Bụo Ịiruen 8 - Ạḍinya Iigbia

Ekureriom oogulemi eelhe phọ ạMidian

¹ Kụ awe eghun Ifraim opuru Gịdion mọ, “Ịphen nạ uḍighi bọ iyoor ịghen? Nạ iyoor ụ́magh aani bọ mem mọ nạ rạki bọ eenom ạMidian phọ ẹgham mọ?” Kụ ozuom nyọdi ọruonu dị ạbugh.

² Kụ ọdi apuru bịdi mọ, “Ịphen mị arue bọ aḍighi ị́man ịyaar ọsighe ọtomaam ịpe nyina meḍighi bọ? Ghạlamo ịnum mọ ịphen nyina awe Ifraim meḍighi bọ bịn epel li ịdi oomo ọto ạmi moḍighi.

³ Ẹnaan ịḅogh ni Oreb rꞌaZeeb bụphe ọda bọ Mịdian ẹlhogh ḍịghaagh anyina. Mịna katue ni aḍighi aani ọdo phọ ịpe nyina eḍighi bọ?” Ọdi ropuru bọ bịdi ịduon, bịn ọghagh ologhi phọ ạbidi ạwologhu.

⁴ Mem mọ ạmuen phọ ạGidion rꞌịraar okuron awe phọ ọdi mosi Ọphiiny ạJodan ọḅeeny. Asiloor ạbidi medugh kụ ọlo ị́per bịdi ophorogh ẹpomoghian phọ.

⁵ Mem dị bịdi oru osi ẹpe aSukot kụ ọdi ạḅeni we ẹmha phọ mọ, “Iseseeny, ịngaani we phọ ạbuen ụdaph bọ ịmi iiḅoghoḍi ạbred. Mẹpher bịdi, kụ mị raporogh ghan Zeba rꞌaZalmuna, bụdaam mọ ạMidian.”

⁶ Kụ bụphe ọda bọ Sukot ọḅeni nyọdi mọ, “Iḍighi ika kụ yoor kọngo bọ eḍien we ẹgham mọ ạna. Nạ kọ̋teeny Zeba rꞌaZalmuna osiph.”

⁷ Kụ ạGidion ạḅem mọ, “Ẹnighe ni-a. Mem dị Ọmoogh-we phọ mạḅogh bọ Zeba rꞌaZalmuna ạlogh ḍịghaagh ạmi, mị kạsighe iitoor rꞌareghena ẹpe ẹdala phọ ạguroghom iphulupul anyina.”

⁸ Kụ ọdi ạghi asi ẹpe Pẹnuel, kụ ạtuugh iniin phọ ịphen phọ ạḅeni bịdi, kụ aweye ạPenuel phọ ọtuugh iniin phọ ịpe awe phọ aSukot ọphagharanaan bọ nyọdi ọphagharanaan.

⁹ Kụ ọdi ạḅeni we ạPenuel phọ mọ, “Mị arigheel rꞌẹepho, mị kalereghi oophopha otu phọ ọphon.”

¹⁰ AZeba rꞌaZalmuna ụrol ẹpe Kakor rꞌawe ẹgham mọ ạbidi. Sịphe oomo ạbuphe orugh bọ ẹpe ẹdala phọ bụdi osugha ọghiom 15,000 awe ẹgham bịn. Bụdi omeleghu kụ ọze ọman bọ 120,000 awe.

¹¹ Kụ ạGidion akiton ẹpe eten ạga phọ ọpo erumuḍio phọ remite ghan bọ ẹpe Noba rꞌaJogbeha, kụ ekperenom bịn azuom we ẹgham mọ, ịdi eḍighi bọ bịdi oḍuom ologhi mọ ịyaar kéḍighi bụno.

¹² Kụ ịyal phọ ạbudaam mọ ạMidian, Zeba rꞌaZalmuna, oghiil rosuma, kụ ọdi aphorogh bịdi ạteeny asiph, kụ ạwalalami we ẹgham mọ.

¹³ Mem dị ạGidion ọony phọ aJoas ratigheel ẹgham mọ kụ ọdi ạghi asi Eḍighom aHeres,

¹⁴ ọdi asiph ni oniin onyugheel ọony ọlo aSukot kụ apuru yogh sipuru nyọdi. Kụ ọony phọ ạge siḍien oḍualdi rꞌoḍual ikpolom awe phọ rꞌikumoor awe dị odi Sukot ạngo nyọdi.

¹⁵ Kụ ọdi ạghi ạteeny we phọ aSukot, kụ ạḅeni bịdi mọ, “Ịmaar ẹetughian mem mọ nyina ímeera bọ ọloghonaan ạmi ḍịghaagh? Nyina ịḅem mọ nyina kẹ́ngo we ẹgham ạmi dị aloor medugh eḍien ịdi eḍighi bọ mị kősiph Zeba rꞌaZalmuna. Pọrono ạbidi!”

¹⁶ Kụ ạsighe iitoor rꞌasipho ịsiphe ẹdala phọ kụ ạtughemiom ikumoor awe phọ aSukot olegheri ịyaar.

¹⁷ Kụ ọdi alhereghi oophoopha otu phọ ạPenuel ạze we ẹmha phọ.

