Bụo Ịiruen 2 - Ạḍinya Iigbia

Ọokpaany kꞌỌmoogh-we phọ ẹpe Bokim

¹ Ọokpaany kꞌỌmoogh-we phọ ạḍua ni Gịlgal ạghi ẹpe Bokim kụ ạḅeni we Ịzirel mọ, “Mị kụ ịsighe bọ inyina amitiom ẹpe Ijipt, ạsighe aru asiemi sịen ade phọ ạḍien mị aghunya bọ ạngo bụrude phọ anyina, kụ mị ạḅeni bọ mọ mị kạ́ka ịyo phọ mị rꞌanyina eghiran bọ.

² Nyina rꞌạbuen orugh bọ sịen ade phọ íkiran ghan ịyo. Ilereghi renmeny ạrikia phọ ạbidi. Kụ ọlo nyina ẹḍogh phọ ạmi ị́naghanan. Nyina meḍighi ịdi mị ụ́ḅem.

³ Kụ nyịidipho mị rịḅeni ghan inyina mọ mị káporogh bịdi ọḍua, ịduon nyina retu bọ ni. Bịdi koḍighi iitoor esi anyina, kụ ạrumugh phọ ạbidi eḍighi ịika dị idianaan inyina.”

⁴ Ọokpaany phọ kꞌỌmoogh-we phọ rọghaaph bọ oomo phọ ịphen rọḅeni bịdi kụ awe phọ Ịzirel owagharan emoghi.

⁵ Ịduon kụ iḍighi kụ bịdi oghol ḍien esi phọ ịsiphe phọ mọ aBokim; kụ ọphighironaan ẹkia sịphe phọ ọngo Ọmoogh-we phọ.

Aḍuugh phọ aJosua

⁶ Kụ aJosua ạḅeni we phọ Ịzirel mọ ọḍuaghu kụ bịdi onyeene yogh tọrobo oye ạghi ophin ẹkpigh ade ḍịodi.

⁷ Awe phọ Ịzirel ukumu ni ọngo Ọmoogh-we phọ oomo asiḍughul-otu aghuḍum mọ aJosua rꞌoomo asiḍughul-otu ikumoor awe phọ ọkpo bọ opu Josua, bụphe ọmiin bọ oomo iiḍighi aruugu phọ Ọmoogh-we phọ aḍighi bọ ạngo Ịzirel.

⁸ Kụ aJosua ọony phọ ạNon otelhedom mọ Ọmoogh-we phọ amugh. Ọdi ạman bọ oniin okuron rꞌiḍioph ạsia.

⁹ Kụ bịdi ọsighe nyọdi oḍi sịphe ọku ade abin ẹmoogh phọ ẹpe edi bọ ẹpe Timnat Seraa ẹpe aroogbolom mọ Ifraim ẹpe ḍịghaagh ephunom Eegum aGaas.

¹⁰ Oomo oghiil phọ ọpo umugh ni; kụ oghiil dị atum sịphe uwula ni Ọmoogh-we phọ rꞌiiḍighi phọ ịpe ọdi aḍighi bọ ạngo Ịzirel.

Awe phọ Ịzirel okel Ọmoogh-we phọ

¹¹ Kụ awe phọ Ịzirel oḍighi yogh ịdi ị́nighe risigh Ọmoogh-we phọ ooseeny ghan rụmugh aBaal.

¹² Bịdi ughel Ọmoogh-we Ẹnaan ạburude phọ ạbidi ọpo ạsighe bọ bịdi ẹpe eelhe phọ Ijipt ạḍuanam, kụ omiigh ọoḅereghi ịnon ạrumugh, rụmugh awe phọ ạbuphe orugh bọ otuman bịdi kụ rokpuḍian ghan bịdi. Kụ ẹghagh ologhi Ọmoogh-we phọ.

¹³ Bịdi oghel Ọmoogh-we phọ kụ rooseeny ghan iiruen aruru aBaal rꞌAstarte.

¹⁴ Kụ Ọmoogh-we phọ ạghagham ologhi we Ịzirel iboom, kụ ạḅogh bịdi ạngo bụo ịpueghiom, kụ bịdi ozirion ghan rạraar ạbidi ọsighiogh. Kụ ạsighe bịdi aalha bụo ạmulogh-ḍien phọ ạbidi orugh bọ okoom bịdi, tụtu eḍighi ịdi bịdi útue mun ụ́merenyan bụo ạmulogh-ḍien ạbidi.

¹⁵ Tọrobo ekpisi lọ bịdi rọki, ạḍighaagh Ọmoogh-we phọ eḅiririom ni bịdi loor esi ịkaraph phọ ạbidi, loor esi dị Ọmoogh-we phọ mạphur ri bịdi rụru rꞌịdipho Ọmoogh-we phọ aghol bọ ẹmhu ạbidi kụ aghunya. Kụ bịdi ọrol dọl dị ịlo oḍighi úlegheri.

¹⁶ Kụ Ọmoogh-we phọ amitiom bụo ịiruen dị ọphel we phọ Ịzirel ọsighe esi ạbuo igborion phọ.

¹⁷ Kụ bịdi ụ́naghanan kẹn ni bụo ịiruen phọ ạbidi. Kụ bịdi oyeela yogh rọdaph ghan ịnon ạrumugh, okpuḍian rọoḅereghi. Bịdi ọwile ọdaph areten phọ ịpe ạburude phọ ạbidi orelhe bọ, bụphe ọnaghanam bọ iilogh Ọmoogh-we phọ. Bịdi ụ́daph ịpe phọ kụ roḍighi.

¹⁸ Tọrobo amem lọ Ọmoogh-we phọ ạmaaghi bụo ịiruen ạngo bịdi, Ọmoogh-we phọ rạtolonaan ghan ni bụo ịiruen phọ. Oomo asiḍughul-otu ạbuo ịiruen phọ, ọdi rạpel ghan ni bịdi kạsighe esi ạbumulogh-ḍien phọ ạbidi. Kụ etir Ọmoogh-we phọ ọnma ạbidi ighirigiir loor ịḅiphighu rꞌịminimiin phọ rọkpiloghom bọ bịdi.

¹⁹ Kụ tọrobo amem lọ oye ịiruen phọ amugh bịn bịdi mokiton roḍighi yogh ọdorodo dị epu ịpe ạburude phọ ạbidi. Bịdi ụ́bile ẹkaraph eḍighinom mọ ạbidi rꞌoḅom ẹmhu phọ ạbidi.

²⁰ Pọ kụ amem dị Ọmoogh-we phọ ạghagham we Ịzirel ologhi, kụ ạḅem ghan mọ, “Awe phọ ạbuen mọka ịyo phọ mị aghire bọ bụrude phọ ạbidi, kụ ụ́naghanan ẹḍogh phọ ạmi.

²¹ Kụ iḍighi emiigh nyịidipho ẹghiom risigh mị káporogh mun rạmha phọ ịpe aJosua ạwile bọ úporogh bọ kụ agbi bọ omugh.

²² Mị kạsighe rạmha phọ ịpe kụ ạdeghom Ịzirel apogh mụghumo bịdi kọsighe sịphe kụ ogonaam siloor ạbidi kụ ọdaph reten phọ Ọmoogh-we phọ kụ otelhe ghan ịdipho ạburude phọ ạbidi, mụghumo kọ́daph.”

²³ Kụ Ọmoogh-we phọ ạwile rạmha phọ ịpe phọ óphorogh, kụ bịdi úporogh ghạlamo ịsien aJosua mamugh bọ ni eten.