Bụo Ịiruen 12 - Ạḍinya Iigbia

AJefta rꞌawe eghun Ifraim

¹ Awe eghun Ifraim uukolobian ịlo ẹgham; kụ bịdi ọghi ọḅeeny Jọdan ophun, ọghi osi Zafon kụ opuru Jefta mọ, “Uḍighi ika kụ nạ ạḅeeny bọ rạki eenom ẹgham rꞌAmonait phọ kụ nạ iyoor ụ́magh bọ ọdaph aani nyịna ọghi? Pọ yoor kọsu otu phọ ọphon rꞌẹmhu ạna!”

² Kụ aJefta ạḅeni bịdi mọ, “Tọ mị rꞌawe phọ ạmi ụmoogh ni iboom ịikonoghian loor ẹmhu Amonait phọ. Mị ụmagh ni inyina kụ nyina ítu ị́phel ọtagharan ạmi esi ạbidi.

³ Kụ mị ạmiin bọ mọ nyina rétu ọphel ạmi kụ mị aghel ghuḍum mọ ạmi kụ ạḅeeny ọghi eeghian Amonait phọ, kụ Ọmoogh-we phọ ạsighe bịdi ạlogh ḍịghaagh ạmi. Esi ika kụ ẹdi nyina ẹtu bọ eru kꞌạmi rodon? Nyina iru ozuom ạmi elephiri ḍụghum?”

⁴ Kụ aJefta aakpomoghi oomo awe phọ ạGiliad kụ eeghian we Ifraim kụ ọkpar opu bịdi. (Awe Ifraim ụḅem ghan mọ, “Nyina ạbuo ạGiliad phọ orugh ghan bọ sịen ogbo arere phọ Ifraim rꞌạManase, awe dị osumughu kꞌIfraim.”)

⁵ Esi oḍighi ịdi awe Ifraim kósumughu mun, bụo ạGiliad phọ ụsighiogh oomo ariisi phọ ịpe rọḍua ghan bọ kụ kọḅeeny Ọphiiny ạJodan. Kụ tọro amem lọ ọlo kꞌIfraim ọnyo-ạbalam aru rạwa ọḅeeny lọ rasuma, kụ awe phọ ạGiliad opuru nyọdi mọ, “Nạ ọlo kꞌIfraim ni?” Kụ ọdi ạḅem mọ, “Eeye,”

⁶ pọ bịdi ọḅeni nyọdi mọ, “Ḅẹm ịduon nyịidipho mọ ‘Shibolet’.” Kụ ọlo útue ukol igey kụ ạḅem ghụn mọ “Sibolet”, bịn osiph ni oye phọ ọpo okiigh ẹpe ariisi phọ rọḍua ghan bọ kụ kọḅeeny Ọphiiny ạJodan. Mem mọ ọpo phọ inyadi rꞌịyal ọonir awe Ifraim kụ ẹdi ọze.

⁷ AJefta ọlo ạGiliad ạda bọ Ịzirel odiiny ạsia kụ amugh, kụ oḍi nyọdi eniin ẹmha ạbuo ạGiliad phọ.

Ibzan, Elon rꞌAbdon

⁸ AJefta roten kụ ẹghi ẹteeny Ibzan ọlo ạBetilihem kụ ạda Ịzirel.

⁹ Kụ ọdi ạmoogh ịraardi alephiri ạnmuny rꞌịraardi ạnmanyaan. Kụ ạsighe nmạnyaan phọ ọdi ạnughenyan yogh ẹpe ịnon areelhe, kụ ạghi ạsighe ịraardi ạnmanyaan ịnon areelhe kụ aruom nmụny phọ ọdi mọ ophinogh. Ibzan aḍiemiom Ịzirel esi oḍual ạsia.

¹⁰ Ibzan amugh kụ oḍi nyọdi ẹpe Bẹtilihem.

¹¹ Ibzan roten kụ ẹghi ẹteeny Elon ọlo ạZebiulon kụ ạda Ịzirel. Ọdi ạda bọ Ịzirel ḍioph ạsia.

¹² Kụ Elon ọlo ạZebiulon phọ amugh, kụ oḍi nyọdi ẹpe Aizalon ẹmha ạZebiulon.

¹³ Elon roten kụ ẹghi ẹteeny Abdon ọony phọ ạHilel ọlo aPiraton kụ ạda Ịzirel.

¹⁴ Ọdi ạmoogh inyadi alephiri ạnmuny rꞌịraardi ạnmuny-oko dị oḍiku ghan oḍualdi ịnam adool. Ọdi ạda bọ Ịzirel ọphaanya ạsia.

¹⁵ Kụ Abdon ọony phọ ạHilel ọlo aPiraton phọ amugh, kụ oḍi nyọdi ẹpe Piraton de Ifraim ẹpe aroogbolom ạbuo Ạmalekait phọ.