Bụo aRom 14 - Ạḍinya Iigbia

Kásophonaan ọoruen ọnyo asiya ạna

¹ Ịloghoma ni sịphe ogbo phọ anyina oye lọ omeeraam mọ ọdi adugh, kụ ọlo kẹ́nunuan ghan rꞌọdi ịlo ạraraar lọ eḍighi ḅạphanya ọdi.

² Ooni oye ọ́tuan omeeraam mọ ọdi ogbi ịyaar, kụ ooni oye lọ omeeraam mọ ọdi adugh ạḅem mọ ọno ale ghan ịikiripha bịn.

³ Kụ ọpo ịyaar úgbi bọ kụ́ḍagha nyọpo agbi bọ! Ọpo rale ghan bọ ịikiripha phọ bịn kúsoph ọoruen upume nyọpo ịyaar úgbi bọ, ịdi eḍighi bọ Ẹnaan mẹlhoghoma nyọdi!

⁴ Nạ phọ eeghe ọdo oye dị kasophonaan erugh ọony-otu ọnon oye? Ọde-otu phọ ọdi kụ kasoph ọoruen mọ ọdi ạpioman mọ ọ́pioman. Kósophonaan nyọdi erugh apum, ịdi eḍighi bọ Ọde-otu phọ ọdi kaḍighan ni nyọdi.

⁵ Ooni oye ragbi ghan mọ aḍiniin aḍughul-otu kụ ịman mạar epu ịpheri phọ, kụ ooni oye ragbi ghan mọ oomo phọ asiḍughul-otu phọ eeleeny ni. Uwo ologhi ọdi ạmaar ạpham ologhi ọdi!

⁶ Tọrobo oye lọ raako ghan ḍiniin aḍughul-otu, pọ ịlo ọloghom eghuan Ọmoogh-we phọ ni. Oye lọ ịyaar úgbi, pọ ịlo ọloghom eghuan Ọmoogh-we phọ ni, ịdi eḍighi bọ ọdi rakol ghan ni ẹmhu eḍien phọ ọdi alhe bọ kạseph Ẹnaan. Oye lọ agbiighi rạraar olhe, pọ ịlo ọloghom eghuan Ọmoogh-we phọ ni, kụ ạḅile ni rạsephom ghan Ọmoogh-we phọ.

⁷ Rꞌoniin ọnyo ayira dị odimom ghan rꞌẹmhu ọdi bịn ólho. Rꞌoniin ọnyo ayira dị kamughom rꞌẹmhu ọdi bịn ólho.

⁸ Yira oḍum, pọ uḍumanaan ni Ọmoogh-we phọ. Eḍighi ịduon phọ, mọ uḍum ni mọ umugh ni, pọ yira ạbuo Ọmoogh-we phọ ni.

⁹ AKraist amugh ni kụ ạḅile aḅetenu sịphe aḍuugh phọ pịdi ọdi aḍighi Ọmoogh-we ạbulo odi rꞌạbulo momuughu.

¹⁰ Nạ uḍighi ika nụun kụ rasoph ghan bọ erugh kạḅam ẹmhu ọnyo asiya phọ ạna? Kụ nạ uḍighi ika nụun kụ rakel ghan bọ ọnyo asiya phọ ạna? Oomo phọ ayira kọmeera ni ghisigh Ẹnaan kụ ọdi aagbo ịiruen ayira,

¹¹ ịdi eḍighi bọ ạḍinya iigbia phọ rẹḅem ghan mọ, “Ọmoogh-we phọ rạḅem ghan mọ, ịduon mị odi bọ ni, tọrobo oye kakpuḍian ghisigh ạmi kụ ạgba ghan amitiom mọ ạmi Ẹnaan.”

¹² Tọrobo ọnyo ayira kạkaaph ghan ni ịlo ẹmhu ọdi ạḅeni Ẹnaan.

Íḍighi ghan ịlo ọnyo asiya kameel aḍighanaan ịkaraph

¹³ Loor ịduon phọ, ọwile ịkpalaghan! Kpạripe ghụn, igbiighi iloghi phọ anyina, bịn ẹwile oḍighi ịyaar lọ ọnyo asiya phọ anyina kakpeteghaan, ḅịle keḍighi ịdi ọdi kameel aḍighanaan ịkaraph.

¹⁴ Ịdipho mị mạḅophoghan bọ Jịzos Ọmoogh-we phọ, mị alegheri ni akuphom owol mọ rꞌịyaar iigbia ílho ghan. Eḍighi mạar dị oye ameeraam mọ ịyaar iigbia edi ghan ni, pọ ọdi bịn kụ ạsighe ni ologhi ọdi agbiighiom mọ ẹpe phọ ạḅaphanya ọno.

¹⁵ Eḍighi mạar dị nạ ale ịyaar dị umor ạna agbi, kụ ẹeḅaghami ologhi ọdi, pọ nạ ráḍighi mun ịlo ẹphomoghian esi ọdi. Kámeera ịyaar phọ ẹpe nạ ale bọ ạlogh ọkuruḅaka ạna ephiemi ghuḍum oye phọ ọpo aKraist aghol bọ amugh.

¹⁶ Kémeera awe oghol ḍịkaraph aḍien ịyaar phọ ẹpe ịḅeeraan bọ inyina.

¹⁷ Ọmar phọ kꞌẸnaan ólhoonaan ile rꞌịpughol, odianaan ghụn ruukuan, rꞌẹepho, rꞌibo phọ Uwaloor Iigbia phọ rạngo ghan bọ.

¹⁸ Kụ ọlo ạtuugh reten phọ ịphen kụ raḍighi ghan oḍighi kạngo Kraist, pọ Ẹnaan mẹsighe ẹloghoma, ḅịle kẹn awe omeeraam mọ ọdi ạnighe ni.

¹⁹ Loor ịduon phọ, ọḅam iloghi phọ ayira esi ạraraar phọ rẹsighe ghan bọ ẹepho kụ keru, ẹḅile bọ rẹloghonaan ghan ḍịghaagh ọkparamiom awe!

²⁰ Kạ́tuan eḍien apiemi ịpe Ẹnaan meḍighi bọ. Oomo ariiḍien ẹkpe ghan ni olhe, kụ ebeeph ni olhe ghan eḍien lọ keḍighi dị ọnon oye kameel aḍighanaan ịkaraph.

²¹ Ịdi ẹkpe ghụn oḍighi ọwile ạa ẹnam, ọphughol amiim, ḅịle mọ ẹnon ịyaar lọ nạ aḍighi, kụ kekoton ọnyo asiya phọ ạna eler.

²² Ẹnaan rꞌạna bịn kụ ilegheri ịpe edi bọ ologhi phọ ạna ịlo ịphen phọ! Ạḍiseph edianaan ni oye phọ ọpo ụ́moogh bọ okaphian oomiigh mem lọ ọdi maḍighi ịpe ịitughian phọ ọdi egbiighi bọ mọ ẹnighe ni phọ.

²³ Eḍighi mạar dị ọdi ạmoogh okaphian oomiigh ịlo ịyaar phọ ẹpe ọdi alhe bọ, pọ Ẹnaan mephume nyọdi erugh, ịdi eḍighi bọ ọdi ọ́sighe omeeraam mọ ọdi kụ aḍighinom. Tọrobo ịyaar lọ ụ́sighe omeeraam kụ oḍighinom, pọ ịkaraph.