Bụo aRom 3 - Ạḍinya Iigbia

¹ Ạbuo aJu phọ opuom eeghe nụun ruuruen phọ? Eeghe ḍịen kụ ạsuo osopha oodu phọ?

² Ạsuo phọ ạbugh ni esi oomo areten. Emiighom mọ, Ẹnaan ịḅogh ruguan phọ ọdi ẹlhogh ḍịghaagh ạbuo aJu phọ.

³ Kụ koḍighi ika ịdipho buniin ạbidi úmeeraam bọ? Ẹnaan kekol li ịphen phọ bịn ẹbile oḍighi ịpe ọdi aguanaan bọ ḍụghum?

⁴ Kị́dipho. Ghạlamo ịdipho oomo awe oḍighi bọ ni bụgbaam ọkpe phọ, ilegheri mọ Ẹnaan rẹ́gba ghan ọkpe. Ịdipho ọge bọ sịphe ạḍinya iigbia phọ mọ, “Ẹkpe ni dị awe kọmiin ghan mọ nạ rábi ghan ruguan phọ ạna. Ẹkpe ni dị kegheel ghan nyịna mem lọ osiph nyịna ologh.”

⁵ Kụ koḍighi ika ịdipho ẹkaraph eḍighinom ịyaar phọ ayira kụ egboton eḍeenaan mọ Ẹnaan reḍighi ghan ni igey? Yira kọkaaph eeghe? Mọ Ẹnaan rẹpioman ghan ni ḍụghum, mem lọ ọdi ụliom iyira? (Mị rạkaaph aani ịpe awe rọkaaph ghan bọ.)

⁶ Kị́dipho. Eḍighi ịyaar lọ Ẹnaan apum rꞌakeel ílegheri, ọdi kaḍighi bọ ika kụ atue aagboonaan ịiruen aḅirini phọ?

⁷ Koḍighi ika nụun ịdipho iipheeny phọ ạmi kụ egboton bọ eḍeenaan mọ Ẹnaan reḍighi ghan ni ruguan phọ ọdi? Kokol bọ eeghe kụ erugh ịkaraph iphum ịmi?

⁸ Ụ́ḅile ghan ụḅem aani mọ, “Itu oḍighi ịkaraph ọbo eeḅi emite”? Buniin awe mọgba mọ mị rạḅem ghan ịduon phọ bịn ụphuenom ịmi. Apum mọ ạbidi kạgbaanyan ni.

Ọnyo aruukuan ólho

⁹ Ạdol ayira ạbuo aJu phọ ẹnighe ni epu ḍịo aruuruen phọ ḍụghum? Eeye. Mị mạphur ri aḍeenaan mọ ạbuo aJu rꞌaruuruen phọ ọḅoph ni dọl oḍighi rẹbene ịkaraph.

¹⁰ Ịdipho ọge bọ sịphe Ạḍinya Iigbia phọ mọ, “Ọnyo aruukuan ólho,

¹¹ oye lọ rạnaghan ghan ḍụghum, ạḅile rạwa ghan olegheri Ẹnaan ólho.

¹² Oomo awe mọgbatanu ẹnon eten, ọḅile ọḅaaghaph, rꞌoniin ọlo raḍighi ghan ịlo ẹnighe ólho.

¹³ Ọghaaph ạbidi rapur ghan ịdipho oḍi oye dị úukpereghi; anem ạbidi regheleghele ghan ịlo iigbegheḍiom bịn, ikpo ọnhu phọ ạbidi ịlo aḍuugh-aḍuugh, ịdipho ịka ẹkaraph-ịyaar;

¹⁴ igurughian bịn kụ imuza ọnhu ạbidi.

¹⁵ Rotir bịdi bịn mọko enu;

¹⁶ amuphe rꞌịiḅaghami kụ resugha ghan esi lọ bịdi oten.

¹⁷ Bịdi úlegheri oḍighi ghan ịlo ẹepho,

¹⁸ ḅịle kẹn rókiilaan ghan eegu Ẹnaan.”

