Bụo aRom 2 - Ạḍinya Iigbia

Ịiruen phọ Ẹnaan

¹ Ọyaghiri, nạ rạḍagha ghan ni bụnon awe ḍụghum? Tọrobo oye lọ nạ aru, ịyaar oghol kụ ọsar ọwilenaan ạna ílho. Kemeel li ephum nyịna lọ nạ ụ́bile oḍighi aani ghan ekpo phọ ẹpe nạ aghol bọ kụ rạḍagha bọ bụnon awe.

² Yira olegheri ni mọ Ẹnaan rẹ́pioman ghan ịiruen lọ ọdi aagboonaan bụphe roḍighi ghan bọ ọdo phọ ịphen phọ.

³ Kụ ọkar ạna ọyaghiri phọ ạmi raḍighi ghan bọ ịphen phọ nạ aghol bọ kụ rạḍagha ghan bụnon, nạ ragbi mọ nạ kakpetenaan ni ghẹlhe phọ Ẹnaan ḍụghum?

⁴ Iini sịen nạ mạgumom ọman iboom igbiririph phọ rꞌọminoghom ịkaraph phọ rꞌọkparam mọ Ẹnaan. Nạ óloghoma mọ igbiririph phọ Ẹnaan kụ kẹlogh ịiphaghamiom mọ kiton esi ịkaraph phọ ạna ḍụghum?

⁵ Kụ nạ ạmoogh ọokpara rꞌọkikiri ologhi. Esi ịduon phọ, nạ raakpomoghi apum kaseerian ḍio phọ Ẹnaan kegananami bọ ghẹlhe phọ rꞌịiruen aruukuan phọ ọdi.

⁶ Ẹnaan kẹkpe ni ịikpia ịlo oye rꞌoye.

⁷ Ị́per buniin awe oḍighi ghan iiḅi rꞌọwa eegu rꞌarughuenian rꞌaghuḍum dị aḍuugh ílhoonaan. Ẹnaan kẹngo bụen phọ ghuḍum kꞌagee-pọ.

⁸ Buniin odimom ịkaagh, ọbile ịpughol rọker idele. Ẹnaan kẹsighe ghẹlhe rꞌọghagh ologhi phọ ọdi kụ eseenaan bụen phọ.

⁹ Ịminimiin rꞌamukum ologhi kẹtolonaan ni oomo awe lọ roḍighi ghan ịkaraph. Kemiighom bụo aJu phọ kụ egbi ọteeny aani aruuruen phọ.

¹⁰ Kụ Ẹnaan kẹngo ni eegu rꞌarughuenian rꞌẹepho oomo ạbuphe roḍighi ghan bọ igey phọ. Kemiighom bụo aJu phọ kụ egbi ọteeny aani aruuruen phọ.

¹¹ Ghisigh Ẹnaan oye oye ópu.

¹² Ologh phọ aMozis ókpophonom ruuruen phọ. Bịdi Ologh phọ úlegheri kụ mọrol bọ oḍighi yogh ịkaraph phọ bịn kope. Ologh phọ aMozis ikpophonom bụo aJu phọ, kụ mọrol bọ oḍighi yogh ịkaraph phọ, kụ kọdaph Ologh phọ kụ oogboonaan bịdi ịiruen.

¹³ Ụ́tuan ọnaghanan ghan Ologh phọ, ụtuan ghụn oḍighi ghan ịtooghi Ologh phọ kụ Ẹnaan rẹsighenom ghan bọ we mọ ạbuo aruukuan ni.

¹⁴ Ologh phọ aMozis ruuruen phọ ókpophonom, kụ tọrobo amem lọ ologhi ạbidi aḍigh kụ oḍighi aani ịtooghi Ologh phọ, ghạlamo ịdipho bịdi Ologh phọ úlegheri bọ ni, bịdi ọmoogh ni iilogh ọrolom.

¹⁵ Ạroozo phọ ạbidi reḍeenaan ghan mọ ọge ni sịphe iloghi phọ ạbidi ịpe Ologh phọ ạtooghi bọ. Ịitughian phọ ạbidi kụ reḍeenaan ghan mọ ịphen phọ ịne ni, loor esi dị iloghi phọ ạbidi eeni amem rẹgurogh ghan ni bịdi eeni amem kẹphel bịdi.

