Bụo aRom 8 - Ạḍinya Iigbia

Aghuḍum mọ Uwaloor Iigbia phọ rạngo bọ we

¹ Loor ịphen phọ, apum nyịidipho ólhoonaan mun bụphe mọḅophoghan bọ Jịzos Kraist,

² ịdi eḍighi bọ ologh Uwaloor phọ rạngo ghan bọ ghuḍum mọ bụphe mọḅophoghan bọ Jịzos Kraist mụphel ịmi ạsighe sịphe ologh ịkaraph rꞌaḍuugh phọ.

³ Ịpe Ologh phọ aMozis ọ́moogh bọ ịnyaam oḍighi phọ loor ịgbagharan ịkaraph ạroozo phọ oye, Ẹnaan kụ iḍighi. Ọdi ạsighe Mọony phọ ọdi ạghighemi ḍịkaraph aḍimite phọ ayira kụ ạsighe bọ aru, ọbo asoph ịiruen phọ aphume ịkaraph. Ịminimiin apum mọ ụmiine iphulupul phọ ạJizos,

⁴ ọbo ẹliomom mọ ẹpe ẹkpianaan bọ dị Ologh phọ kụliom iyira phọ odimom bọ dọl Uwaloor phọ, kạ́ḍiphe ịkaraph ạruuphua phọ, emunughan ẹmadan.

⁵ Bụphe odimom bọ dọl ịkaraph ạruuphua phọ, ịkaraph ạruuphua bịn kụ edi ghan iloghi phọ ạbidi. Bụphe odimom bọ dọl Uwaloor Iigbia phọ, ịpe ẹḅeeraan bọ Uwaloor Iigbia phọ bịn kụ edi ghan iloghi phọ ạbidi.

⁶ Aḍuugh edianaan ni bụphe ịkaraph ạruuphua bịn kụ edi ghan bọ iloghi phọ ạbidi. Aghuḍum rꞌẹepho edianaan ni bụphe ịpe ẹḅeeraan bọ Uwaloor Iigbia phọ kụ edi ghan bọ iloghi phọ ạbidi.

⁷ Bụphe ịkaraph ạruuphua bịn kụ edi ghan bọ iloghi phọ ạbidi, ạbumulogh-ḍien Ẹnaan ni. Bịdi iilogh phọ Ẹnaan rọ́naghanan ghan, kụ kótue ni ọnaghanan.

⁸ Bụphe odimom bọ dọl ịkaraph ạruuphua phọ rótue ghan kọḅaalami ologhi phọ Ẹnaan.

⁹ Kụ nyina íloom dọl ịkaraph ạruuphua. Nyina edimom ghụn dọl Uwaloor Iigbia phọ, lọ Uwaloor phọ Ẹnaan ạkaraghi ni arugh loor phọ anyina. Kụ oye lọ ụ́moogh Uwaloor phọ aKraist, pọ kọ́lo aKraist.

¹⁰ AKraist arugh ni loor phọ anyina, ghạlamo aḍizu iphulupul phọ anyina ịtuan ni ịkaraph kụ emugh, pọ aruwaloor phọ anyina edi ni, ịdi eḍighi bọ Ẹnaan mẹsighe mọ nyina awe aruukuan ni.

¹¹ Kụ Uwaloor phọ Ẹnaan phọ eḅeton bọ Jịzos sịphe aḍuugh phọ arugh ni loor anyina, pọ ọpo aḅeton bọ Kraist sịphe aḍuugh phọ kạtuan ni ịdipho Uwaloor phọ ọdi odi bọ loor anyina ạngo aani ghuḍum ḍizu iphulupul phọ anyina kemugh bọ ni.

¹² Bụo asiya, loor ịduon phọ, yira úle ọmugh ọrolom ạdol ịkaraph ạruuphua phọ.

¹³ Nyina ẹrolom dọl ịkaraph ạruuphua phọ, nyina kemuughu ni. Kụ nyina ẹrolom ni dọl Uwaloor Iigbia phọ kụ ẹze ịkaraph ạruuphua phọ anyina, nyina kẹmoogh ni ghuḍum.