¹⁹ Yira olegheri ni mọ oomo ịtooghi Ologh phọ aMozis edianaan ghan bụphe Ologh phọ akpophonom bọ, ịlo Ẹnaan keegboonaan ịiruen oomo aḅirini phọ, ọbo kọmoogh ghan bọ kẹn ịyaar oghol kụ ọsar ọwilenaan oye.

²⁰ Ẹnaan rẹ́tuan ghan ooko ghan Ologh phọ kụ kẹsighenom mọ ọphon oye aruukuan ni. Ologh phọ ghụn rạkiom ghan oye ologhi mọ ọdi maḍighi ịkaraph.

Ịdi Ẹnaan rẹsighenom ghan mọ bụen awe aruukuan

²¹ Kụ nyịidipho Ẹnaan megananami reten phọ dị ạsighenom ghan bọ mọ ọphon oye aruukuan ni kụ ịphen phọ ị́moogh ịyaar oḍighinom iilogh phọ. Ologh phọ aMozis rꞌịgeeghi ariil phọ kụ rẹkaaph bọ ịphen phọ.

²² Awe lọ omeeraam Jịzos Kraist kụ ạbudi Ẹnaan rẹsighenom ghan bọ mọ awe aruukuan ni. Ẹnaan rẹsighe ghan ni oomo ạbulo omeeraam Kraist, ịdi eḍighi bọ ọgbaranaan ólho.

²³ Oomo awe moḍighi ịkaraph omeel ẹgbenem bịn kọ́teeny rughuenian phọ Ẹnaan.

²⁴ Kụ Ẹnaan ẹngo ni ọnma ighirigiir phọ ọdi oopho, ẹtuan Jịzos Kraist phọ ạtagharan bọ bịdi, ẹsighenom mọ bịdi awe aruukuan ni.

²⁵ Ẹnaan imitiom Kraist obalelhe mọ ịḅaal phọ ọdi egbuurogh ghẹlhe phọ ọno eḍighi ịdi bụphe omeeraam bọ kọmoogh ọsar ọwilenaan. Ẹnaan iḍighi ịphen phọ ịlo oḍeenaan aruukuan phọ ọdi. Gediidi phọ ọdi ạkparam ni aphogh ghan ịkaraph lọ awe oḍighi bịn aḅoorian,

²⁶ kụ ọrugh phọ ọphon, mạtuan oḍeenaan aruukuan phọ ọdi bịn ọ́minoghom mun ịkaraph lọ awe oḍighi. Ịduon kụ ịdi Ẹnaan eḍeenaan mọ ọno rꞌaloor ọno raakuan ni, ḅịle mọ ọno rạsighe ghan ni tọrobo oye lọ ameeraam Jịzos kaḍighi oye aruukuan.

²⁷ Yira kokol bọ eeghe nụun kụ ootuma? Ị́ḅoph. Ẹmhu eeghe kụ ị́ḅoph bọ? Ịdi eḍighi bọ akeel phọ ayira rạ́tuan ghan iiḅi iiḍighi, rạtuan ghan omeeraam mọ ayira esi ạJizos.

²⁸ Yoor ọwa ọmiin mọ Ẹnaan rẹtuan ghan omeeraam kụ kẹsighenom mọ ọphon oye aruukuan ni, rẹ́tuan ghan oḍighi ghan ịtooghi Ologh phọ aMozis.

²⁹ Nạ ragbi mọ Ẹnaan phọ ẹlo ạbuo aJu phọ bịn ḍụghum? Ọdi kẸ́naan aruuruen aani phọ ḍụghum? Ọku ólho.

³⁰ Ẹnaan phọ eniin kụ ọdi kạtuan omeeraam ạbuo aJu phọ kụ ạsighenom mọ bịdi awe aruukuan ni, ḅịle kẹn kạtuan omeeraam aruuruen phọ kụ ạsighenom mọ bịdi awe aruukuan ni.

³¹ Kụ ẹkigh mụdi mọtuan omeeraam mọ bịn kọ́maghami mun ịyaar Ologh phọ aMozis? Tạa, ịlo ayoor ríḍigh. Yoor olhom ni Ologh phọ ọkananaam.