Bụo aRom 15 - Ạḍinya Iigbia

Iḍighi ghan ịlo ẹgbaanyan bụnon awe, káloor anyina bịn

¹ Ẹkpe ni dị yira phọ ạbuen omeeraam mọ ạkpar bọ kọlogh ḍịghaagh otoolaan sidool ạbuphe omeeraam mọ adugh bọ. Kúḍighi ghan ịlo ịgbaanyan iyira bịn!

² Tọrobo ọnyo ayira ạloghonaan ghan ghụn ḍịghaagh ịlo kẹngo ọnyo asiya ọdi sụo, pịdi ạaneghiom omeeraam mọ ọdi,

³ ịdi eḍighi bọ aKraist óḍighi ghan ịlo ẹgbaanyan nyọdi! Ịdipho ạḍinya iigbia phọ ẹḅem bọ, “Iitunyan phọ ịpe ootuuny bọ nyịna mimeleghuom ịmi.”

⁴ Tọrobo ịyaar lọ ọge sịphe Ạḍinya Iigbia phọ, ụge ọtughemiom ghan ayira, pịdi yira ọtuan ọkparam mọ rꞌạkpo ologhi phọ ọghaaph Ạḍinya Iigbia phọ rụngo ghan bọ iyira ọmoogh oḍuom ologhi.

⁵ Kụ Ẹnaan, azin ọkparam rꞌạkpo ologhi phọ, eḍighi ni mạar dị nyina kẹtuughaany ghan ịpe ạJizos Kraist aḍighi bọ, ẹmoogh aani igina phọ ịitughian phọ sịphe ogbo phọ anyina,

⁶ pịdi aḍita phọ anyina ẹḅophoghan rꞌeniin ẹḍogh kụ ẹsephom Ẹnaan rꞌỌde phọ ạJizos Kraist, Ọmoogh-we phọ ayira!

Ooḅi ọghaaph ọghiomonaan aruuruen phọ

⁷ Loor ịphen phọ, oniin ạloghoma nyoniin, ịdipho aKraist mịlhoghoma bọ inyina, ọbo ẹngo eghuan phọ Ẹnaan,

⁸ ịdi eḍighi bọ mị rịḅeni ghan inyina mọ aKraist aḍighi otelhedom ạbuo aJu phọ oḍeenaan mọ Ẹnaan ẹkpe ni oḍuom ologhi, rꞌọḅile oḍighi oguan phọ dị aguanaan bọ bugbogh ạburude phọ,

⁹ rꞌọḅile ọloghonaan ạḍighaagh dị aruuruen phọ kokol ọnma ighirigiir phọ Ẹnaan oboom nyọdi. Ịdipho ạḍinya iigbia phọ rẹḅem ghan bọ, “Loor ịphen phọ, mị kaboom ni nyịna sịphe ogbo aruuruen phọ; mị kạmoor ri sụor aboomiom ḍien phọ ạna.”

¹⁰ Ẹḅile kẹn ẹḅem mọ, “Nyina aruuruen phọ, ịḅaram we phọ Ẹnaan ẹsaḅar bọ ẹmoogh iboh.”

¹¹ Ẹḅile kẹn ẹḅem mọ, “Oomo aruuruen phọ, iboom Ọmoogh-we phọ; weye oomo areelhe, iboom nyọdi.”

¹² Ḅịle kẹn, Azaya ạḅem mọ, “Ọnyo ẹemara ẹemara ạJesi katu ni; kopophe ni nyọdi ọtooghi ạraraar ọngo aruuruen phọ, kụ bịdi oḍuom ologhi nyọdi.”

¹³ Ẹnaan phọ eḍighi bọ zin oḍuom ologhi imuzeḍinaan inyina oomo ọḅaal ologhi rꞌẹepho, loor omeeraam mọ anyina esi ọdi, pịdi ịikpo Uwaloor Iigbia phọ eḍighi dị oḍuom ologhi phọ anyina kapoph ghan bịn ạkiom ghisigh!

Ịdi ạPol ạtuan bọ rạgeom oḅom ẹmhu ḍịnya phọ ạḍien

¹⁴ Bụo asiya ạmi, mị rꞌaloor ạmi aḍuom ni ologhi akuphom owol mọ igey rꞌolegheri ịyaar emuza ni loor anyina, ḅịle mọ oniin ratue ni kạtughemi ghan nyoniin.

¹⁵ Kụ mị ạgeom ni rꞌoḅom ẹmhu iniin ikpo ạraraar ọghiom anyina ologhi. Oḅom ẹmhu phọ ạmi ạtuan ịdipho Ẹnaan eḍighi bọ eeḅi

¹⁶ ịma ịmi oḍighi otelhedom ạJizos Kraist oḍighi ghan oḍighi ọngo aruuruen phọ. Mị ạkigh oyil ạrikia ịdipho mị rạkaaph bọ ooḅi ọghaaph phọ Ẹnaan, pịdi Uwaloor Iigbia phọ awoph ruuruen phọ aḍighi bịdi ẹkia dị Ẹnaan kele.