¹⁴ Oomo phọ ạbuphe Uwaloor phọ Ẹnaan kụ aḍiemiom bọ, kụ ạnmuny phọ Ẹnaan.

¹⁵ Uwaloor phọ Ẹnaan ịngo bọ inyina kọ́lo oḍighi anyina rẹbene rꞌoghiilom eepuph, ọlo oḍighinom ghụn anyina nmụny ọdi. Ịikpo Uwaloor Iigbia phọ kụ ịdi yira rọmagham ghan bọ Ẹnaan mọ, “Ạba, Ọde.”

¹⁶ Uwaloor phọ Ẹnaan aḍighan aani ruwaloor phọ ayira ọghaaph ghan omitiom mọ yira kụ ạnmuny phọ Ẹnaan.

¹⁷ Ịduon yira moḍighi bọ nmụny phọ ọdi, yira kopin aani bin ạḍiseph phọ aseenaan bọ we phọ ọdi. Yira kọḅile kẹn ni ọḅarama Kraist opin aani bin ịpe Ẹnaan eseenaan bọ nyọdi. Eḍighi ịyaar dị yira ophin aani bin ịminimiin phọ aKraist, yira kopin kẹn ni bin eegu phọ ọdi.

Eegu phọ ẹpe kogananami bọ ụngo iyira

¹⁸ Mị ạwa ạmiin mọ kọ́sighe ịminimiin phọ yira rọmiinom bọ nyịidipho ọmaaniom eegu phọ ẹpe kogananami bọ ụngo iyira.

¹⁹ Oomo ạraraar phọ ọlhem bọ ekim ni owol rekori ghan mem mọ Ẹnaan kegananami bọ nmụny phọ ọdi,

²⁰ ịdi eḍighi bọ uronyon ni mọ oomo phọ ạbidi ụ́moogh ịyaar oḍighinom. Ịphen phọ kụ ị́ḅeeraan bịdi, ịtooghi Ẹnaan. Kụ oḍuom ologhi phọ ọphon ạrol li mọ

²¹ eniin aḍio komitiom ni oomo ạraraar phọ ọlhem bọ sịphe ạdol ạrebene phọ bịn kómugh mun ọḅor, kụ bịdi opin aani bin eegu phọ Ẹnaan ịdipho ạnmuny ọdi dị mokpetenaan.

²² Yira olegheri ni mọ kꞌạnyiidipho phọ ni oomo ạraraar phọ ọlhem bọ rẹkuph ni ịkuph eephina mụdi ạnir dị oghun-aḍien rakun.

²³ Bịdi bịn rọ́kuph bọ, yira phọ mọmoogh bọ Uwaloor Iigbia phọ aḍighi bọ eḍien phọ ogbiom bọ ạya phọ Ẹnaan mịngo bọ iyira, ọkuphom aani ni ologhi okoriom ghan mem mọ Ẹnaan kiḍighi bọ iyira nmụny phọ ọdi, ẹḅile epelom oomo aloor phọ ayira etene.

²⁴ Ụtuan oḍuom ologhi phọ kụ ụphel bọ iyira otene. Oḍuom ologhi, pọ okori ghan ọmoogh ịyaar dị yira kọ́miin ghan. Kokol bọ kẹn eeghe kụ oḍuom ghan ologhi ịlo yira mọmiin?

²⁵ Kụ yira oḍuom ni ologhi ọmoogh ịlo yira kọ̋miin ghan, yira rọkparam ghan ni kụ kokori.

²⁶ Igina phọ kẹn kụ ịdi Uwaloor phọ ratu ghan kạloghonaan ḍịghaagh ọkparami oodugha omeeraam mọ ayira. Rꞌịlo ọoḅereghi ghan bịn yira ụ́kar ulegheri. Uwaloor phọ rꞌaloor ọdi kụ rạkuph ghan ịkuph dị anem kétue ẹkaaph kụ kụgbaanaan iyira ghisigh Ẹnaan.

²⁷ Ẹnaan phọ rẹeḅeghion ghan bọ iloghi phọ awe kephogh elegheri ni ịpe edi bọ ologhi Uwaloor phọ, ịdi eḍighi bọ Uwaloor phọ ạsighe ni ịitughian phọ Ẹnaan kụ rạgba ghan bọ ọphelom awe phọ Ẹnaan.

