Bụo Ịiruen 5 - Ạḍinya Iigbia

Ạḍuor phọ aDebora rꞌạBarak

¹ Ḍio phọ ạḍiphe aDebora rꞌạBarak ọony phọ Abinoam ụmoor ḍụor dị ẹḅem ghan ịduon mọ,

² “Iboom Ọmoogh-we phọ. Abuḍiemiom mọ oḍiemiom ni Ịzirel. Ịzirel ọsighe ni oomo aloor phọ ạbidi ọngo rꞌophooph ologhi.

³ Ịnaghan, nyina ạbudaam mọ. Iler rụru anyina, ịkpana ạnmuny phọ. Mị kạmooraan ḍụor Ọmoogh-we phọ. Mị kạmoor ḍụor aboom Ọmoogh-we Ẹnaan phọ Ịzirel.

⁴ Ọmoogh-we, mem mọ nạ ạḍua bọ ẹpe Seir aḍia, mem mọ nạ ạḍua bọ ẹpe eelhe phọ Idom amiigh erelhe, ade phọ iphiigha ni, ạke phọ ạgodo, oomo okuaḍio phọ aḍighi ufiri, ạmuum ạtepheghu.

⁵ “Ạraaḅaraph phọ ẹgbo ẹminonom risigh Ọmoogh-we phọ, rꞌaSainai risigh Ọmoogh-we Ẹnaan phọ Ịzirel.

⁶ “Mem mọ aSamgar ọony phọ Anat, mem mọ ạJayel, sịphe aroḅodo phọ oye órelhe ghan, kụ awe lọ rọki erelhe urelhe ghan ịbam areten phọ.

⁷ Rạmha phọ Ịzirel ụwile ni bịn, Debora; Bịdi upokoro ni bịn tụtu nạ aDebora aru bọ, erumom ịdipho onhiin Ịzirel.

⁸ Bịdi ọsaḅar imoom ạrumugh, kụ ẹgham ẹrol sịphe eḍighom ẹmha phọ ạbidi. Kụ ịsuaram rꞌịsoph kụ ịdi ọmiin ogbo inyadi ọonir awe phọ Ịzirel ḍụghum?

⁹ Ologhi ạmi odi ghan esi ạbuo ịtooghi phọ Ịzirel, bụphe ọḅogh bọ siloor ạbidi ọngo we phọ. Iboom Ọmoogh-we phọ.

¹⁰ “Ịkaaph, nyina ạbuphe rekiilom bọ ịphalaḅaal ịnam adool phọ, nyina ạbuphe ẹrolom bọ sịgada ịiruen phọ rꞌanyina ạbuphe retelhe bọ eten phọ.

¹¹ Ịnaghan ẹḍogh iitia phọ ẹpe asighuḍia phọ. Bụphe ọphel bọ ọsighe rọkaaph ịlo ọkpar opu Ọmoogh-we phọ, ịpe ọdi aḍighi yogh bọ bụphe orugh bọ ẹpe ịbam ạramha phọ edi bọ sịphe Ịzirel. “Kụ awe Ọmoogh-we phọ oḅula sịphe eḍighom ẹmha phọ.

¹² Sụma, sụma, Debora! Sụma, sụma, ạlogh ḍụor. Ḅetenu, Bạrak, ọony phọ Abinoam, aḍiemiom we phọ bụphe nạ asiphi bọ ẹpe ẹgham mọ.

¹³ Kụ bụphe oḍuom bọ ologhi phọ osoroghu ọḅaran rꞌabuḍiemiom mọ. Awe Ọmoogh-we phọ uru ni ọteeny nyọdi, ọnyaaghian eeghi ẹgham.

¹⁴ Azin Ạmalek ạḍua kꞌIfraim kụ amite, kụ ọtu bọ rọdaph ghan nyịna Bẹnjamin ọman. Bụo ịtooghi phọ ụḍua Makir kụ omite. Bụo ịgeom mọ ụḍua kꞌạZebiulon kụ omite.

¹⁵ Ịkpana ạnmuny kꞌỊsaka odianaan rꞌaDebora. Ịdipho Ịsaka ạrol bọ kụ ịdi ạBarak ạrol. Urom nyọdi mọ arelhe owol ạghi ẹpe ade phọ eḍiinyan bọ. Awe eghun phọ aRuben ọtuan ịlo oḍighi odia rọotughian ghan.

¹⁶ Esi ika kụ ẹdi nạ ạtu bọ arugh sịphe oghoony iyool-ịga phọ? Ịlo ọnaghanam emoghi ịga phọ ạna ḍụghum? Awe eghun phọ aRuben ọtuan ịlo oḍighi odia rọotughian ghan.

