Bụo Ịiruen 6 - Ạḍinya Iigbia

ẠGidion

¹ Awe Ịzirel ụḅile ni oḍighi ịkaraph risigh Ọmoogh-we phọ; kụ Ọmoogh-we phọ ạsighe bịdi ạḅogh ạngo Mịdian oḍual ạsia.

² Kụ ạḍighaagh ạMidian phọ ẹkpar epu Ịzirel; kụ awe phọ Ịzirel ọtuan bịdi oguphogh sịghele ạaghian ẹpe aroogbolom mọ rꞌaribidiph rꞌịikpara ariisi.

³ Tọrobo amem lọ awe Ịzirel ọzuphogh ịizupha, ạMidian phọ rꞌẠmalekait phọ rꞌạbuphe orugh bọ ẹpe erumuḍio phọ remite ghan bọ uru ghan ni ozuom we phọ Ịzirel elephiri.

⁴ Bịdi oko we phọ Ịzirel okitonom ọpueghi oomo ịizupha phọ ạbidi sịphe ade phọ. Ẹsighe ẹghi esiemi bụphe orugh bọ otuman Gaza, rꞌẹnum ịyaar úsughenaan we Ịzirel, mꞌoyool-ọga mꞌạnam mꞌẹnam adool.

⁵ Bịdi rotu, ọpam ịnam-otu phọ ạbidi rꞌarugbogo phọ ạbidi kụ otumom. Ụghi ghan ịdipho igurubia ḍiza dị kótue ọbal: bịdi rꞌạsikamel phọ ạbidi ọki ọpueghi rạraar ade phọ.

⁶ Kụ awe Ịzirel omeel ekulom loor ạMidian phọ kụ omoghi ọmagh Ọmoogh-we phọ mọ ạloghonaan bụno ḍịghaagh.

⁷ Mem dị awe phọ Ịzirel omoghiom bọ Ọmoogh-we phọ loor ẹmhu ạMidian phọ,

⁸ kụ Ọmoogh-we phọ arom oyil mọ ạghi ạḅeni bịdi mọ, “Ọmoogh-we Ẹnaan phọ Ịzirel ạḅem ịduon mọ: mị ịsighe inyina ẹpe Ijipt ạḍuanam, ịsighe inyina esi ạdol ạrebene.

⁹ Mị ịtagharan inyina ạsighe ḍịghaagh awe Ijipt phọ rꞌạḍighaagh ạbuphe ịkpiloghom bọ inyina. Mị uphorogh ni bịdi ịdipho nyina retu bọ kụ mị ịngo inyina de phọ ạbidi.

¹⁰ Kụ ịḅeni inyina mọ, ‘Mị kụ Ọmoogh-we Ẹnaan phọ anyina. Íkiilaan ghan rụmugh Ạmorait phọ, bụen nyina erugh bọ sịphe ade phọ ạbidi nyịidipho.’ Kụ nyina ẹḍogh phọ ạmi ị́naghanan.”

¹¹ Kụ ọokpaany kꞌỌmoogh-we phọ aru ẹmha Ofra kụ ạrol ude zin ạḍiogh, ḍịo aJoas ọlo ọto Abiezer. ẠGidion ọony phọ ọdi odi rạgbe ghan ịbiakpa ẹpe rọgbe ghan bọ ibusi phọ, ọbooghinaan Mịdianait phọ.

¹² Kụ ọokpaany phọ Ọmoogh-we phọ amite egaan esi ọdi kụ ạḅeni mọ, “Ọmoogh-we phọ odi rꞌạna, nạ oye ịikpo, nạ ophelegbe.”

¹³ Kụ ạGidion ạḅeni nyọdi mọ, “Ọde-otu ạmi, eru mạar dị Ọmoogh-we phọ odi rꞌayoor, uḍighi ika kụ oomo phọ ịphen phọ risoroghuom bọ iyoor? Kụ oomo iiḍighi ịiḍaany phọ ọdi edi ẹghen, ịpe ạburude phọ ayoor ọghaaph bọ ụḅeni iyoor kụ rọḅem ghan bọ mọ Ọmoogh-we phọ kụ ụsighe bọ iyoor ẹpe Ijipt ạḍuanam? Kụ nyịidipho Ọmoogh-we phọ múmutonaan iyoor, ụḅogh iyoor ạngo Mịdianait phọ.”

¹⁴ Kụ Ọmoogh-we phọ akiton aphogh nyọdi kụ ạḅeni nyọdi mọ, “Kịmom rꞌịikpo phọ ạna ạphel we Ịzirel ạsighe ḍịghaagh ạMidian phọ. Mịna kụ nyịna útom bọ ḍụghum?”

