Bụo aRom 16 - Ạḍinya Iigbia

Ịdi mị ripurunaan inyina

¹ Mị ạma Fiibi umarani phọ ayira, ọpo raḍighi ghan bọ oḍighi ạsiosi phọ ẹpe Kenkria riḍeenaan inyina.

² Ikuraam ni nyọdi loor ẹmhu aḍien Ọmoogh-we phọ, ịdipho ẹkpe bọ dị aweye Ẹnaan koḍighi ghan. Ịloghonaan ni nyọdi ḍịghaagh tọrobo ịyaar lọ ekuom nyọdi, ịdi eḍighi bọ ọdi rꞌaloor ọdi aḍighi ni ogey ọyaghiri ịbadi awe rꞌạmi phọ kẹn ni.

³ Ipurunaan ịmi Prịsila rꞌẠkuila, bụphe rꞌạmi ọḅoph bọ oḍighi ghan oḍighi phọ ạJizos Kraist,

⁴ kụ ọsighe bọ ghuḍum ạbidi ọphaghan loor ẹmhu ạmi. Mị rꞌoomo ạbuo ạsiosi aruuruen ekpisi kịrokiro phọ ologhoma ni iiḅi phọ bịdi oḍighi bọ.

⁵ Ipurunaan ịmi bụo ạsiosi phọ rookpomoghan ghan bọ kꞌạbidi. Ipurunaan ịmi Ẹpainitos ooḅi ọyaghiri phọ ạmi, ọpo aḍighi bọ ọḅel oye dị ameeraam Kraist ẹpe eelhe phọ Esia.

⁶ Ipurunaan ịmi Meri phọ ạkparami bọ ḍịghaagh iḍighinaan ghan inyina oḍighi phọ.

⁷ Ipurunaan ịmi Ạndronikos rꞌạJunias, bụphe rꞌạmi oḍighi bọ bụo aJu dị ọrol ikoli eniin amem. Bịdi oḍighi ni riphigh awe esi ogbo abutelhedom mọ. Bịdi momeeraam ni Kraist kụ egbi ọteeny aani ạmi.

⁸ Ipurunaan ịmi Ạmpliatos ooḅi ọyaghiri phọ ạmi esi ạmuḅoph Ọmoogh-we phọ.

⁹ Ipurunaan ịmi Ụbanos, ọpo rꞌayira ọḅophoghan bọ roḍighi ghan oḍighi phọ aKraist, rꞌạStakis ooḅi ọyaghiri phọ ạmi.

¹⁰ Ipurunaan ịmi Apeles, ọpo mọwa bọ ni omeeraam mọ ọdi esi aKraist ọmiin. Ipurunaan ịmi ọto kꞌẠristobolos.

¹¹ Ipurunaan ịmi Hẹrodion, ọpo rꞌạmi oḍighi bọ bụo aJu, rꞌạbuo asiya ọto kꞌạNasisos.

¹² Ipurunaan ịmi Trifaina rꞌaTrifosa, bụphe roḍighi ghan bọ oḍighi Ọmoogh-we phọ: rꞌaPesis, ooḅi ọyaghiri phọ ạmi, ọpo akumu bọ kꞌịphen kꞌịphen ạngo Ọmoogh-we phọ.

¹³ Ipurunaan ịmi Rụfos, ọpo aḍien phọ ọdi emite bọ ni esi oḍighi Ọmoogh-we phọ, rꞌonhiin phọ ọdi kẹn, ọpo ụpham ghan bọ ịmi ịdipho ọony ọdi.

¹⁴ Ipurunaan ịmi Ạsinkritos rꞌaFlegon, rꞌaHemis, rꞌạPatrobas rꞌạHemas, rꞌoomo ạbueri phọ ạbuo asiya phọ esi aKraist, bụphe odianaan bọ rꞌạbidi.

