Bụo aRom 12 - Ạḍinya Iigbia

Ạdol oḍighinom ghan oḍighi phọ Ẹnaan

¹ Bụo asiya, loor iboom ighirigiir phọ ịphen Ẹnaan rịnma ghan bọ iyira, mị rạlom ni mọ ịḅogh loor phọ anyina imoom eḍighinom ịyaar aghuḍum aruukuan dị Ẹnaan kẹsighe, ẹngo nyọdi. Ẹkpianaan ooseeny ghan ọdi ịduon phọ bịn.

² Kémeera mọ awe aḅirini phọ ịpiloghom inyina ọḅologh ọghighima. Ẹnaan kụ ẹḅol ghụn iloghi phọ anyina ẹghighemi nyọpo ọdi bịn kụ nyina egbi olegheri ịitughian phọ ọdi — ịpe ẹnighe bọ, ẹḅeeraan bọ nyọdi kụ eseleman bọ.

³ Mị ạtuan ni ịdipho Ẹnaan ẹnma bọ ighirigiir iḍighi ịmi otelhedom mọ kụ rạḅeni bọ oomo phọ anyina mọ kẹ́etughian ghan ịitughian dị ipel inyina loor. Tọrobo ọnyo anyina ạtuugh ghan ghụn ịitughian dị ẹkasian rꞌomeeraam mọ Ẹnaan ẹngo bọ nyọdi kụ ạatughian ghan!

⁴ Esi kịrokiro kụ itulughan bọ eḍighi ḍiniin phọ aloor phọ, kụ oḍighi ọlo esi rꞌesi.

⁵ Igina phọ kẹn ni, ghạlamo ịdipho aḍita phọ ayira ẹbugh bọ ni, yira mọḅophoghan Kraist oḍighi ḍiniin aloor, kụ oniin atulan nyoniin ịdipho ariisi aloor phọ.

⁶ Ịdipho Ẹnaan ịnma bọ iyira ighirigiir phọ eenmo ruunmo kịrokiro, uwo ịlo ọdi ạsighe ịlo ọdi aḍighinom oḍighi! Bụlo Ẹnaan egananami ọghaaph kụ ẹngo, ọghaaph ghan ịdi ẹkasian rꞌomeeraam mọ ạbidi!

⁷ Eḍighi ooghiraan, pọ ooghiraan ghan ni! Eḍighi ịtughemi, pọ ọtughemi ghan ni!

⁸ Eḍighi ọghaaph ọkparamiom iloghi ạbunon, pọ ọghaaph ghan ni ọkparamiom! Eḍighi onmo inmo, pọ kụ́logh ghan ạaku! Eḍighi ịtooghi, pọ ọtooghiom ghan ni rꞌoomo ologhi! Eḍighi ọlogh ghan ạḍighaagh ọngo awe, pọ ọmiloghom ghan ni!

⁹ Ẹphomoghian kị́ḅaram ghan rꞌẹnum ịikpukian. Ikel ịkaraph, ẹphamanam ịlo ẹnighe.

¹⁰ Oniin ạphomoghian ghan nyoniin ịdipho ạnmuny-onhiin! Oniin ạphurom ghan aghueni nyoniin!

¹¹ Ịkpar ḍịghaagh, oye kụ́gbogholeer ghan. Ịsighe ẹenyuum Uwaloor Iigbia phọ eḍighinom ghan oḍighi ọngo Ọmoogh-we phọ.

¹² Oḍuom ologhi phọ nyina ẹmoogh bọ ịngo ghan inyina iboh! Ịkparam ghan ịminimiin phọ anyina ẹeḅereghi ghan oomo amem.

¹³ Ịngaani ghan bụo asiya lọ ekuom ịlo nyina ẹmoogh, ẹlhogh ghan otu ruuruen eghuraam.

¹⁴ Ịlom ghan Ẹnaan mọ ọdi ạseph ghan kútonyon bụphe rịgbiphoghom bọ inyina.

¹⁵ Bụlo robo iboh, iḍighan ebo aani, eḍighan bụlo romoghi emoghi aani.

¹⁶ Ịtolom oomo phọ awe phọ nyeniin ẹrolom. Kébaga ghan, iḍighom ghan ni ighiil awe. Kẹ́etughian ghan mọ nyina kụ ilegheri ịyaar.

¹⁷ Oye iḍighi inyina ịkaraph, kẹ́kpiom ghan ịkaraph. Ịkpatian ghan oḍighi ịdi awe inyina kị́ḍagha ghan.

¹⁸ Bin mụo anyina, iḍighi ghan oomo ịlo nyina ketue, ẹrolom ẹepho rꞌoomo awe.

¹⁹ Iiḅi asiya, kéḅulemian ghan oye ịkaraph, ịbilenaan ghụn Ẹnaan kụ ẹlhiom ghan. Ọge ni pạ ạḍinya iigbia phọ mọ, “Ọmoogh-we phọ ạḅem mọ mị kụ kaḅulemian. Mị kụ kạkpe.”

²⁰ Kpạripe ghụn rꞌoḅulemian, ẹnon esi ẹḅem ni mọ, “Ạmulogh-ḍien ạna lọ ọkoony rasiph, ngọ ghan ni eḍien. Mọ ạmuum kụ rạpu, ngọ ni ọdi ạphughol. Ịduon phọ kụ ịdi nạ kakiighe nyọdi umugholoor.”

²¹ Kémeera ịkaraph ẹkpar ipu inyina, ịsighe igey kụ ezuoghom ịkaraph.