¹⁷ Ịdipho mị ạḅophoghan bọ Jịzos Kraist, mị raḅoom ni oḍighi phọ mị raḍighi bọ kạngo Ẹnaan.

¹⁸ Mị kaḅom ni ẹmhu bịn ạkaaph amitiom ịpe aKraist mạtuan bọ ikpo ọnhu rꞌiiḍighi phọ ạmi,

¹⁹ rꞌịikpo areḍeenaan rꞌịiḍaany, rꞌịikpo Uwaloor Iigbia phọ kụ aḍighi oḍeenaan aruuruen ịlo bịdi kọnaghanan ghan Ẹnaan. Mị magbeelom ni ooḅi ọghaaph phọ aKraist ạman, emiigh kꞌẹpe Jeruselem kụ esi Ilurikom.

²⁰ Oomo ologhi ạmi odi ghan ọghaaph ghan ooḅi ọghaaph phọ ọḅeni aweye arikpisi phọ ịpe kọ̋naghan ghan bọ ọghaaph phọ aKraist, ọbo mị kamiigh ghan bọ esi dị ọnon oye maphighi kụ ạlogh ạkiom.

²¹ Ịdipho ạḍinya iigbia phọ rẹḅem bọ, “Bụphe kọ̋ḅeni ghan bọ ịlo ọdi kọmiin ni, kụ bụphe kọ̋naghan ghan bọ kolegheri ni.”

ẠPol agbiighi ọghi aRom

²² Ịduon kụ iḍighi bọ ịyaar phọ umirighan bọ ịmi ịbadi amem oru ọteeny anyina.

²³ Kụ nyịidipho mị mạmadan oḍighi phọ ạmi sịen areelhe phọ ịphen, ḅịle kẹn meḍighi ni ịbadi ạsia mị rạwa ghan bọ oru ọmiin anyina.

²⁴ Mem lọ mị rạki Spen, kịḅeeraan ni ịmi oḍigh ọmiin anyina, lọ nyina kịlhoghonaan ịmi ḍịghaagh ẹghi phọ, mem lọ yira mọrolan ẹphurukpu ọghaaph ọmilogh.

²⁵ Tọrobo ịlo ẹrol, mị rạki Jeruselem nyịidipho oḍighi oḍighi ọngo awe phọ Ẹnaan odi bọ ẹpe.

²⁶ Bụo ạsiosi phọ aMasidonia rꞌẠkaya mọsighe ni rꞌooḅi ologhi ạbidi osereghiom ikpoki ọloghonaan ạḍighaagh rukulom sịphe ogbo awe phọ Ẹnaan ẹpe Jeruselem.

²⁷ Bịdi rꞌaloor ạbidi kụ umeeraam ni osogh osogh phọ ọphon, kụ ọlo ọbo esi ọgba agey, ẹkpaariom ni bịdi ọloghonaan ạḍighaagh phọ aḍien phọ. Ịdipho aruuruen phọ ophin aani bọ ni bin ạḍiseph aruwaloor phọ ạbuo aJu phọ ọmoogh bọ, ẹkpe ni dị ạbuo aJu phọ kophin aani bin ạraraar ạḍiseph ịsien ade awe phọ lọ aruuruen phọ ọmoogh.

²⁸ Mị rọmadan dom mọ ạḍien, rọḅogh oomo phọ ikpoki phọ osogh bọ rọngo, mị anyeene rạki Spen kụ mị aḍigh iphogh inyina.

²⁹ Mem lọ mị ratu ọmiin anyina, mị alegheri ni mọ mị kạpamam okpom ọghor phọ kꞌaKraist kụ iruom inyina.

³⁰ Bụo asiya, mị rịkpaariom ni inyina esi aḍien phọ ạJizos Kraist Ọmoogh-we phọ ayira, rꞌẹphomoghian phọ Uwaloor Iigbia phọ rạngo ghan bọ, iḍighan ni ịmi ọkparami oghol ghan ẹmhu ạmi ọoḅereghi Ẹnaan.

³¹ Ịiḅereghi ghan mọ ịyaar ịmi kímitenaan ḍịghaagh ạbuphe úmeeraam bọ ẹpe Judia, ḅịle kẹn mọ aweye phọ Ẹnaan ẹpe Jeruselem ọsighe aani oḍighi phọ ạmi.

³² Dị Ẹnaan emeera ni, pọ mị kạpam ni rꞌọḅaal ologhi kụ atumom ghisigh anyina kụ yira ọlogha loor.

³³ Ẹnaan phọ eḍighi bọ zin ẹepho ịrolonaan inyina! Ẹrol li ịdipho!