¹⁶ Kụ ọtuan ịlo ooḅi ọghaaph phọ mị rạkaaph bọ, ịduon kụ ịdi kẹtol ḍio phọ Ẹnaan kekol bọ Jịzos Kraist kụ ẹeḅeghion rạraar ịbooghian phọ awe ẹmiin.

Bụo aJu phọ rꞌiilogh phọ aMozis

¹⁷ Oḍighi ika nyịna? Nạ raatuma ghan mọ nạ ọnyo aJu. Nạ aḍuom ologhi Ologh phọ aMozis, ạḅile rabaga ghan ịdi Ẹnaan rꞌạna esi.

¹⁸ Nạ alegheri ni ịdi ẹḅeeraan Ẹnaan, ḅịle Ologh phọ mạtughemi ni nyịna ọsaḅar ghan igey phọ kụ ọsighe.

¹⁹ Nạ alegheri ni akuphom owol mọ nạ kụ otelhiom ạbuo ikpom ariḍien, rꞌạḍiḅaal ạbulo odi ufiri,

²⁰ rꞌotomoghiom ạbuo arolologhi rꞌọtughemia ịbam ạnmuny. Nạ ọ́moogh iikia mọ oomo olegheri-ịyaar rꞌigey edi sịphe Ologh phọ.

²¹ Nạ rạtughemi ghan bụnon, eeghe kụ nạ ọ́tughemi aani bọ loor phọ ạna? Nạ rạkaaph ghan mọ, “Imi kémi,” nạ rami ghan ni ḍụghum?

²² Nạ ratoma ghan mọ, “Ẹmha kéle”, nạ rale ghan ni ẹmha ḍụghum? Nạ maghel nmụny aghuḍuul — nạ ramiighi ghan rạraar aghuḍum rubughotu aruru ḍụghum?

²³ Nạ raatuma ghan mọ nạ alegheri ni iilogh phọ Ẹnaan, kụ nạ rasoroghu ghan iilogh phọ kasiphiom Ẹnaan umugholoor ḍụghum?

²⁴ Ọge ni sịphe ạḍinya iigbia phọ mọ, “Aruuruen phọ mịtuan inyina ạbuo aJu phọ rọopu ghan ḍien phọ Ẹnaan.”

²⁵ Nạ raako ghan Ologh phọ aMozis, pụruku oḍuna phọ ạna aḍeenaan mọ nạ maghiran ịyo rꞌẸnaan. Ịdipho ílho, pọ nạ odimom ni oodu.

²⁶ Ooruen dị úḍuna kụ raako ghan ni ịtooghi Ologh phọ, Ẹnaan kẹ́sighenom mọ ọdi masopha ni oodu ḍụghum?

²⁷ Kọtuan ni ịphen phọ bịn aruuruen phọ osoph ọoruen ophume nyịna phọ maḍuna bọ, ịdi eḍighi bọ nạ rasoroghu ghan Ologh phọ, ghạlamo ịdipho ọge bọ ni oseenaan nyịna. Bịdi ghụn kụ rooko ghan bọ Ologh phọ, ghạlamo ịdipho bịdi odimom bọ ni oodu phọ.

²⁸ Ọmaar ogbiighi, ạnhian kụ ọkaraghi ọnyo aJu dị aḍuna bọ? Kóye phọ ọpo aḍighi bọ ọnyo aJu ẹphen ạnyu rꞌạnyu phọ, ọpo oḍuna phọ ọdi aḍighi bọ osopha oodu phọ bịn.

²⁹ Ọkaraghi ọnyo aJu phọ ghụn, pọ oye dị Uwaloor Iigbia phọ maḍun ologhi phọ ọdi, kọ́po ạtuan bọ ịtooghi Ologh phọ bịn kụ asopha bọ oodu phọ. Ọdo oye phọ ọphon rạmoogh ghan ḍịseph Ẹnaan, kạ́ḍio awe.