¹⁵ Ipurunaan ịmi Fịlologos rꞌaJulia: Nerios rꞌumarani phọ ọdi: Ọlimpas rꞌoomo awe phọ Ẹnaan odianaan bọ rꞌạbidi.

¹⁶ Oniin aghurughi ghan nyoniin! Oomo ạbuo ạsiosi kịrokiro phọ aKraist mipuru inyina.

Oroma okureriom

¹⁷ Bụo asiya, mị rịḅeni ni inyina kạkpaariom mọ igon bụphe rọkom bọ madian phọ koseere odughiom yogh omeeraam awe phọ, bụphe rọgbagharan ghan bọ ịpe mịtughemi bọ inyina. Ịgbatanaan bịdi.

¹⁸ Aḍita ạbuphe roḍighi yogh bọ ọdo phọ ịphen phọ róḍighi ghan oḍighi kọngo Kraist Ọmoogh-we phọ ayira. Bịdi rọdaph ghan rụuphua ạbidi bịn. Ịma ikpo ọnhu phọ rꞌiphirigba phọ ạbidi reekeleghi ghan weye ịyegheyeghe iloghi.

¹⁹ Oomo awe mọnaghan ni ịdi nyina mẹnaghanan ooḅi ọghaaph phọ, kụ loor esi ịduon phọ ologhi ạmi ạḅaal li iboom ịlo anyina. Mị rạwa ni mọ ilegheri ịyaar ịlo ịpe ẹnighe bọ, kụ ịlo eru ịkaraph ílegheri aani ghan.

²⁰ Kụ Ẹnaan phọ eḍighi bọ zin ẹepho phọ ayira kẹnuun ni ẹezeghi Setan epiemi sịphe aruwol phọ anyina. Ooḅi ọghor phọ kꞌạJizos Ọmoogh-we phọ ayira ịrolonaan inyina!

²¹ ATimoti phọ rꞌạmi ọḅophan bọ roḍighi ghan oḍighi phọ Ẹnaan; rꞌạLusios, rꞌạJesin, rꞌaSosipater, bụphe rꞌạmi oḍighi bọ bụo aJu phọ mipuru inyina.

²² Mị aTatios phọ ạge bọ ḍịnya phọ ạḍien rꞌạḍighaagh ạmi akol li ḍien Ọmoogh-we phọ ripuru inyina.

²³ ẠGayos uwotu phọ ọpo bụo ạsiosi phọ rookpomoghan ghan bọ kꞌọdi, mipuru inyina. Ẹrastos ọpamam ikpoki ẹmha phọ rꞌạKuatos, ọnyo asiya phọ ayira, mipuru kẹn inyina.

²⁴ [Ooḅi ọghor phọ kꞌạJizos Kraist Ọmoogh-we phọ ayira ịrolonaan inyina!]

Mị rakureriom ịiḅereghi oboomiom Ẹnaan

²⁵ Itu oboom Ẹnaan! Ọdi kụ kịngo bọ inyina ịnyaam dị nyina ketue ẹmeera zim sịphe omeeraam mọ anyina, ịdipho adom ạmi rꞌooḅi ọghaaph phọ ạJizos Kraist mị rạkaaph bọ ḅịle rꞌịdipho igey phọ ịpe ạaghian bọ kꞌẹḅel egbiom aḅirini phọ kụ meganana bọ.

²⁶ Kụ nyịidipho mọtuan ịpe ariil phọ Ẹnaan ọge bọ ọsighe igey phọ ịpe phọ omitiom egaan. Ẹnaan phọ rémugh ghan bọ mẹtooghi mọ ọsighe oḍeenaan weye oomo areelhe phọ, pịdi bịdi omeeraam ọḅile ọnaghanan.

²⁷ Eegu phọ ẹtuan bọ Jịzos Kraist ẹrolonaan Egina Ẹnaan phọ ẹmoogh bọ oomo olegheri ịyaar phọ kꞌagee-pọ! Ẹrol li ịdipho!