Bụo Ịiruen 1 - Ạḍinya Iigbia

Eghun aJuda rꞌeghun ạSimion osiph Adoni Bezek

¹ AJosua romugh bọ kụ awe Ịzirel opuru Ọmoogh-we phọ mọ, “Ẹghen sịphe arughunughun phọ ayoor kụ kuḍiemiom iyoor azuom we phọ aKenan?”

² Kụ Ọmoogh-we phọ ạḅem mọ, “Eghun aJuda kụ kiḍiemiom bọ inyina. Bịdi kụ bụdi mị rạngo ẹmoogh ade phọ.”

³ Awe phọ aJuda ụḅeni we phọ ạSimion mọ, “Ịdaph iyoor ọghi ẹpe ade phọ ạḍiphe imeelom bọ iyoor ọḅophoghan ozuom ẹgham bụo aKenan phọ. Kụ yoor ịdaph aani inyina ọghi ẹpe ade phọ ạḍiphe imeelom bọ inyina.”

⁴ Kụ eghun phọ aJuda rꞌeghun phọ ạSimion ọḅophoghan ọghi ẹgham, kụ Ọmoogh-we phọ ạsighe bụo aKenanait phọ rꞌạbuo ạPerezait phọ ạlogh ḍịghaagh ạbidi kụ bịdi ọkpar opu we dị ọman ḍioph ọonir ẹpe Bezek.

⁵ Kụ bịdi ọmiin Adoni Bezek ẹpe Bezek kụ eenaan nyọdi.

⁶ Adoni Bezek akiil rasuma kụ bịdi osiph nyọdi, kụ oogbo sụnugh ạraghaagh rꞌigbogh ạsunugh aruwol phọ ọdi.

⁷ Kụ Adoni Bezek ạḅem mọ, “Oḍualdi ạbudaam dị oogbo sụnugh ạraghaagh ạbidi rꞌigbogh ạsunugh aruwol ạbidi ụson ghan ni ịpherepe eeḍian ịdaabili ạmi. Ịpe mị aḍighi bọ kụ ịdi Ẹnaan mẹsighe ẹtuugh rịkpiom ịmi.” Kụ bịdi ọpham nyọdi ọghi osiom Jeruselem, kụ ọdi amugh ẹpe.

Eghun phọ aJuda ozuoghom Jeruselem rꞌạHebron

⁸ Kụ awe phọ aJuda uzuom ni ẹgham we aJeruselem, kụ ọsighe ẹmha phọ ọmoogh. Bịdi rọze we phọ kụ ọsu ẹmha phọ nịan.

⁹ Ịphen reru reten kụ bịdi ọghi oruphiom ẹgham Kenan phọ, bụphe orugh bọ ẹpe ạraaḅaraph phọ, ẹpe ạḍigharaghar ade phọ rꞌẹpe eelhe aNegeb, ạga esoorom mọ.

¹⁰ Kụ bịdi ọghi ozuom ẹgham Kenan phọ bụphe orugh bọ ẹpe Hẹbron (ḍịḅel aḍien ạHebron phọ ughol ghan mọ ạKiriat Arba) kụ bịdi ọkpar opu we aropolo aSesai rꞌAhiman rꞌaTalmai.

Ọtniel ạka egbogh ẹmha aDebir

¹¹ Awe phọ aJuda ụḅile ọḍua sịphe ọghi oruphiom ẹgham bụphe orugh bọ ẹpe Debir (mem mọ ọpo ughol ghan mọ ạKiriat Sefer).

¹² Oniin ọnyo ạbidi dị oghol mọ ạKeleb ạḅem mọ, “Mị kạnughenyan Aksa ọnyani ạmi tọrobo oye lọ ạghi azuom ẹgham Kịriat Sefer kụ ạkpar apu ạarom bịdi ẹmha phọ.”

¹³ Kụ Ọtniel ọony aKenaz ọbam umor ạKeleb ạghi ạarom bịdi ạsighe ạmoogh; kụ ạKeleb ạsighe Aksa ọnyani phọ ọdi ạngo kụ ọdi aphin.

¹⁴ Ḍio phọ apinien phọ kụ Ọtniel ạkpaariom nyọdi mọ ạghi ạlom ọde phọ ọdi de oḅeph ozo. Mem dị ọnyani phọ asoor pạ ạnyu ẹnam adool phọ ọdi, kụ ạKeleb apuru nyọdi mọ, “Eeghe? Ụga ni.”

¹⁵ Kụ ọdi ạḅeni ọde phọ ọdi mọ, “Usu ịmi ooḅi ọghor. Nạ mụngo bọ ịmi ḍịgharaghar ade phọ, ḅịle ụngoom ịmi iiḍiph ẹpe phọ.” Kụ ạKeleb ạngo Aksa iiḍiph phọ ịpe edi bọ ẹpe ạnyu phọ rꞌẹphen esoorom mọ.

Ạramha phọ ịpe eghun aJuda rꞌeghun ạBenjamin oogulemi bọ

¹⁶ Awe ạbuo ẹemara ọyogo aMozis ọnyo aKenait ụdaph ni we phọ aJuda, ọḍua Jeriko ẹmha areelhe phọ kụ ọghi osi ẹpe ẹdala phọ aJuda ẹpe edi bọ ẹpe esoorom Arad, kụ bịdi rꞌawe phọ orugh ẹpe.