¹⁷ ẠGad atugh ẹpe ẹḅeenyom ạJodan; Kụ esi ika kụ ẹdi ạDan odi bọ ologhi arughuugh phọ? Ạser odi ghan ẹpe esiḍia ogbogh ọphiiny phọ, kụ atugh riisi dị enamian ọgbal ọphiiny phọ.

¹⁸ Eghun ạZebiulon, awe dị ọḅogh ghuḍum ạbidi ọngo ḍuugh; ạNaftalai kẹn, ẹpe erugh ẹgham mọ.

¹⁹ “Ẹpe Taanak, ẹpe matuman ọodu phọ aMegido, ạbudaam mọ ọghi ozuom bịdi ẹgham. Ạraalha aKenan rꞌạbidi ee ẹgham, kụ ọlo rꞌasilva ụ́pam ụ́ḍuanam.

²⁰ Ịikpo phọ ịpe edi bọ ẹpe ạnyu ạke kụ ee. Ạraanaan phọ ẹdaph ghan reten phọ ạbidi kụ eenom ghan rꞌaSisera.

²¹ Ọphiiny ạKison aḅoor ri bịdi bịn ạsighiogh, amugbaany ạmuum mọ Ọphiiny ạKison. Uwaloor ạmi rạazeghiom ghan rꞌịikpo.

²² Aruwol ịnam-ạsu phọ ewunughian loor opeleghu phọ ịnam-ạsu phọ epeleghu bọ rẹki rꞌịikpo.

²³ “Kụ ọokpaany kꞌỌmoogh-we phọ ạḅeni mọ, ‘Itulughian ẹrolonaan Meroz, itulughian ẹrolonaan bụphe orugh bọ ẹpe phọ, ịdi eḍighi bọ bịdi ụ́ki esi Ọmoogh-we phọ mọ ọloghonaan nyọdi ḍịghaagh, mọ ọloghonaan nyọdi ḍịghaagh eenom we ịikpo phọ.’

²⁴ “Ạḍiseph ḍịa ạJayel ạnir phọ aHeber ọlo aKen phọ kụ ipu ḍịa oomo ạnmariir dị orugh sịphe arugbogo phọ.

²⁵ ASisera apuru mụum kụ ạJayel ạngo nyọdi mạmaam ạnam. Ạnir phọ aruomonaan nyọdi elho loor ịma eeko.

²⁶ ẠJayel ạpham ọkpoloneen oreeny ḍiniin ạḍighaagh kụ ạsighe okuron oye arukumuan ḍịeri phọ ạḍighaagh phọ. Ọdi akar Sisera ẹmhu kụ aḅomoghi ọkeeghi phọ kụ ạkan aphugheghi sịphe ẹmhu phọ ọdi kụ ạsighe ạkan elhor ọdi ạkpaariom.

²⁷ Kụ oye phọ ạghororo bịn akpuḍughian ạwophian sịphe aruwol ạnir phọ, sịphe aruwol phọ ọdi oye phọ aḅololo bịn amugh.

²⁸ “Onhiin phọ aSisera akiton loor eghuugh-ookuugh aphogh, aghughuron ọsighe ookuugh, kụ ạlho mọ, ‘Uḍighi ika kụ oghuugh-ude phọ ọdi rabia bọ ịduon origheel? Uḍighi ika kụ ariigida oghuugh-ude phọ ọdi reebinya bọ ịduon?’

²⁹ Kụ arisina ạnmanyaan bụo ọsu bọ ologhi ọphagharanaan nyọdi mọ ii, kụ ọdi ạḅenian loor ọdi ạḅile ạḅenian,

³⁰ ‘Bịdi róogborion, bịdi ródian rạraar phọ bịdi uwum bọ ḍụghum? — oye ye eniin esina, ịyal arisina ịlo oniin oye, ilooneen ạrusuoma ịlo aSisera, ilooneen ạrusuoma phọ ọkuami bọ olo ịyal phọ aruukuna phọ ịlo ọsighe ọghoroghiom orum ạmi.’

³¹ “Ọmoogh-we, guugulemi oomo ạbuphe ọlogh bọ nyịna ḍien. Ḍighi ịdi oomo ạbuphe ọphomoghian bọ nyịna kọmu ịdipho erumuḍio mem lọ ọdi rạkimom rꞌịnyaam ọdi.” Kụ ade phọ ephooghian inyadi ạsia.