Bụo Ịiruen 9 - Ạḍinya Iigbia

Ạbimelek

¹ Ạbimelek ọony phọ ạGidion ạghi ẹpe ẹmha ạSekem, ẹpe oomo asiya onhiin ọdi ọrol bọ, kụ ạḅeni bịdi mọ,

² “Iseseeny, ịkaaph edoghoḍi sụruru oomo awe phọ ạSekem mọ, ‘Ẹghen kụ kịḅeeraan inyina? Mụghumo oomo ạnmuny phọ ạGidion ọman bọ oḍualdi awe kụ kịda inyina, ḅịle mꞌoniin oye? Ịitughian mọ Ạbimelek aḍighi ni ịḅarara anyina rꞌiphulupul anyina.’”

³ Kụ asiya onhiin phọ ọdi ọghaaph oomo ịpe ọdi ạghaaph bọ ọḅeni oomo awe phọ ạSekem; kụ iloghi ạbidi emeeraam ni ọdaph Ạbimelek ịdi eḍighi bọ ọdi ọnyo asiya ạbidi.

⁴ Bịdi ụghi ni obughotu phọ aBaal Berit kụ ọsighe oḍualdi ipoḍi asilva kụ ọngo nyọdi. Kụ Ạbimelek ạsighe ikpoki phọ ịphen aphirom we oḍighi, ighiilaani awe dị iloghi ímunughan bụdi ọdaph nyọdi.

⁵ Kụ ọdi ạghi kꞌọde phọ ọdi ẹpe Ofra, kụ ạze bumor phọ ọdi, nmụny phọ ạGidion, oḍualdi awe, ạnyu aḍiniin aḍighiigh. Kụ aJotam, ọony dị ạGidion asophom ḍịmar, ạaghian kụ nyọdi úkiigh aani.

⁶ Pụruku oomo awe ẹmha phọ ạSekem ookpomoghan egina esi, rꞌoomo ạbuo ạBet Milo, kụ ọghi sịphe azin ạḍiogh iigbia phọ ẹpe Sẹkem ọsighe Ạbimelek oḍighi ọdaam ẹmha.

⁷ Mem dị ọghaaph bọ ịphen phọ ọḅeni Jotam kụ ọdi ạghi ạmeera ạnyu Eegum aGerizim kụ ạlho rꞌeboom ẹḍogh mọ, “Ịnaghan, nyina awe ạSekem, ọbo Ẹnaan ekori ịnaghanan inyina.

⁸ Amem ịrol li dị ireeny phọ eekpomoghan ọdaami ọdaam dị kạda bịdi, kụ bịdi ọḅeni oreeny-ọliv mọ, ‘Tue rụda iyoor.’

⁹ Kụ oreeny-ọliv phọ ạḅeni bịdi mọ, ‘Ọbo mị aḍighi ọdaam anyina, mị ụbile omitiom ghan mụnum mọ ạmi mụphe rọsighe ghan bọ koghueniom rụmugh rꞌawe, utu ụda ireeny?’

¹⁰ Kụ ịpheri phọ ireeny phọ ẹḅeni fịg mọ, ‘Tue rụda iyoor.’

¹¹ Kụ ạfig ạḅeni bịdi mọ, ‘Mị ụbile omuum ghan ịma iimuma phọ ạmi rẹduugha bọ, utu ụda inyina?’

¹² Kụ ireeny phọ ẹḅeni vain mọ, ‘Tue rụda iyoor.’

¹³ Kụ avain phọ ạḅeni ireeny phọ mọ, ‘Mị ụbile miim mọ ạmi rạngo ghan bọ rụmugh rꞌawe ọḅaal ologhi, utu ụda ireeny?’

¹⁴ Kụ oomo ireeny phọ ẹḅeni ọoka phọ mọ, ‘Tue rụda iyoor.’

¹⁵ Kụ ọoka phọ ạḅeni ireeny phọ mọ, ‘Eru mạar dị nyina ẹkar ri rẹwa ọdaami ạmi, pọ itu ạaghian sịen uba phọ ạmi; kụ eru mạar dị ítu ịdipho, pọ ạnian kẹḍua sịphe aloor phọ ạmi emite ele rạsaga phọ ạLebanon.’”

