Bụo Ịiruen 7 - Ạḍinya Iigbia

ẠGidion aagulemi Mịdianait phọ

¹ Eniin aḍio kụ aJerubaal (ọphon phọ ạGidion) rꞌoomo awe phọ rꞌọdi ookpomoghan bọ, uḅerenu ni eḅon ạḍiroor odoghoḍi rugbogo ẹpe etuman bọ Ighool aHarod; arugbogo ịpe ạMidian edi ḍịghaagh ephunom ạbidi etuman ẹpe Eegbolom aMore ẹpe eḍiinyaan bọ.

² Kụ Ọmoogh-we phọ ạḅeni Gịdion mọ, “Awe phọ nạ mạmoogh bọ ọbugh ọpughan dị mị ạḅogh Mịdianait phọ ạlogh ḍịghaagh awe Ịzirel bịn bịdi ootuma ghan kụ ọḅem ghan mọ ịnyaam ạbuno rꞌịikpo ạbuno kụ ịphel bọ bụno.

³ Kụ iḍighi, kịa agbeel mọ tọrobo oye lọ ạmoogh eepuph kụ aruugu rasiph, pọ ọdi aḅetenu eḅon ạḍiroor ạḍua sịphe Eegum ạGiliad agheel kꞌọdi.” Kụ ọdi rogbeel bọ kụ ịyaldi rꞌịyal ọonir awe oḅula, ḍioph ọonir awe osugha.

⁴ Kụ Ọmoogh-we phọ ạḅeni Gịdion mọ, “Awe phọ ọbugh kẹn ni ọpughan. Pạm bịdi ạghimom ẹpe ạmuum mọ, kụ ọlo mị ạḅeni nyịna mọ oye phọ ọphon kụ ạdaph nyịna pọ ọdi ạghi, kụ ọlo mị ạḅeni nyịna mọ oye phọ ọphon nyịna kụ́daph, pọ ọdi nyịna kụ́daph.”

⁵ Kụ ạGidion ạpham we phọ ạghimom ẹpe ạmuum mọ, kụ Ọmoogh-we phọ ạḅeni nyọdi mọ, “Tọrobo oye lọ ạsighe nem ọdi kụ ạphugholom mụum ịdipho aghoogh, pọ sịghe nyọdi ạmeremi gem. Tọrobo ọlo akpuḍian kụ ạphughol mụum mọ, pọ sịghe nyọdi ạmeremi ẹnon esi.”

⁶ Kụ ḍita ạbudi ọsighe rạghaagh kụ okoroghom ghan mụum mọ ọphughol ọman bọ ịraar okuron awe; oomo phọ ạbueri phọ ukpuḍughian ni kụ ọphughol ghan mụum mọ.

⁷ Kụ Ọmoogh-we phọ ạḅeni Gịdion mọ, “Ịraar okuron awe phọ ạbuen ọsighe bọ rạghaagh kụ okoroghom ghan bọ mụum mọ kụ ạbudi mị kạsighe bọ ịphelom inyina, ạsighe bọ Mịdianait phọ ạngo nyịna. Kụ oomo ạbueri phọ Ịzirel ogheel, tọrobo oye agheel kꞌọdi.”

⁸ Kụ ạGidion ạḅeni oomo awe phọ Ịzirel mọ uwo kꞌọdi agheel kꞌọdi, epel ịraar okuron awe phọ bịn, bụen phọ kụ ụpham bọ rụkuodu phọ rꞌạraraar ẹgham mọ. Esi phọ arugbogo ạMidian phọ ẹrol bọ ude eḍiiny phọ isoorom ni epu bịdi.

⁹ Ḍughul aḍio phọ ạḍiphe phọ kụ ẹdi Ọmoogh-we phọ ạḅeni Gịdion mọ, “Kịa azuom bịdi, ịdi eḍighi bọ mị mạḅogh bịdi ạlogh ḍịghaagh ạna.

¹⁰ Kụ eru mạar dị nạ rakiilaan ọghi, pọ pạm Pura otelhedom mọ ạna asoorom ẹpe bịdi ookpomoghan bọ.

¹¹ Kụ nạ kạnaghan ni ịdi bịdi rọkaaph, kụ agbi ọmoogh oḅio ozuom ạbidi.” Kụ ạGidion rꞌaPura ọghi otuman rugbogo phọ awe ẹpomoghian phọ ọrol bọ.

¹² ẠMidian phọ rꞌẠmalekait phọ rꞌawe phọ ạbuphe orugh bọ ẹpe emitenom erumuḍio phọ uleeny ni oomo eḍiiny phọ, ịdipho aḍita igurubia. Bịdi ụpham ni sịkamel dị eḍiza ịdipho ịisaar dị edi ọgbal ọphiiny.

¹³ Mem dị ạGidion aru bọ asi, ọdi ạnaghan ịdi oye ạḅeni ghan onyoogbo ọdi ịlo ạmalha. Ọdi ạghaaph ghan mọ, “Mị ạmalha mạlha dị eeḅoghoḍi ạbred dị oḍighinom ịbiakpa abali eekila kụ eru eḍigh sịen oomo ayira odi bọ kụ ekar ogbogo kụ ogbogo phọ ameel bịn asi ude.”

