Bụo aHibru 8 - Ạḍinya Iigbia

ẠJizos uwo ẹmhu oyil ạrikia phọ ayira

¹ Ẹmhu ịphen yoor rọkaaph ghan bọ ịduon: yira ọmoogh uwo ẹmhu oyil ạrikia dị ạrol ịduon. Ọdi mạrol ude ẹpe kꞌạke ḍịghaagh elhiom ạgada ọdaam Egbogh Ẹnaan phọ.

² Ọdi raḍighi ghan oḍighi uwo ẹmhu oyil ạrikia sịphe Ẹphan phọ, sịphe ọkaraghi ogbogo ịiḅereghi phọ ọpo Ọmoogh-we kụ ạlogh bọ, awe kụ ụ́logh bọ.

³ Tọrobo uwo ẹmhu oyil ạrikia rọma ghan mọ ạngo ghan Ẹnaan inmo, ạḅile ạsighe ịnam ạphinyonom ghan rịkia. Kụ esi ịduon phọ, ịkpianaan ni dị uwo ẹmhu oyil ạrikia phọ ayira kạmoogh aani ịyaar ọngo.

⁴ Mọ ọdi ạrol sịen ade phọ, ọbo ọdi múḍighi roḍighi oyil ạrikia, loor esi dị ariil ạrikia odi bọ ni, dị rọngo ghan inmo, ịdipho iilogh phọ aMozis ẹḅem bọ.

⁵ Oḍighi phọ ariil ạrikia phọ ạbuphe phọ roḍighi yogh ghan bọ, aḍighi ịtuughaany rꞌoogho ọpo roḍighi bọ ẹpe kꞌạke. Igina phọ ịphen phọ kụ ịrolonaan bọ ni Mozis. Mem mọ dị rạnyaaghian bọ ọlogh Ogbogo Ạdol Ọmoogh-we phọ, Ẹnaan ịḅeni ni nyọdi mọ, “Mạar ạlogh oomo ariisi phọ ẹghigh ọdo phọ ọpo oḍeenaan bọ nyịna sịphe eegum mọ.”

⁶ Kụ ịdi edi bọ nyịidipho, mọngo Jịzos oḍighi dị ạbugh apu nyọpo ạbidi, ịdipho kẹn ịyo phọ dị aghiremi bọ Ẹnaan rꞌawe, ẹnighe bọ epu ịḅel phọ, ịdi eḍighi bọ ạraraar dị ịphen phọ eguanaan kụ ịnighe epu ịḅel phọ.

⁷ Mọ ọpioman kụ mụ́tol bọ ịḅel ịyo phọ, ọbo mụ́utughian mun oghiran ịlo emuneniom ịyal.

⁸ Kụ Ẹnaan mẹmiin ọpioman awe phọ ọdi kụ rẹḅem ghan bọ mọ, “Ọmoogh-we phọ rạḅem ghan mọ ariiḍio retu ni, dị mị kakiran imoom ịyo rꞌaweye phọ Ịzirel, ḅịle rꞌeghunotu phọ aJuda.

⁹ Kẹ́kigh ịpe mị aghiran bọ rꞌabugbogh ạburude phọ ạbidi, ḍio phọ mị ạpham bọ ḍịghaagh phọ ạbidi oḍiemiom ạbidi ọḍua eelhe phọ Ijipt. Bịdi ụ́tolom ọnhu ịyo phọ mị aghiran bọ rꞌạbidi, kụ mị ạḅitonaan bọ bịdi.

¹⁰ Nyịidipho ịphen kụ ịyo phọ mị kakiran bọ rꞌaweye phọ Ịzirel, riiḍio phọ ịpe retu bọ. Mị kạsighe iilogh phọ ạmi, ạlogh sịphe ịitughian phọ ạbidi, kụ ạgeeghi sịphe iloghi phọ ạbidi. Mị kaḍighi Ẹnaan ạbidi, kụ bịdi oḍighi weye ạmi.

¹¹ Onyoogbo onyoogbo ọdi kạ́tughemi ghan mun, ạḅile ạkaaph ghan ạḅeni umor ọdi mọ, ‘Legheri Ọmoogh-we phọ,’ ịdi eḍighi bọ oomo phọ ạbidi kulegheri ni ịmi, emiigh kꞌọbam kụ ẹteeny kꞌogbogh.

¹² Mị kạnma ni ighirigiir ạbilenaan sịpioghom mọ ạbidi, ḅịle kẹn mị kạ́atughian mun ịkaraph phọ ạbidi.”

¹³ Ọghaaph ghan oghol imoom ịyo phọ eḍeenaan mọ Ẹnaan metene ịḅel phọ igbaany. Kụ tọrobo ịyaar lọ reḍighi egbaany rẹkporoghaan ghan ni bịn mọony amem ụ́miin mun.