Dạniel 12 - Ạḍinya Iigbia

Amem ekureriom mọ

¹ Ọokpaany kꞌạke phọ ọpo aanmenaan bọ ịyegheyeghe arukpe phọ ạḅem mọ, “Mem mọ ọpo, ogbogh ọokpaany kꞌạke phọ Mạikel, ọpo rakori ghan bọ we phọ anyina, katu ni amite. Kụ amem ịiḅaghami kẹtol li, ọdo ịdi kẹ̋rol ghan kꞌamem mọ areelhe phọ emite bọ. Amem mọ ạmuphe reru, oomo awe eelhe phọ anyina bụphe asiḍien phọ ọge bọ sịphe ạḍinya phọ Ẹnaan kokpetenaan ni.

² Ịbadi ạbuphe momuughu bọ kọḅile ni ọmoogh ghuḍum; buniin kọkelhom ghuḍum kꞌagee-pọ kụ buniin kọmiinom dọl aroofola kꞌagee-pọ.

³ Abuḍiemiom dị ọmoogh olegheri ịyaar kọmu ni rꞌạḍimu okuaḍio phọ. Kụ bụphe mọtughemi ghan bọ ịbadi awe mọ ọrol dọl aruukuan kọmu ni ịdipho ạraanaan kꞌagee-pọ.”

⁴ Ọdi ụḅeni ni ịmi mọ, “Kụ nyịidipho, Dạniel, kpereghi ḍịnya phọ, kụ ạloghom elegh tụtu kꞌeekuna aḅirini phọ. Ịdipho ịbadi awe kokirighaan ni ọkparagha ọnaghanan ịpe remite bọ.”

⁵ Kụ mị ạmiin ịyal awe dị ọmeregha ọogaany ọphiiny, oniin ạmeera ghan oogbom oogbom.

⁶ Kụ oniin ọnyo ạbidi apuru ọokpaany kꞌạke phọ ọpo ạmeera bọ ẹpe ephunom mọ mọ, “Kꞌạpur amem kụ ẹdi imananaan phọ ịphen phọ kemuneen bọ?”

⁷ Ọokpaany kꞌạke phọ aphoophe ni ịyal ạraghaagh aphoghomi okuaḍio kụ aguanaan rꞌiikunya aḍien Ẹnaan phọ edi ghan bọ kꞌagee-pọ phọ. Mị ụnaghan dị ọdi ạḅem mọ, “Kẹtol ịraar ạsia rꞌạpakiri. Mem dị ọgbiphoghom awe phọ Ẹnaan masi eekuna, pọ oomo ạraraar phọ ịphen memiteghu ni.”

⁸ Mị ụnaghan ni ịpe ọdi ạḅem bọ kụ ọlo mị ụ́naghanan. Kụ mị apuru mọ, “Kụ, oye phọ, oomo ịphen phọ kẹkar emuneen ika?”

⁹ Ọdi ạphagharanaan mọ, “Nạ ạmoogh ogheel nyịidipho, Dạniel, loor esi dị kọbooghi ni ikpo ọnhu phọ ịphen tụtu eekuna phọ eru.

¹⁰ Kowoph ni ịbadi awe. Ạbukaraph awe kótue ọnaghanan kụ ọlo koḍighi ni ịkaraph ọkiom risigh; ạbuphe ọsu bọ iloghi bịn kụ kọnaghanan.

¹¹ “Emiigh kꞌamem mọ ọpo kokunughi bọ ọphinyon ạrikia aḍio etum ḍio phọ, ịduon phọ pọ, emiigh mem Ạḅaphanya Amuphe phọ, ọonir ịyal okuron rꞌesughadi aḍughul-otu kụ keten.

¹² Ọḅaal ologhi kụ kạtolonaan bụphe ọphamanam bọ omeeraam mọ ạbidi tụtu ọonir ịraar okuron rꞌịraardi rꞌoogh aḍughul-otu eten!

¹³ “Kụ nạ, Dạniel, tọlom omeeraam asi ẹpe eekuna phọ. Nạ kamugh ni kụ ọlo nạ kaḅetenu ni ạboor ruunmo phọ ạna mem ekureriom mọ.”