Bụo Ịiruen 4 - Ạḍinya Iigbia

ADebora rꞌạBarak

¹ Ehud romugh reten bịn awe Ịzirel ọḅile kẹn oḍighi ịkaraph risigh Ọmoogh-we phọ.

² Kụ Ọmoogh-we phọ ạsighe bịdi aalha Jabin ọnyo aKenan dị ạda ẹmha Hazor. Uw-ẹmhu awe ẹgham mọ ọdi ughol mọ aSisera dị arugh ẹpe Haroset Ha Goyim.

³ AJabin ạmoogh esugha okuron arughuugh-ude dị ọlemom rukuron. Ọdi aphoghom we phọ Ịzirel rꞌegbagara ekpom ḅịle rꞌịkpiloghom esi ịyaldi ạsia. Kụ awe phọ Ịzirel omoghiom Ọmoogh-we phọ mọ ạphel bụno.

⁴ Kụ aDebora oyil-ạnir, ạnir phọ aLapidot, kụ oogboom ịiruen awe Ịzirel mem mọ ạmuphe.

⁵ Ạnir phọ ạrol ghan ẹpe zin alhe aDebora ịbaay aRama rꞌạBetel ẹpe aroogbolom mọ Ifraim. Kụ awe phọ Ịzirel ụghi ghan kꞌọdi kụ aagboonaan ịiruen bịdi.

⁶ Ạnir phọ arom mọ ọmagh Bạrak ọony phọ Abinoam ọlo aKedes ẹpe Nạftalai, kụ ạḅeni nyọdi mọ, “Ọmoogh-we phọ Ẹnaan phọ Ịzirel ạḅem mọ, ‘Kịa aakpomoghi we phọ ạna bịdi ookpomoghan ẹpe Eegum aTabor. Sịghe ḍioph ọonir awe eghun ạNaftalai rꞌeghun ạZebiulon ạghimom.

⁷ Mị kạsighe ni Sisera uwo ẹmhu ạbuo ẹgham mọ aJabin atu izuan inyina ẹpe Ọphiiny ạKison. Mị mạḅogh rughuugh-ude phọ ọdi rꞌawe ẹgham mọ ọdi ạngo nyịna.’”

⁸ Kụ ạBarak ạḅeni ạnir phọ mọ, “Eru mạar dị nạ kụdaph ni ịmi ạki aani, pọ mị kạki ni. Kụ eru mạar dị nạ ịmi rụ́daph kạghi, pọ mị rạ́ki.”

⁹ Kụ aDebora ạḅem mọ, “Mị kạdaph ni nyịna ạki; kụ ọlo arughuenian igbogh phọ ạna ílho ẹpe eten phọ nạ arelhe bọ rạki, ịdi eḍighi bọ Ọmoogh-we phọ kaboola Sisera ḍịghaagh ạnir-ephoph.” Kụ aDebora aḅetenu ạdaph Bạrak ạghi Kedes.

¹⁰ Kụ ạBarak aakpomoghi eghun ạZebiulon rꞌeghun ạNaftalai ọghi Kedes. Ḍioph ọonir awe ọdaph ịgbaranuom aruwol phọ ọdi ọghi; kụ aDebora aḅetenu ạdaph Bạrak ạghi aani.

¹¹ Mem mọ ạmuen phọ aHeber ọlo aKen phọ ạlogh ogbogo ọdi asomori ẹpe Kedes atumeriom oreeny ạḍiogh phọ aZaananim. Ọdi mạgbatanaan bụeri phọ awe phọ aKen, bụphe ọkuruḅaka aHobab ọnyogo phọ aMozis.

¹² Mem dị ọḅeni bọ nyọdi mọ ạBarak ọony phọ Abinoam maten ạki ẹpe Eegum aTabor,

¹³ aSisera aakpomoghi oomo arughuugh phọ ọdi, esugha okuron arughuugh dị ọlemom rukuron, rꞌoomo awe phọ ạbuphe rꞌọdi ọrol bọ, mọ ọḍua sịphe Haroset Ha Goyim ọghi osi ẹpe Ọphiiny ạKison.