¹⁸ Kụ ọdi apuru Zeba rꞌaZalmuna mọ, “Eeghe ọdo awe kụ ạbudi nyina ẹze bọ ẹpe Tabor?” Kụ bịdi ọphagharanaan nyọdi mọ, “Ịdipho nạ ạrol bọ kụ ịdi awe phọ ọrol, tọrobo ọnyo ạbidi ạkigh mọony ọdaam.”

¹⁹ Kụ ạGidion ạḅeni bịdi mọ, “Bụphe phọ abumor ạmi, ạnmuny-onhiin ạmi. Kụ ịdipho Ọmoogh-we phọ odi bọ ni, mụghumo nyina bịdi mị́ze bọ, mị inyina mị́ze.”

²⁰ Kụ ọdi ạḅeni Jẹter ọkpana ọony phọ ọdi mọ, “Ḅetenu ạze bịdi.” Kụ onyugheel ọony phọ áruph elhool ẹgham mọ ọdi ámitiom. Ọdi aabinya ni ịdi eḍighi bọ ọdi ọbumoony.

²¹ Kụ aZeba rꞌaZalmuna ọḅeni Gịdion mọ, “Nạ kụ ḅetenu ụze iyoor. Ịpe oye phọ ạrol bọ kụ ịdi ịikpo ọdi ẹtuugh ẹrol.” Kụ ạGidion aḅetenu kụ aghiigh Zeba rꞌaZalmuna kụ ọdi ạsighe ịma ạraraar phọ ẹrol bọ orum ạsikamel phọ ạbidi.

²² Ịphen reru reten kụ awe phọ Ịzirel ọḅeni Gịdion mọ, “Ụda iyoor, nạ rꞌạnmuny phọ ạna rꞌạnmuny oko ạna; ịdi eḍighi bọ nạ mụphel iyoor ạsighe ḍịghaagh ạMidian phọ.”

²³ Kụ ạGidion ạḅeni bịdi mọ, “Mị inyina rị́da. Ọony ạmi kẹn inyina kị́da. Ọmoogh-we phọ kụ kịda inyina.”

²⁴ Kụ ạGidion ạḅeni bịdi mọ, “Mị rịlhom ni inyina eniin ịyaar. Tọrobo ọnyo anyina ụngaani ịmi reḅeri-sụa ịpe ọdi awum bọ.” (ẠMidian ịdipho ạbunon awe dị orugh ẹpe ẹdala phọ ụlogha ni reḅeri-sụa dị oḍighinom gol.)

²⁵ Kụ bịdi ọphagharanaan mọ, “Yoor kọngaani ni nyịna rꞌophooph ologhi.” Kụ bịdi ọsighe ukpe ọde ude, kụ oye ye ạghi ghan aseere sịphe ukpe phọ reḅeri-sụa phọ ịpe ọdi awum bọ.

²⁶ Kụ ẹemor areḅeri-sụa agol phọ ọdi ạlhom bọ ẹghiom ni ịyaldi igbogh ịtoom ẹemor agol, ụ́loghom ịma ạraraar phọ ẹrol bọ orum mọ rꞌịkomom rꞌạrusuoma aroodor phọ ạbudaam mọ ạMidian rọkpologhian ghan bọ, ụ́loghom kẹn inyoraam mọ ịpe ọlogh bọ irum ạsikamel phọ ạbidi.

²⁷ ẠGidion ạsighe sigol phọ kụ ạkaam igbudu kụ ạghi aseere sịphe Ofra ẹmha phọ ọdi. Kụ oomo awe phọ Ịzirel ọwile Ẹnaan kụ ọghi ghan ooseeny igbudu phọ. Iḍighi ni ḍiphil kụ ẹngo Gịdion rꞌọto ọdi.

²⁸ Kụ ạMidian phọ osooromi loor ạbidi esi awe phọ Ịzirel; bịdi úpophe mun siloor phọ ạbidi. Kụ ade phọ ẹpho enamian inyadi ạsia mem mọ ạGidion.

Aḍuugh phọ ạGidion

²⁹ Kụ ạGidion agheel ẹpe ẹmha phọ ọdi kụ arugh.

³⁰ ẠGidion ạmar bọ oḍualdi ạnmuny bụo ọkuruḅaka ọdi, ịdi eḍighi bọ ọdi aphinogh ni ịminighan ạnmariir.

³¹ Ọdi ạmoogh ni ọyuga ẹpe Sẹkem dị ạmaranaan nyọdi olephiri ọony; kụ ọdi aghol ḍien ọony phọ mọ Ạbimelek.

³² Kụ ạGidion ọony phọ aJoas ạkpo ni igeny kụ agbi omugh, kụ oḍi nyọdi sịphe oḍi bọ Joas ọde phọ ọdi ẹpe Ofra ẹmha ọto phọ Abiezer.

³³ Kụ ạGidion romugh bọ bịn awe Ịzirel omiigh ọphueghinaan asiloor, ọḅile ooseeny rụmugh aBaal; kụ ọsighe Baal Berit oḍighi ẹmugh ạbidi.

³⁴ Kụ awe phọ Ịzirel ụ́utughian mun Ọmoogh-we Ẹnaan phọ ạbidi ọpo ạphel bọ bịdi ạsighe rạghaagh oomo ạbumulogh-ḍien phọ okoom bọ bịdi.

³⁵ Kụ bịdi ighirigiir ụ́nma ọto ạGidion óḅulemian oomo iiḅi phọ ịpe ọdi aḍighi bọ we phọ Ịzirel.