Bụo aRom 5 - Ạḍinya Iigbia

Yira awe aruukuan ghisigh Ẹnaan

¹ Sịen Ẹnaan mẹtuan bọ omeeraam mọ ẹsighenom mọ yira awe aruukuan ni, ọdi rꞌayira mọphomoghian odimom ẹepho loor ẹmhu ạJizos Kraist Ọmoogh-we phọ ayira.

² Ọdi mạtuan omeeraam mọ ayira ụsighe iyira aseere aani dọl dị yira kolegheri aani ọnma ighirigiir phọ Ẹnaan. Ọmoogh ghan iboh, ịdipho yira oḍuom bọ ni ologhi ophin aani abin eegu phọ Ẹnaan.

³ Kụ yira ọḅile ni oboh ghan mem ịiḅaghami, ịdi eḍighi bọ ịiḅaghami rịtughemi ghan iyira ọkparam.

⁴ Kụ Ẹnaan ighol ọkparam mọ ayira kụ emeeraam bọ mọ ạroozo phọ ayira ẹnighe ni, kụ yira mọtuan ịduon phọ ọmoogh aani oḍuom ologhi.

⁵ Oḍuom ologhi phọ ọphon iyira rúbi ghan, ịdi eḍighi bọ Ẹnaan mẹsighe Uwaloor Iigbia phọ ọpo ọdi ụngo bọ iyira ẹloghom iloghi phọ ayira ẹphomoghian phọ ọdi emuzeḍi.

⁶ Kꞌobekemi amem dị ịikpo ọphelaam ẹmhu ayira ị́tol, bịn aKraist aghol li bụphe Ẹnaan úlegheri bọ aphiemi ghuḍum mọ ọdi,

⁷ Eḍighi ni iboom ẹekaany oghol oye aruukuan ophiemi aghuḍum. Iini sịen oye aḅom ni ẹmhu amite oghol ogey oye ophiemi aghuḍum ọdi.

⁸ Kụ ịdipho aKraist ughol bọ ni iyira aphiemi ghuḍum mọ ọdi kꞌamem dị yira odi ni ẹku ịkaraph kụ iḍeenaan bọ ọdo ẹphomoghian phọ Ẹnaan ịphomoghian bọ iyira.

⁹ Ẹnaan ịtuan ni ịḅaal phọ aKraist kụ ẹsighenom bọ mọ yira awe aruukuan ni; ịkiom nụun ologhi ịdi aKraist kụphel iyira ạsighe mem ạghelhe phọ Ẹnaan.

¹⁰ Yira ụlogh ni ḍien Ẹnaan, kụ aḍuugh Ọony phọ ọdi mịgba iyira ẹpomoghi. Ịkiom nụun ologhi pẹleeny dị aghuḍum mọ aKraist kụphel iyira.

¹¹ Kị́phen bịn. Yira mọtuan Jịzos Kraist Ọmoogh-we phọ ayira ụgba bọ iyira ạphomoghi, ọmoogh iboh esi Ẹnaan.

Ạdam rꞌaKraist

¹² Oniin oye kụ ạpham bọ ịkaraph phọ arumom sịen aḅirini phọ, kụ ịkaraph phọ ọdi ịphamam ni ḍuugh. Kụ aḍuugh phọ mẹtuan bọ ịkaraph phọ ọdi eetura oomo aḅirini phọ ịdi oomo awe moḍighi aani ịkaraph.

¹³ Ịkaraph ịrol li aḅirini phọ kụ aMozis agbi bọ ọngo Ologh phọ. Kụ esi lọ iilogh ílho, rósoroghu ghan iilogh.

¹⁴ Emiigh ọrugh Ạdam kụ ẹteeny ọrugh aMozis, aḍuugh ikpobiom ni oomo awe, ghạlamo rꞌạbuphe ịkaraph phọ ạbidi ị́kigh aani bọ ịdipho ịpe Ạdam mọ ạka bọ ịtooghi phọ Ẹnaan. Ạdam kụ oogho oye phọ ọpo katu bọ.

¹⁵ Kụ ịyal phọ ạbidi ụ́ughighighan, ịdi eḍighi bọ aruunmo Ẹnaan ị́kigh ịkaraph phọ Ạdam. Ọnma ighirigiir phọ Ẹnaan ạbugh ni iboom apu ọpioman phọ. Ọpioman oniin oye kụ aḍighi ni dị aḍita awe omuughu. Ịkiom nụun ologhi ịdi ọnma ighirigiir phọ Ẹnaan rꞌaruunmo phọ dị aghol bọ oniin phọ ạJizos Kraist kụ ạngo, mạteeny aani ḍita phọ.

¹⁶ Ạraraar phọ ịpe aruunmo phọ Ẹnaan ẹsighe bọ eru kụ ịimor epu ịpe ịkaraph phọ Ạdam aḍighi bọ. Eḍighinom ịyaar oniin oye phọ ọphon kụ ịkom bọ erugh apum mọ eseere. Ịbadi ạsipioman ni kụ rẹsighe ghan bọ ruunmo ọmooghom akeel phọ Ẹnaan keru.

¹⁷ Ịdipho aḍuugh ẹtuan bọ ọpioman oniin oye kụ emiigh bọ okpobiom awe phọ, ịkiom nụun ologhi iboom ịdi oniin phọ ạJizos Kraist bịn aḍighi. Oomo ạbulo ạar aani ẹelha ọnma ighirigiir phọ Ẹnaan rꞌaruunmo aruukuan phọ ọdi kọtuan ni Kraist ọda sịen eye phọ.

¹⁸ Esi okpere, ịdipho oniin ọpioman kụ ạkom bọ erugh apum mọ aseenaan oomo awe kụ ịdi eniin eḍighinom ịyaar dị eekuan kẹsighe ni akeel rꞌaghuḍum etuomaan oomo awe.

¹⁹ Ḅịle, ịdipho ọtuan bọ ọḅaar ẹmhu oniin oye kụ ọlogh bọ ḍita phọ ẹku ịkaraph phọ kụ ịdi Ẹnaan kẹtuan osooromi aloor oniin oye ẹlogh ḍita phọ ẹku aruukuan phọ.

²⁰ Ologh phọ aḍighom aani ọbughe ghan ọpioman phọ. Esi lọ ịkaraph mẹbugh kụ ẹdi ọnma ighirigiir phọ Ẹnaan rạbugh ghan kapu.

²¹ Loor ịphen phọ, ịdipho ịkaraph ẹsighe bọ ḍuugh phọ kụ ẹdaam kụ ịdi ọnma ighirigiir phọ Ẹnaan rạsighe ghan ruukuan kụ kạdaam, ạḅile ạtuan Jịzos Kraist Ọmoogh-we phọ ayira urorori iyira asiemi ghuḍum kꞌagee-pọ.