¹⁴ Kụ aDebora ạḅeni Bạrak mọ, “Ụgua, ḅetenu. Rodon kụ ẹdi Ọmoogh-we phọ mạḅogh Sisera ạngo nyịna. Ọdi kụ nyịna káḍiemiom ḍụghum?” Kụ ạBarak ạḍua ẹpe Eegum aTabor rꞌiḍioph ọonir awe phọ ọdaph bọ nyọdi.

¹⁵ Kụ Ọmoogh-we phọ agborion ruwol aSisera rꞌoomo arughuugh-ude phọ ọdi rꞌoomo aḍita awe ẹgham mọ ọdi esomanan ạBarak, kụ aSisera asoor sịphe oghuugh-ude phọ ọdi aghiil asuma.

¹⁶ ẠBarak aphorogh rughuugh-ude phọ rꞌawe ẹgham mọ aSisera asiemi ẹpe Haroset Ha Goyim, kụ oomo awe ẹgham mọ aSisera omeel oḍighanaan ẹdume elhool ẹgham mọ ạBarak. Kụ ọze bịdi ọmadan, rꞌoniin oye úsugheeny.

¹⁷ ASisera aghiil owol ade ạghi aḍigh ogbogo ạJayel ạnir aHeber ọlo aKen ịdi eḍighi bọ ạmuḅoph odianaan Ọdaam aJabin aHazor rꞌọto aHeber ọlo aKen phọ.

¹⁸ Kụ ạJayel amite ạghi azuan Sisera kụ ạḅeni nyọdi mọ, “Tue aḍigh otu, ọde-otu ạmi. Tue aḍigh ẹphen mị odi bọ. Kákiilaan.” Kụ ọdi aḍigh ạghi ạteeny ạnir phọ sịphe ogbogo phọ ọdi. Kụ ạnir phọ ạsighe ukpe azu aakpereghiom nyọdi.

¹⁹ Kụ ọdi ạḅeni ạnir phọ mọ, “Seseeny, ụngo ịmi mụum mị ụpughol. Ạmuum rụphu ịmi.” Kụ ạnir phọ aḅuton koto ạmamaam ạnam ạngo nyọdi mọ ạphughol. Kụ ạḅile aakpereghi nyọdi.

²⁰ Kụ ọdi ạḅeni ạnir phọ mọ, “Mẹera sịphe ọnhu-aḍibuo otu phọ, kụ eru mạar dị oye aru kụ apuru nyịna mọ, ‘Oye atu ni sịen?’ pọ pạgharanaan mọ, ‘Eeye’.”

²¹ ASisera ạmina ni dị aloor medugh, kụ ạJayel ạnir phọ aHeber ạghi ạsighe okuruon rꞌọkpoloneeny oreeny, kụ ạsophoghu ạghi ạteeny nyọdi, kụ ạkan ọgbal ẹmhu phọ ọdi ạkpaariom ude bịn ọdi amugh.

²² Mem dị ạBarak aru bọ ọwa Sisera, ạJayel amite ạghi azuan Bạrak kụ ạḅeni nyọdi mọ, “Tue, mị kaḍeenaan nyịna oye phọ nạ rạwa ghan bọ.” Kụ ạBarak ạdaph ạghi aḍigh ogbogo phọ ạJayel, kụ aSisera ạmina dị mamugh pạ ude phọ rꞌoḍugh phọ ọkan bọ elhor phọ ọdi kụ ọkpaariom de phọ.

²³ Ḍio phọ ạḍiphe kụ ẹdi Ẹnaan esooromi bọ Jabin ọdaam mọ aKenan risigh awe phọ Ịzirel.

²⁴ Kụ ạḍighaagh awe phọ Ịzirel ẹkpar ewinighiom, tụtu bịdi ophiemi nyọdi.