¹⁶ AJotam ạḅile ạḅem mọ, “Kụ nyịidipho ịphen nyina eḍighi bọ eḍighi ni ịlo aghuḍuul ḍụghum, dị nyina ẹsighe ni ogeny ologhi kụ eḍighinom Ạbimelek ọdaam anyina? Ịphen nyina eḍighi bọ eḍighi ni ịlo aghuḍuul ḍụghum, dị nyina reḅulemian Gịdion rꞌọto kꞌọdi, esi eeḅi ẹrolom mọ ọdi?

¹⁷ Ọde phọ ạmi ạtuan rụmhu anyina kụ ee ẹgham aghel ghuḍum mọ ọdi ọphel anyina ọsighe rạghaagh ạMidian phọ.

¹⁸ Kụ rodon nyina meḅetenu ezuom ọto ọde phọ ạmi, ẹze nmụny phọ ọdi, oḍualdi awe ạnyu aḍiniin aḍighiigh, kụ nyina mẹsighe Ạbimelek ọony ọnyani-otu phọ ọdi eḍighi ọdaam mọ ạda oomo awe phọ ạSekem loor esi dị ọdi aḍighi ọnyo asiya anyina.

¹⁹ Eru mạar dị ịphen nyina eḍighi bọ rodon Gịdion rꞌọto ọdi ẹnighe ni, pọ nyina iboom ni Ạbimelek; ọdi kẹn ạḅile iboom inyina.

²⁰ Kụ eru mạar dị ịphen phọ ị́nighe, pọ ạnian ẹḍua esi Ạbimelek emite ele we phọ ạSekem rꞌạBet Milo; ạnian ẹḍua kẹn esi awe phọ ạSekem rꞌạBet Milo emite ele Ạbimelek.”

²¹ Kụ aJotam aghiil asuma agheel Beer arugh ẹpe, loor oghiilaan Ạbimelek umor phọ ọdi.

²² Ạbimelek ạda bọ Ịzirel ịraar ạsia.

²³ Kụ Ẹnaan ẹsighe ọkaraph uwaloor ạlogh loor Ạbimelek rꞌawe phọ ạSekem; kụ awe phọ ạSekem ọrolom ḍịkaraph ạdol Ạbimelek.

²⁴ Ẹḍim ologhi phọ bịdi ọsighe bọ kụ oḍighinom bọ oḍualdi ạnmuny phọ ạGidion kụ repuru, kụ ọsighe ịḅaal phọ ạbidi ọḅam ẹmhu Ạbimelek.

²⁵ Kụ awe ạSekem orom we kụ ọghi ạaghian yogh ẹpe ạnyu ạraaḅaraph phọ mọ ogon ghan Ạbimelek, kụ bịdi ozirion ghan we lọ oten reten phọ ịpe rạraar. Kụ ọḅeni Ạbimelek ọghaaph phọ ọphon.

²⁶ AGaal ọony phọ Ebed aru ni asi Sẹkem rꞌabumor ọdi; kụ awe phọ ạSekem oghuraam nyọdi.

²⁷ Bịdi ụghi ni iizo avain phọ ạbidi kụ ọkuughi iimuma phọ oru oḍighinom miim, kụ ọsighe ọghi olhiom ẹyaal. Bịdi ụghi ni sịphe obughotu ẹmugh phọ ạbidi kụ olhe ọphughol kụ ootuuny Ạbimelek.

²⁸ Kụ aGaal ọony phọ Ebed apuru ghan mọ, “Ạnhian kụ Ạbimelek phọ? Esi ika kụ ẹdi yira ạbuo ạSekem mọ rokumu ghan bọ kọngo nyọdi? Ọdi kụ kọ́ony phọ ạGidion? Ọdi kọ́nyo ayira. Ạnhian kẹn kụ ẹdi aZebul phọ rapogh ghan bọ rạraar phọ ọdi? Esi ika kụ ẹdi yira kọtu bọ kụ okumu nyọdi? Isooromi loor ẹngo oye ẹemara phọ ayira Hamor ọpo amitiom bọ ẹmha phọ ạSekem.