¹⁷ Awe aJuda rꞌawe ạSimion abumor phọ ạbidi ụḅophoghan ni ọkpar opu we aKenan, dị orugh ẹpe Zefat. Bịdi uphiemi ni ẹmha phọ ọmadan, kụ oghol mọ aHoma.

¹⁸ Kụ aJuda ạkpar apu Gaza, ạsighenom Askelon rꞌẸkron rꞌịbam ạramha phọ ịpe ekitonom bọ bịdi.

¹⁹ Ọmoogh-we phọ ạloghonaan ni ḍịghaagh we phọ aJuda dị ophorogh bụphe orugh bọ ẹpe ạraaḅaraph phọ, kụ ọsighe ọmoogh. Kụ útue uporogh bụphe orugh bọ ẹpe ạḍiyaghaghaan ade phọ, ịdi eḍighi bọ bịdi ụmoogh rughuugh-ẹgham dị ọlemom rukuron.

²⁰ Ịdipho aMozis ạḅem bọ, Hẹbron ụngo Kẹleb, kụ ọdi aphorogh ịraar aropolo ạnmuny phọ Anak dị ọrol sịphe ẹmha phọ.

²¹ Kụ ọlo awe phọ ạBenjamin úporogh Jebusait phọ orugh bọ ẹpe Jeruselem. Awe ạBenjamin rꞌạbidi otughan ni ẹpe Jeruselem kꞌarodon.

Eghun phọ Ifraim rꞌeghun phọ ạManase oogulemi Bẹtel

^22-23 Arughunughun Ifraim rꞌạManase ụghi ni oruphiom ẹgham Bẹtel, mem mọ ọpo phọ ughol ghan mọ aLuz. Ọmoogh-we phọ ạloghonaan ni bịdi ḍịghaagh. Kụ bịdi orom we mọ oḅiligha Bẹtel.

²⁴ Rosi ẹmha phọ kụ bịdi ọmiin oye dị ramite kụ ọḅeni mọ, “Seseeny, uḍeenaan ịdi koḍigh ẹmha phọ. Yoor nyịna ịyaar kóḍighi.”

²⁵ Kụ ọdi aḍeenaan. Pọ kụ amem dị arughunughun Ifraim rꞌạBenjamin ọze oomo awe ẹmha phọ, kụ osugheeny oye phọ aḍeenaan bọ bịdi eten phọ. Bịdi oye phọ rꞌọto ọdi ịyaar úḍighi.

²⁶ Ịphen reten kụ oye phọ ạghi eelhe ạHitait amitiom ẹmha kụ aghol ḍien ẹmha phọ mọ aLuz. Ḍịen phọ kụ aḍien ẹmha phọ kꞌarodon.

Awe dị ạbuo Ịzirel úporogh mọ ọḍuaghu rạmha ạbidi

²⁷ Awe phọ ạManase úporogh bụphe orugh bọ rạmha ạBet Sạn, Taanak, Dor, Ibleam, Megido rꞌịbam ạramha phọ eko bọ ekitonom rạmha phọ ịphen. AKenanait phọ otugh ghan ni sịphe phọ.

²⁸ Iru ni ẹteeny mem dị awe phọ Ịzirel ọmoogh ịnyaam kụ ọsighe Kenan phọ okumunaan ghan bịdi rukumuan, kụ úporogh ghan bọ umitiom.

²⁹ Awe phọ Ifraim úporogh ghan bọ umitiom Kenan phọ orugh bọ ẹpe Gezer. Kụ iḍighi kụ aKenanait phọ rꞌạbidi otughan ni ẹpe kꞌarodon.

³⁰ Awe phọ ạZebiulon úporogh bụphe orughogh bọ rạmha aKitron rꞌạNahalel. Kụ iḍighi kụ aKenanait phọ otughan ni rꞌạbidi sịphe ẹmha phọ; kụ awe phọ ạZebiulon ụkpaariom ni bịdi okumunaan ghan ạbuno rukumuan.

³¹ Awe phọ Ạser úporogh ghan bọ umitiom bụphe orughogh bọ rạmha Ako, Saidon, Ahlab, Akzib, Helba, Afek rꞌaRehob.

³² Bịdi urughan ni rꞌaKenanait phọ sịphe ade phọ, ịdi eḍighi bọ úporogh ghan bọ umitiom.

³³ Awe phọ ạNaftalai úporogh Kenan phọ orugh bọ ẹpe Bẹt Semes rꞌạBet Anat. Awe phọ ạNaftalai ụkpaariom ni bịdi okumunaan ghan bụno rukumuan kụ úporogh ghan bọ umitiom.

³⁴ Ạmorait phọ ụkpaariom ni we phọ ạDan ọḍua ọsiiny ẹpe aroogbolom mọ, úmeera mọ bịdi oru ẹphen ade phọ esoorom bọ.

³⁵ Ạmorait phọ urugh ghan ni rạmha Aizalon rꞌaSaalbim rꞌEegum aHeres, kụ eghun phọ Ifraim rꞌeghun phọ ạManase ụkpaariom ni bịdi okumunaan ghan bịdi rukumuan.

³⁶ Geediidi, ọku ade ọlo Ạmorait phọ ạḍua ạga ephunom ạSela ạghi ạteeny Eḍighom Akrabim kụ asi eelhe aroogbolom mọ.