¹⁵ Kụ ạGidion ạḅeni nyọdi mọ, “Kụ ọlo, Ọmoogh-we, ika kụ ẹdi mị kạpel bọ we phọ Ịzirel? Opolo ọpo ayoor kụ asoorom iboom sịphe eghun phọ ạManase. Mị kụ ọbam sịphe ọkuruḅaka ọde phọ ayoor.”

¹⁶ Kụ Ọmoogh-we phọ ạḅeni nyọdi, “Mị kạrolonaan ni nyịna, kụ nạ ạze oomo ạMidian phọ dịadi oniin oye.”

¹⁷ Kụ ạGidion ạḅeni nyọdi mọ, “Mụghumo mị ạmoogh ni ghụsan esi ạna, pọ uḍeenaan ịmi eḍeenaan dị mị kạsighe alegheriom mọ nạ kụ rạkaaph bọ ni kụ ụḅeni ịmi.

¹⁸ Seseeny ụ́ḍua ghan sịen phọ tụtu mị aḅula aru ạteeny nyịna, ạngo ruunmo ạsighe asereghi risigh ạna.” Kụ ọdi ạḅeni nyọdi mọ, “Mị kạtol li sịen tụtu nạ aḅula.”

¹⁹ Kụ ạGidion ạghi ologhi otu kꞌọdi ạsighe mọony ạtu-ọga rꞌạsikikia dị yist ụ́logh ịlo aḍioph igbogh ịtoom ẹemor ịgbieneen ịbiakpa, ạsighe ạlogh ologhi egunum, ạsighe mooboph phọ ạlogh ologhi aguugh kụ ạsighe amitiom ạngo nyọdi sịphe azin ạḍiogh phọ, aseere atumeriom nyọdi.

²⁰ Kụ ọokpaany phọ kꞌẸnaan ạḅeni nyọdi mọ, “Sịghe ẹnam mọ rꞌạsikikia phọ ạḅamaghi ạnyu aḍighiigh phọ kụ ạsighe mooboph phọ aakuom bịdi.” Kụ ạGidion ạtuugh ịdipho ọḅeni bọ nyọdi aḍighi.

²¹ Kụ ọokpaany phọ kꞌẸnaan ạsighe ịkpara phọ ọdi ạpham bọ ḍịghaagh atiom ẹnam mọ rꞌạsikikia phọ yist ụ́logh bọ, kụ ạnian ẹḍua loor ạnyu aḍighiigh phọ emite ẹmoogh ẹnam mọ rꞌạrikia phọ. Bịn kụ ọokpaany phọ kꞌẸnaan aphe sịphe arisigh phọ ọdi.

²² Kụ ạGidion agbi olegheri mọ ọdi phọ ọokpaany kꞌẸnaan, kụ ạGidion ạḅem rꞌoghiilaan mọ, “Ọkar Ogbogh Ọmoogh-we, nyịidipho mị mạmiin ọokpaany kꞌẸnaan risigh rꞌarisigh.”

²³ Kụ Ọmoogh-we phọ ạḅeni nyọdi mọ, “Ẹepho. Kákiilaan. Nạ rámugh.”

²⁴ Kụ ạGidion ạkananaan Ọmoogh-we enmeny ạrikia sịphe phọ kụ aghol mọ “Ọmoogh-we phọ kụ ẹepho”. Kꞌarodon phọ ạḍien ẹmeera ni ẹpe Ofra, bụo Abiezer kụ ụmoogh.

²⁵ Kụ ịphen phọ reru reten, ḍughul aḍio phọ ạḍiphe kụ Ọmoogh-we phọ ạḅeni Gịdion mọ, “Kịa sịphe ạsinam ọde phọ ạna ạsighe ḍịnon aḍilephiri ạnam ḍịlo mẹman oḍual ạsia, ạghi alhereghi enmeny ạrikia phọ ọde phọ ạna ạkananaan bọ Baal, aḅomoghi igbudu ẹya-eru Asera phọ etuman bọ pạ phọ.

²⁶ Kụ ạkananaan Ọmoogh-we Ẹnaan phọ ạna enmeny ạrikia sịphe ạnyu aḍighiigh phọ, kụ ạsighe sighiigh ạmaar ạde, kụ ạsighe ḍilephiri ạnam mọ ḍịphe emuneniom bọ ịyal phọ, ạphighironom ẹkia oguom ạnian. Sịghe ịpe ịsiphe igbudu ẹya-eru Asera phọ nạ alher bọ kụ ạkpooniom.”

²⁷ ẠGidion ạsighe ḍioph abutelhedom kụ ạtuugh ịpe Ọmoogh-we phọ ạḅeni bọ nyọdi aḍighi. Ịdi eḍighi bọ ọdi rakiilaan ni iboom we eghun phọ ọdi rꞌawe ịsiphe ẹmha phọ, óḍighi ịphen phọ ootaany, kụ ọdi aḍighi ḍughul.