²⁹ Mụghumo iḍighi ịdi mị kụ aḍiemiom we phọ ạbuen, ọbo mị magboton Ạbimelek ạsighe. Mị mụḅeni nyọdi mọ, ‘Kịa ạbughe we ẹgham mọ ạna ạpham arumom.’”

³⁰ Mem dị aZebul ọolha-ẹmha phọ ạnaghan bọ ịpe aGaal ọony phọ Ebed ạghaaph bọ, kụ ephin ologhi ọdi eteneghi.

³¹ Ọdi arom ni rụukpaany areekeleghian ọghi ẹpe Aruma ọḅeni Ạbimelek mọ, “AGaal ọony phọ Ebed rꞌabumor ọdi moru ẹphen Sẹkem kụ bịdi kómeera mọ nạ aḍigh ẹmha phọ.

³² Kụ iḍighi, kori aru ḍughul, nạ rꞌawe phọ ạna odi bọ ẹpe rꞌạna, ẹḅona yogh ẹpe iizo phọ.

³³ Kụ ḍịroor erumuḍio remite bịn aḅon aḅetenu azuom ẹmha phọ, kụ mem dị ọdi rꞌawe phọ ọdi oru ozuom nyịna kụ aḍighi bịdi ịpe ạḍighaagh phọ ạna ẹman bọ.”

³⁴ Ạbimelek aḅetenu ni rꞌoomo awe phọ ọdi ḍughul kụ ọghi ạaghian yogh oko Sẹkem okitonom inya ạruuku.

³⁵ Mem dị Ạbimelek rꞌawe phọ ọdi ọmiin bọ Gaal ọony phọ Ebed dị amite sịphe ọnhu-aḍibuo ạmeera eḍighom ẹmha phọ, bịdi uḅerenu ni riisi ịbooghian phọ ạbidi.

³⁶ AGaal ạmiin ni kụ ạḅeni Zebul mọ, “Pogh, awe odi ni dị ọḍua ẹpe ạnyu aroogbolom mọ rosoor.” Kụ aZebul ạḅeni nyọdi mọ, “Bụphe phọ káwe. Nạ ụmiin oogho aroogbolom mọ kụ nạ ragbi ghan mọ awe.”

³⁷ Kụ aGaal ạḅile ạḅeni nyọdi mọ, “Pogh. Awe ọḍua ni ẹpe ẹeḅaraph phọ rosoor, kụ buniin ọḍua ẹpe ạḍiogh ạbuo ịmiin phọ kụ rotelhe.”

³⁸ Kụ aZebul apuru nyọdi mọ, “Igbogh ạraghaaph phọ ạna edi ẹghen nyịidipho? Ọphon kọ́di nạ ạḅem bọ mọ, ‘Ạbimelek phọ ạnhian dị yira kokumu bọ nyọdi?’ Bụen phọ kụ káwe phọ nạ aphogh bọ asooromi? Seseeny mite nụun ạghi bịdi rꞌạna ee ẹgham.”

³⁹ Kụ aGaal aḅetenu amite ạghi ghisigh awe phọ ạSekem, kụ Ạbimelek rꞌọdi ee ẹgham.

⁴⁰ Kụ Ạbimelek aphorogh nyọdi kụ aGaal asuma; kụ ịbadi omeleghu sịphe ọnhu-aḍibuo oghoony eḍighom ẹmha phọ oḍighima yogh rạraar.

⁴¹ Ạbimelek arugh ẹpe Aruma, kụ aZebul aphorogh Gaal rꞌabumor phọ ọdi amitiom ịdi bịdi kótugh mun ẹmha phọ Sẹkem.

⁴² Ḍio phọ ḍịphe etum bọ pạ, ụḅeni ni Ạbimelek mọ awe phọ rọwa ọghiighi ẹpe iizo phọ.

⁴³ Kụ ọdi ạsighe we phọ ọdi adi ịraar ạruuku, kụ bịdi ạaghian yogh ẹpe iizo phọ okori ghan. Kụ ọdi aphogh kụ ạmiin we dị ọḍua ẹpe ẹmha phọ kụ rotu, kụ ọdi aḅetenu azuom bịdi ạze.

