Bụo aRom 11 - Ạḍinya Iigbia

Ighirigiir phọ Ẹnaan ẹnma bọ weye phọ Ịzirel

¹ Mị ạḅile ni rapuru mọ, “Ẹnaan ighel li we phọ ọdi ḍụghum?” Kị́dipho. Mị phọ rꞌaloor ạmi ọnyo Ịzirel sịphe ẹemara Ebraham rꞌeghun phọ ạBenjamin.

² Ẹnaan ke̋ghel we phọ ọdi ạsaḅar bọ kꞌagediidi phọ. Nyina ílegheri ḍịen esi ạḍinya iigbia phọ ọge bọ ịpe Ilaija ạghaaph bọ ịlo aweye phọ Ịzirel ạḅeni Ẹnaan mọ,

³ “Ọmoogh-we, bịdi mọze riil phọ ạna, ọḅile ogborion renmeny ạrikia phọ ạna. Ogina ạmi bịn usugha, kụ bịdi rọwa ni oghiigh aani ạmi.”

⁴ Ẹnaan ịphagharanaan nyọdi ika? Mọ, “Mị aseerian ni oḍual ọonir awe dị kꞌekulha ụ́uḅereghi aani Baal, ẹmugh ọkpe phọ.”

⁵ Igina phọ kẹn kụ edi ni nyịidipho phọ. Mạman awe dị Ẹnaan ẹnma ighirigiir ẹsaḅar odi ni.

⁶ Ọdi ạnma ighirigiir, ọ́tuan iiḍighi ạbidi kụ ạsaḅar bọ bịdi. Mọ Ẹnaan rẹtuan ghan iiḍighi kụ kẹsaḅar we ẹsighe, ọbo ọnma ighirigiir ọ́moogh mun ẹmhu.

⁷ Kụ oḍighi ika? Aweye phọ Ịzirel ụ́miin ịpe bịdi ọwa ghan bọ. Mạman awe phọ Ẹnaan ẹsaḅar bọ ẹsighe bịn kụ ụmiin ịpe bịdi ọwa ghan bọ. Ẹnaan ímeera mọ ạḍimagh phọ ọdi ạal iḍigh rụru ạbueri phọ.

⁸ Ịdipho ọge bọ pạ ạḍinya iigbia phọ mọ, “Ẹnaan ịngo ni bịdi iyeghegheeny iloghi; kꞌarodon phọ ni bịn bịdi kőrue ọmiinom eten riḍien phọ ạbidi, ọḅile ọnaghanan ḍụghum reḅeri phọ ạbidi.”

⁹ ADevid ạḅem aani ni mọ, “Ọbo amalhe phọ ạbidi kụ aḍighi ḍiphil dị kesiph bịdi, rꞌạghele dị bịdi kosuma, rꞌịka dị bịdi komeleghuom!

¹⁰ Ariḍien phọ ạbidi eḍighi ikpom, ọbo bịdi kọmiin ghan bọ eten! Ịiḅaghami phọ ẹngo bịdi eḅu-ọman!”

¹¹ Mị ạḅile ni rapuru mọ, “Ạbuo aJu phọ okpetaan bọ umeel li emeel dị kótue oḅetenu ḍụghum?” Eeye. Loor ịkaraph phọ bụo aJu phọ oḍighi bọ, aruuruen phọ mọmoogh pẹleeny, ọbo ẹghagh iloghi ạbuo aJu phọ.

¹² Ịdipho ịkaraph ạbuo aJu phọ ẹsighe bọ ẹeḍiom ạḍiseph kụ eruom aḅirini phọ, ḅịle ọghanyanu phọ ạbidi ạsighe bọ ẹeḍiom ạḍiseph kụ aruom ruuruen phọ, ịkiom nụun ologhi ịdi ẹeḍiom ạḍiseph phọ kẹbugh mem dị kọloghom aani bọ bụo aJu phọ omuneni.

Ạpeleeny ọlo aruuruen phọ

¹³ Nyịidipho mị ạkaaph riphoghomiom inyina aruuruen phọ. Ịdipho muḍighi bọ ịmi otelhedom aruuruen phọ, ẹegu-ọman ạmi ẹbugh ni esi oḍighi phọ.

¹⁴ Iini ghụn sịen ịdipho mị aaphughemi ghan bọ ruuruen phọ kụ ẹdi mị kạpelom buniin ạbuo eelhe phọ ạmi atene.

¹⁵ Mem mọ Ẹnaan eghel bọ bịdi, ịsighe ni ruuruen phọ kụ ẹloghoma. Kẹtol ika nụun mem mọ Ẹnaan kẹloghoma bọ bịdi? Kẹkigh mụdi bịdi mosi ni kụ origheel.

¹⁶ Ọḅel ọpherepe ạbred phọ kụ oseenaan Ẹnaan, pọ oomo eeḅoghoḍi ạbred phọ ẹlo ọdi aani ni. Ḅịle sịni oreeny phọ kụ oseenaan Ẹnaan, pọ ịla phọ ịlo ọdi aani ni.

¹⁷ Moḅonyon iniin ịla ọliv phọ ọzuph bọ otoph, ọsighe oniin ọla ọliv elegheḍum otu otulom. Nạ ooruen phọ ạkigh ọliv elegheḍum mọ kụ nyịidipho nạ rapin aani bin ẹeḍiom ạmayagh ạsini aghuḍum ạbuo aJu phọ.