²⁸ Mem dị awe ịsiphe ẹmha phọ ọsuma yogh bọ oḅerenu esoph ạḍiroor, pogh aani, ụmiin dị enmeny ạrikia phọ aBaal molhereghi, igbudu ẹya-eru Asera phọ etuman bọ sịphe phọ moḅomoghi, ḍilephiri ạnam mọ ḍịphe emuneniom bọ ịyal phọ mọsighe oḍighinom ịyaar aghuḍum sịphe enmeny ạrikia phọ ọkan bọ.

²⁹ Kụ oniin apuru nyoniin mọ, “Ạnhian kụ aḍighi bọ ịphen phọ?” Bịdi ụwaaghi ni kụ ọmiin mọ ạGidion ọony phọ aJoas kụ aḍighi bọ ịphen phọ.

³⁰ Kụ awe ịsiphe ẹmha phọ ọḅeni Joas mọ, “Sịghe mọony phọ ạna ạsighe aru dị amugh, ịdi eḍighi bọ dị malhereghi enmeny ạrikia phọ aBaal, ạḅile aḅomoghi igbudu ẹya-eru Asera phọ etuman bọ sịphe phọ.”

³¹ Kụ aJoas apuru oomo ạbuphe ọmeregha bọ okoom nyọdi mọ, “Nyina kụ kẹgbaanaan Baal phọ? Nyina kụ kẹpel nyọdi? Tọrobo ọlo ạgbaanaan nyọdi rẹḅaal bịn moghiigh nyọdi. Eru mạar dị aBaal phọ aru ẹmugh, pọ ịbile dị kụ ạle ghẹlhe phọ. Enmeny ạrikia ọdi kụ ẹdi olhereghi bọ.”

³² Kụ iḍighi kụ emiigh kꞌaḍio phọ ạḍiphe phọ kụ ẹghi, ughol ghan Gịdion mọ aJerubaal. Ẹmhu ịduon phọ rẹḅem ghan mọ, “Ịbile mọ aBaal ạliom nyọdi. Enmeny ạrikia ọdi kụ ẹdi olhereghi bọ.”

³³ Kụ oomo ạMidian phọ rꞌẠmalekait phọ rꞌawe phọ bụphe orugh bọ ẹpe erumuḍio phọ remite ghan bọ ookpomoghan ọḍuaghu ẹpe phọ ọḅeeny Jọdan ophun kụ odoghoḍi rugbogo phọ ạbidi ẹpe Eḍiiny ạJezreel.

³⁴ Kụ uwaloor Ọmoogh-we phọ aḍigh loor ạGidion, kụ ọdi aphula ọkuodu ạmagham we ọto phọ Abiezer omiteghu ọdaph nyọdi.

³⁵ Kụ ọdi arom rụukpaany ạghiomonaan oomo eghun phọ ạManase ạmagh bịdi mọ oru ọdaph nyịno. Kụ arom kẹn rụukpaany ạghiom eghun Ạser rꞌeghun ạZebiulon rꞌeghun ạNaftalai. Kụ bịdi ọghi ọteeny nyọdi.

³⁶ Kụ ạGidion ạḅeni Ẹnaan mọ, “Nạ ụḅem mọ nạ magbiighi amuneni ologhi ạna ọsighe ạmi ọphelom Ịzirel,

³⁷ pọ mị rạsighe suphuugh ẹnam ịdi osiil kamitiom oopho ude ẹpe rọponyon ghan bọ ịbiakpa phọ; eru mạar dị ḍịroor kụ ooto phọ ạtuugh isiileen asuphuugh ẹnam mọ asoorom bịn ude phọ ólho aani, pọ pụruku mị kameeraam ni mọ nạ kụsighe ni ịmi ạpelom Ịzirel.”

³⁸ Ịtuugh ni ịdipho phọ kụ emite. Ọdi aḅon ḍịroor aḅetenu kụ ạghi ạsighe suphuugh ẹnam mọ osiil bọ amiim, kụ ạmuum ooto phọ dị ạḍua loor asuphuugh phọ amite amuza gbạgba.

³⁹ Kụ ạGidion ạḅeni Ẹnaan mọ, “Kạ́le, kụghagham ịmi ologhi; mị ụkaaph mem mọ ạmuen bịn. Seseeny ụwilenaan ịmi mị ụḅile ụsighe suphuugh ẹnam mọ oghul bọ uḍighi upoghom: asuphuugh ẹnam mọ ẹgharaghar kụ ooto asoorom de phọ.”

⁴⁰ Ẹnaan ịtuugh ni ịdipho phọ eḍighi bọ ḍughul aḍio phọ ạḍiphe. Ḍịeri phọ ạḍiroor phọ, asuphuugh ẹnam mọ kụ ịgharaghar, kụ ade phọ ẹḅor esi ooto phọ.