⁴⁴ Mem dị Ạbimelek rꞌạbuphe rꞌọdi oḍighan bọ oghiil rọki okori sịphe ọnhu-aḍibuo ẹmha phọ ọbo ịiḅaghami keḍigh, ịyal phọ ịpheri phọ ạruuku phọ ụghi ozuom oomo ạbuphe odi bọ ẹpe iizo phọ ọze bịdi.

⁴⁵ Elephiri phọ ịrol li oomo ẹmhu aḍio phọ. Ạbimelek ạsighe ạmoogh ẹmha phọ ạze oomo awe phọ, kụ ạsighe boph aaduḍi de phọ.

⁴⁶ Awe phọ ạbuphe orugh bọ oophoopha otu ạSekem rọnaghan bọ ịphen phọ emiteghu bọ, kụ ọghi oḍigh ḍibuo obughotu aBaal Berit.

⁴⁷ Kụ ọḅeni Ạbimelek mọ oomo awe phọ ạSekem mookpomoghan sịphe,

⁴⁸ kụ ọdi ạghi ạsiiny ạnyu Eegum aZalmon rꞌoomo awe phọ ạbuphe oḍighan bọ rꞌọdi. Ọdi ạsighe akubu ạpham ẹpe phọ, ạsighe asophom ọla oreeny kụ anyora ọpha, kụ ạlho ạḅeni we phọ ọdi mọ, “Tọrobo ịlo nyina ẹmiin lọ mị raḍighi, pọ iigborion, ẹtuugh ịpe phọ bịn eḍighi.”

⁴⁹ Kụ tọrobo oye asoph aani ọlo ọdi kụ ạdapham Ạbimelek, kụ ọghi ọsighe osereghi ịpe phọ ẹpe obughotu phọ ạkparami bọ kụ ọsighe nịan ọkpooni, kụ oomo awe oophopha otu phọ ạSekem omuughu, alephiri rꞌạnmariir dị ọghiom oniin ọonir awe.

⁵⁰ Kụ Ạbimelek ạḍua ạghi ẹpe Tebez, aaghironom ẹmha phọ kụ ạsighe ạmoogh ẹmha phọ.

⁵¹ Oophopha otu dị ọlogh ọkparami ạrol li sịphe ẹmha phọ; kụ oomo awe ẹmha phọ osumughu ọghi oḍiku sịphe otu phọ, alephiri rꞌạnmariir, kụ oghughi otu phọ, kụ ọghi ọsiiny ẹpe eekuna ologhi otu oophopha otu phọ.

⁵² Mem dị Ạbimelek aru bọ ozuom otu phọ ophiemi, ọdi aḍuraan ni ạghi atuman oniin ọnhu-aḍibuo otu phọ ịlo ọsu ạnian.

⁵³ Kụ oniin ạnir ạsighe ḍighiigh dị ẹmanam ọgbiom igbilha atebenom ẹmhu ọdi bịn ọkeeghi ẹmhu phọ ạayuan.

⁵⁴ Kụ ọdi akem ạmagh oye phọ ọpo ratool ghan bọ rạraar ẹgham mọ ọdi, kụ ạḅeni nyọdi mọ, “Mitiom elhool ẹgham mọ ạna ughiighom ịmi. Mị ụ́wa dị awe kọḅem mọ ạnir-ephoph kụ ughiigh ịmi.” Kụ oye phọ aagborion ni agbemeghi nyọdi, bịn ọdi amugh.

⁵⁵ Kụ mem dị awe phọ Ịzirel ọmiin bọ mọ Ạbimelek mamugh kụ tọrobo oye agheel kꞌọdi.

⁵⁶ Ịdipho kụ ẹdi Ẹnaan eḅulemian bọ Ạbimelek sịpioghom mọ ọdi, ịpe ọdi aḍighi bọ ọde phọ ọdi, ạze bọ oḍualdi abumor phọ ọdi,

⁵⁷ ẹḅile kẹn ẹsighe bọ oomo ạsipioghom mọ awe phọ ạSekem eḅulemi ẹḅam rụmhu ạbidi. Ịdipho phọ kụ ẹdi iitulughian phọ aJotam ọony phọ ạGidion arulughi bọ bịdi eḅula bọ esoroghuom bịdi.