¹⁸ Loor ịduon phọ, kạ́ḅitonaan bụphe oḅonyon bọ oroph ịdipho ịla oreeny phọ. Nạ kakol bọ eeghe kụ abaga? Nạ oniin ọla bịn. Nạ kụ ọ́pham bọ sịni phọ; ạsini phọ kụ ịpham nyịna.

¹⁹ Kụ nạ kameeraam ni mọ, “Ii, kụ ọlo uḅonyon ịla phọ oroph lọ eepoogh kimitenaan ịmi.”

²⁰ Ịduon phọ ni, uḅonyon bịdi oroph ịdi eḍighi bọ bịdi úmeeraam, kụ nạ phọ mameeraam bọ odi ni esi phọ ạna. Bịleghi obaga phọ, gona ghụn loor.

²¹ Ịdipho Ẹnaan ị́bilenaan bọ bụo aJu phọ ọghigh bọ ịla dị emite ni loor oreeny phọ, nạ ragbi mọ ọdi kạwilenaan ni nyịna ḍụghum?

²² Ịphen phọ kụ iḍeenaan iyira mọ Ẹnaan edugh ni kụ ạri ẹkpar ri. Ọdi rạ́nma ghan ighirigiir bụphe mọghanyanu bọ, kụ rạnma ghan ni nyịna ighirigiir lọ nạ aloghoma ghan ni ọnma ighirigiir phọ ọdi. Mọ nạ óloghoma, pọ kosoph aani ni nyịna otoph.

²³ Bụo aJu phọ kụ ọwile ni emeeraam mọ ạbidi, Ẹnaan ẹmoogh ni ịikpo ọḅile ọsighe ạbidi oḅulemi otulom ọla oreeny phọ bịdi ọrol ghan bọ.

²⁴ Nạ ooruen phọ ạkigh ọla ọliv elegheḍum dị moḅoghoron oroph, mụdi ạmagh kụ amite kụ ọḅile bọ ọsighe otulom ọliv phọ ọzuph bọ. Bụo aJu phọ ọkigh ọliv phọ ọphon ọzuph bọ, kụ kedugh ịikia esi Ẹnaan ọsighe ịla phọ ịphen oḅonyon bọ oroph oḅulemi otulughiom ariisi oreeny phọ ạbidi.

Ẹnaan rẹnma ghan ighirigiir oomo awe

²⁵ Bụo asiya, mị inyina kạ̋aghinaan ịyaar ịbooghian phọ ẹphen, ọbo nyina kepe ghan bọ ologhi ẹetughian ịlo olegheri-ịyaar phọ anyina. Ilegheri mọ ọḅaar ẹmhu aweye phọ Ịzirel órigheel bịn, kạtol li tụtu aḍita aruuruen phọ kọdaph bọ Ẹnaan emunughan.

²⁶ Ịduon kụ ịdi kọpel bọ oomo aweye phọ Ịzirel otene. Ịdipho ọge bọ pạ ạḍinya iigbia phọ mọ, “Ọpelia phọ kamite Zạyon. Sịphe ẹemara phọ ạJekob, ọdi kạsighe ni oomo elegheri Ẹnaan.

²⁷ Mị rọwilenaan ịkaraph phọ ạbidi, pọ mị mamuneni ịko ịyo phọ mị aghiran bọ bịdi.”

²⁸ Ịdipho bụo aJu phọ oghel bọ ooḅi ọghaaph phọ, Ẹnaan mẹlhogh bịdi ḍien, ọbo eepoogh imitenaan inyina aruuruen phọ. Kụ ọtuan ịdipho Ẹnaan ẹsaḅar bọ bụo aJu phọ ẹsighe, ọdi akol li ẹmhu abugbogh ạburude phọ ạbidi ạloghoma aani bịdi.

²⁹ Ẹnaan rénme ghan ịitughian ọdi ịlo aruunmo lọ ọdi raanmo ghan rꞌịlo awe lọ ọdi kạsaḅar.

³⁰ Mem dị meten, nyina aruuruen phọ ị́naghanan Ẹnaan, kụ nyịidipho Ẹnaan mịnma inyina ighirigiir, ịdi eḍighi bọ ạbuo aJu phọ ụ́naghanan.

³¹ Igina phọ kẹn, loor ighirigiir phọ ọdi mịnma bọ inyina, bụo aJu phọ nyịidipho Ẹnaan rọ́naghanan, ọbo ọnma aani bịdi ighirigiir.

³² Ẹnaan meḍighi ịdi oomo awe phọ momeel oḍighanaan ẹnaghanan dị ịlo ọotoghonaan ílho ọbo ọdi ạnma ighirigiir oomo phọ ạbidi.

Iboh ẹrolonaan Ẹnaan!

³³ Ẹeḍiom ẹelha phọ Ẹnaan ẹbugh ni iboom. Olegheri-ịyaar rꞌịitughian phọ Ẹnaan eekuna ílho ghan. Ạnhian kụ katue alegheri rigbiom mọ ọdi?

³⁴ Ịdipho ạḍinya iigbia phọ ẹḅem mọ, “Ạnhian kụ alegheri ịitughian Ọmoogh-we phọ? Ạnhian kụ katue atomoghiom nyọdi?

³⁵ Ạnhian kụ matene ghan nyọdi ọmugh dị ọdi kạkpe?”

³⁶ Ọdi kụ ạlhem bọ oomo ạraraar phọ. Oomo ạraraar phọ ụtuan nyọdi kụ ọlhem bọ mọ eḍighi ịpe ọdi ạtooghi bọ. Eegu kụ ẹrolonaan nyọdi kꞌagee-pọ! Ẹrol li ịdipho!