²⁸ Yira olegheri ni mọ Ẹnaan rẹlogh ghan ni ḍịghaagh mọ oomo ạraraar ẹnighenaan bụphe ọphomoghian bọ nyọdi, bụphe ọdi ạatughian bọ kụ ạmagh.

²⁹ Bụphe Ẹnaan melhegheri ghan bọ igbaany, ọdi ạsaḅar ri aseere mọ ọrol aani ịdipho Ọony phọ ọno, ọbo Ọony phọ kụ aḍighi oḍiemiom sịphe aḍita asiya phọ.

³⁰ Ẹnaan ịmagh ni bụphe ọdi mạsaḅar bọ aseere, kụ ẹsighe bụphe ọdi mạmagh bọ eseerian mọ awe aruukuan ni, kụ ẹngo aani eegu phọ ọdi bụphe ọdi mạsighe bọ mọ awe aruukuan ni phọ.

ẠJizos Kraist kụ uḍeenaan iyira ẹphomoghian phọ Ẹnaan

³¹ Kọkaaph ika ịphen ighonoghian bọ iyira? Ịdipho Ẹnaan idianaan bọ ni iyira, ạnhian kụ kụmerenyan bọ iyira?

³² Ọdi ọ́lhogh ạaku Mọony phọ ọdi, ạngo ni bịn mọ aḍighi ịyaar owophom ayira. Mọony phọ ọdi bịn ụngo ni iyira, kụ ẹghiom ologhi mọ ọdi iyira kụ́ngo oomo ạraraar phọ oopho.

³³ Ạnhian kụ kasiph ologh we phọ Ẹnaan mẹsaḅar bọ? Ẹnaan rꞌaloor ọdi rẹkaaph ghan ni kemitiom mọ ologh bịdi ósiph.

³⁴ Oye katue ni asoph erugh apume bịdi ḍụghum? ẠJizos Kraist kụ kasoph apume ḍụghum? Eeye. Ọdi ghụn kụ amugh bọ kụ moḅeton bọ sịphe aḍuugh phọ oseere ḍịghaagh elhiom mọ Ẹnaan. Ọdi kụ rạgba ghan bọ ọphelom ayira ghisigh phọ Ẹnaan.

³⁵ Ạnhian nụun kụ kụgbarion bọ iyira sịphe ẹphomoghian phọ aKraist? Ịminimiin ḍụghum? Ịiḅaghami ḍụghum? Ịgbiphoghom ḍụghum? Ịgbakuro ḍụghum? Ẹdaḅa ḍụghum? Omuzaan aḍuugh ḍụghum? Aḍuugh ẹekaany ḍụghum?

³⁶ Ịdipho ạḍinya iigbia phọ ẹḅem bọ mọ, “Yoor ụtuan ni nyịna kụ odi bọ ẹmhu aḍio phọ rokori ghan ḍuugh. Rukporoghom ghan iyoor ịdipho iyool-ịga dị ọsighe rọki ọmeeghogh.”

³⁷ Eeye. Ọpo ụphomoghian bọ iyira raḍighi ghan ni ịdi yira ọkpar ri ropu kopeleghiom oomo ạraraar phọ ịphen phọ.

³⁸ Mị malhegheri ni akuphom owol mọ ịyaar iyira kị́gbarion sịphe ẹphomoghian phọ ọdi — mꞌaḍuugh mꞌaghuḍum; mꞌạruukpaany Ẹnaan mꞌịkpana ạraraar dị edi ẹpe kꞌạke; mꞌịlo ạnyiidipho,

³⁹ mꞌịlo edi ghisigh; mꞌịlo edi ạnyu, mꞌịlo edi ude. Sịphe oomo ạraraar phọ ọlhem bọ rꞌeniin ílho dị ketue ịgbarion iyira sịphe ẹphomoghian phọ Ẹnaan ịphomoghian bọ iyira phọ mọḅophoghan bọ Jịzos Kraist Ọmoogh-we phọ ayira.