọ okuron phọ, rꞌẹḍaany phọ, rꞌenaba phọ rꞌasilva rꞌagol phọ eetughuḍian bịn eten ophugh dị ọmiin esi lọ rọgbe ghan mem aghozogh. Ookuugh aphula ạsighiogh bịn ịyaar ísugha mun. Kụ ọlo igbudu emite bịn eten ẹeḅaraph dị eekpereghiom oomo ade phọ.

³⁶ “Phọn kụ ạmalha phọ. Nyịidipho mị kạgba ẹmhu phọ ạḅeni ọdaam mọ.

³⁷ Ọdaam, nạ kụ ọkaraghi ogbogh esi oomo ạraalha. Ẹnaan kꞌạke mẹdaami nyịna ẹḅile ẹngo nyịna ịikpo, igbogh rꞌarughuenian.

³⁸ Ọdi mạma nyịna ọda oomo awe lọ orugh sịphe ade phọ rꞌọḅile ọda oomo ịnam rꞌịnun. Nạ kụ ẹmhu agol igbudu phọ.

³⁹ Otenom nyịna, ọnon ọmar kạḅile ni ạtol dị kạ́bugh ịduon ọphon ạna, kụ ọpo aten, ọnon dị kamuneniom ịraar, ọmar enaba dị kạda oomo ade phọ.

⁴⁰ Kụ ọdi kamuneniom inya amite, dị kạmoogh ịnyaam ịdipho okuron, dị kạgur ghan aḅomoghi tọrobo ịyaar. Kụ ịdipho okuron kaatughuḍi bọ tọrobo ịyaar kụ ịdi ọmar phọ ọphon kaatughuḍi ni ạzeerom oomo ịḅel ạramar phọ.

⁴¹ Nạ ụmiin kẹn ni mọ ạrada phọ rꞌạsunugh ạrada phọ iḍighi ekpisi ẹḍaany, ekpisi okuron. Ịduon phọ eḍeenaan mọ ọmar dị kaḍia kạmoogh ịnyaam dị kọtomaam okuron, loor esi dị okuron ạrol li dị okpoghom ẹḍaany phọ.

⁴² Ạsunugh ạrada phọ — ạpakiri okuron ạpakiri ẹḍaany — eḍeenaan mọ ọmar phọ ọpo phọ ạga kạkpar kụ ạga ạyoghoyogho.

⁴³ Nạ ụmiin kẹn ni mọ okuron phọ ukpoghom ẹḍaany. Ịpe eḍeenaan mọ ạbudaam ọmar phọ ọpo kọkparagha ni ọḅophoghi arughunotu ạbidi esi oophinighan ghan, kụ ọlo bịdi kótue, ópelom ịdi okuron kạ́ḅophan rꞌẹḍaany.

⁴⁴ Mem mọ ạbudaam mọ ạbuphe kọtol bọ, Ẹnaan kꞌạke kemitiom ọmar dị eekuna kẹ́tol. Kótue oogulemi kụ kakar kụ apiemi rạmar phọ ịpe kụ agbi ọrol kꞌagee-pọ.

⁴⁵ Nạ ụmiin ni ịdi aḍighiigh esophaan sịphe ekpululu bọ dị rꞌoye kụ ọ́ḅogh bịn emeelom igbudu phọ oḅolom bọ okuron, enaba, ẹḍaany, silva rꞌagol. Egbogh Ẹnaan phọ kụ rẹḅeni nyịna ọdaam mọ ịdi kemite mem dị retu. Mị mạḅeni nyịna ọkaraghi ịpe nạ ạmalha bọ ạḅile ạgba ẹkar ẹmhu phọ ạḅeni nyịna.”

Ọdaam mọ aanmo ruunmo Dạniel

⁴⁶ Pọ kụ amem dị ạNebukadnezar ọdaam eelhe phọ azumeri ẹmhu ude oghueniom kụ ạto mọ oḍighi yogh rạraar aghuḍum rꞌaruunmo ọngo Dạniel.

⁴⁷ Ọdaam eelhe phọ ạḅem mọ, “Ẹnaan ạna kụ ọkar egbogh dị epu oomo ạranaan, Ọmoogh-we phọ dị apeleghiom rạalha kụ ọdi kụ ragananami ghan rạraar ịbooghian. Mị alegheri ịphen phọ loor esi dị nạ marue ạkaaph ạagelion iikia phọ ịphen.”

⁴⁸ Kụ ọdi ạngo Dạniel ḍigbogh ạdol, ạngooghi nyọdi ruunmo dị ẹnighe ịikia, aseere nyọdi nyeniin ẹkpigh ạBabilon, kụ aḍighi nyọdi uwo ẹmhu oomo abutomoghiom ọdaam mọ.

⁴⁹ Ọnaghanan ịlom ạDaniel, ọdaam eelhe phọ aseere ni Sạdrak, Mẹsak rꞌAbed Nego mọ ophogh ghan oomo ịlo ẹkpigh ạBabilon; ạDaniel ạrol ghan sịphe ogiga phọ.