¹⁴ Kụ onyoogbo phọ ọdi ạphagharanaan nyọdi mọ, “Ịphen phọ kóopho. Ẹphen phọ elhool ẹgham ạGidion ọony phọ aJoas ọlo Ịzirel phọ. Ẹnaan mẹḅogh Mịdian rꞌoomo awe ẹgham mọ ayira ẹngo nyọdi.”

¹⁵ Mem dị ạGidion ạnaghan bọ mạlha phọ rꞌẹmhu ạmalha phọ, kụ ọdi akpuḍian ni kụ aaseeny Ẹnaan. Kụ aḅula ạghi ẹpe arugbogo phọ Ịzirel kụ ạḅeni mọ, “Iḅerenu ịdi eḍighi bọ Ọmoogh-we phọ rạḅogh ḍita awe ẹgham ạMidian phọ kạlogh ḍịghaagh anyina.”

¹⁶ Kụ ọdi adi ịraar okuron awe phọ ịraar ạruuku. Kụ ạsighe rụkuodu adi oye ye oniin, ạsighe izoki dị ịyaar ologhi ílho adi oye ye eniin, ạsighe ịmure adoghoḍi ologhi izoki phọ.

¹⁷ Kụ ọdi ạḅeni bịdi mọ, “Mem mọ mị mạrol rapogh rugbogo phọ ạbidi, iphogh ghan ịmi kụ ẹtuugh ịlo mị raḍighi eḍighi aani. Ịlo mị aḍighi kụ ịdi nyina keḍighi ghan.

¹⁸ Mem mọ mị rꞌawe phọ ạmi ophula rụkuodu ịlo ayoor, kụ ẹtuugh ephula aani rụkuodu phọ eeghironom rugbogo phọ, kụ ẹlo ghan ẹghiom ạnyu mọ, ‘Elhool ẹgham Ọmoogh-we phọ rꞌẹlo ạGidion!’”

¹⁹ ẠGidion rꞌoniin okuron awe phọ bụphe ọdaph bọ nyọdi uru ni osi riisi dị repogh rugbogo phọ ạbidi kụ egbi ọteeny ogbo aḍughul mem dị bịdi ạbuo okori aḍughul phọ pụruku onme. Kụ bịdi ophula yogh rụkuodu phọ kụ oḅomoghi yogh izoki phọ bịdi ọphamagh bọ.

²⁰ Kụ ịpheri phọ ịyal phọ ạruuku awe phọ ọtuugh ịdipho oḍighi aani. Bịdi ụphamagh ịmure phọ rạghaagh ekeeny ạbidi, ạrukuodu phọ rạghaagh elhiom, kụ ọloom ghan ọghiom ạnyu mọ, “Elhool ẹgham Ọmoogh-we phọ rꞌẹlo ạGidion!”

²¹ Kụ oomo phọ ạbidi uwo ạḍio ọdi ạmeera ḍịo ọdi gem, ooghironom rugbogo phọ. Kụ oomo awe ẹgham ẹpomoghian phọ oghilighu osumughu rꞌịlooghi.

²² Mem mọ awe phọ ạGidion ropula bọ rụkuodu phọ, Ọmoogh-we phọ aḍighi ghan ịdi awe ẹgham ẹpomoghian phọ ụsighe ni rolhool ẹgham mọ ạbidi ọziom siloor. Awe ẹgham mọ osumughu ọkel okeel kꞌẹpe Bẹt Sita rọki ẹpe Zaretan, ọkel ọki osi ẹpe ọku Ebel Mahola etuman bọ Tabat.

²³ Pọ kụ amem dị ọmagh we phọ Ịzirel, bụo eghun ạNaftalai rꞌeghun Ạser rꞌoomo eghun ạManase, mọ ookpomoghan egina esi; kụ bịdi ophorogh Mịdianait phọ

²⁴ Kụ ạGidion arom rụukpaany ạghiom oomo ạbuphe orugh bọ ẹpe aroogbolom mọ Ifraim kụ ạḅeni mọ, “Itu ezuom Mịdianait phọ ẹgham, ạar bịdi Ọphiiny ạJodan rꞌạruudu phọ, ẹghi esi ẹpe Bẹt Bara ọbo bịdi kọḅeeny ghan bọ.” Kụ oomo eghun Ifraim ookpomoghan egina esi, kụ ạarom bịdi Ọphiiny ạJodan rꞌạruudu phọ kꞌẹpe Bẹt Bara.

²⁵ Bịdi ụteeny ni Oreb rꞌaZeeb ịyal phọ ikpolom awe bụo ạMidian osiphi. Kụ bịdi oghiigh Oreb sịphe ạnyu Aḍighiigh Oreb, kụ oghiigh Zeeb sịphe omiim ghan bọ iimuma ẹpe aZeeb. Bịdi ụkparami ni ophorogh Mịdianait phọ. Kụ ọpham ẹmhu phọ Oreb rꞌẹmhu phọ aZeeb ọsighe oruom Gịdion ẹpe ạga emitenom mọ ạJodan.