Bụo aHibru 6 - Ạḍinya Iigbia

¹ Mẹkpe dị yira kọbile ịḅel ạraraar adom mọ Ẹnaan, omiigh ọtuugha ịpe mẹghurom bọ mụum mọ. Kụ́ḅile mun uuḅula ịḅel phọ ịpe ọtughemi bọ, mọ ọwile eepua oḍighi, omeeraam Ẹnaan,

² olegheri ịlo owurogh ghan ạrumuum, rꞌọḅamaghi ạraghaagh rụmhu, ịlo oḅerion ghan awe esi aḍuugh, ḅịle rꞌịiruen dị kẹtol li kꞌagee-pọ.

³ Ọghi ghụn ghisigh! Kụ Ẹnaan emeera ni, yira kọtuugh ni ịduon phọ kụ oḍighi.

⁴ Kụ ika nụun kụ ẹdi kọḅile bọ otue ọpam bụphe mọpiom bọ eten phọ oḅulemi mọ ọḅile okiton esi ịkaraph phọ ạbidi. Bụen phọ mọrol ghan ni sịphe ạḍiḅaal phọ Ẹnaan. Bịdi mọonema ni ruunmo phọ kꞌạke. Uwaloor Iigbia phọ ạḅile asoorom aani bịdi.

⁵ Bịdi mọonema ni ọmiin ịdi ikpo ọnhu phọ Ẹnaan rẹdugh, ọḅile ologhoma ịikpo aḅirini phọ ratu bọ,

⁶ kụ ogbi bọ ọpiom eten phọ. Kótue mun ọpam bịdi oḅulemi mọ ọḅile okiton esi ịkaraph phọ ạbidi, ịdi eḍighi bọ mọḅile rọkan Mọony phọ Ẹnaan loor oreeny phọ ọyegherenom ọdi esi ogbo.

⁷ Ẹnaan rẹseph ghan de lọ rẹmooph ghan mụum ọlophia phọ ọpo ragbor ghan bọ kạloph, ḅịle kẹn ạraraar phọ ịpe ọzuphogh bọ remite ghan keḍighi sụo ẹngo bụphe ọzuphanaan bọ.

⁸ Kụ ade lọ iitoor rꞌạroogho bịn kụ resiighi ghan ị́moogh ịyaar oḍighinom, mẹrol repogh dị Ẹnaan ketunyon, ḅịle ạnian kụ kele epiemi.

⁹ Iiḅi asiya, ghạlamo ịduon yoor rịphur bọ ni inyina rụru ịlo ịphen phọ, bịn yoor mọmiin ịdi ạroozo phọ anyina rẹmalaam kụ moḍuom ologhi mọ nyina kẹmoogh ni pẹleeny.

¹⁰ Ẹnaan kóye dị kabula oḍighi phọ nyina eḍighi bọ, ḅịle rꞌẹphomoghian phọ nyina ẹmooghom bọ nyọdi sịphe ạḍighaagh phọ nyina ẹloghonaan ghan bọ kụ rẹloghonaan bọ ni bụo asiya phọ anyina.

¹¹ Rịphu ni iyoor iboom mọ tọrobo ọnyo anyina ạghologholomi ni loor ọdi sịphe oḍighi phọ ạteenye eekuna phọ, pịdi ạraraar phọ ịpe nyina eḍuom bọ ologhi phọ emite ịdipho nyina rẹwa bọ.

¹² Yoor rọ́wa mọ ịmoogh ẹgbogholeer. Ịtuughaany ghụn bụphe oghol bọ omeeraam mọ rꞌọkparam mọ kụ ropin aani bọ bin ịpe Ẹnaan eguanaan bọ.

Ẹnaan rébi ghan ịlo dị aguanaan

¹³ Mem mọ Ẹnaan eguanaan bọ Ebraham oguan phọ, ọdi aghunyian ni mọ ọno kaḍighi ni ịpe ọno maguanaan bọ. Kụ ịdipho ọnon oye dị ạbugh apu nyọdi úlho bọ, ọdi ạsighe loor phọ ọdi kụ aghunyaam iikunya phọ.

¹⁴ Ọdi ạḅem mọ, “Mị aguanaan ni nyịna ạkparami, mọ mị kạngo ni nyịna ḍịseph, nạ ạḅile ạmar ọote atum ọote.”

¹⁵ Kụ Ebraham mạkparam bọ ni akori kụ ạar bọ ịpe Ẹnaan eguanaan bọ.

¹⁶ Oye lọ rakunyian rakol ghan ḍien ọlo ạbugh apu nyọdi kụ kaghunyanam, kụ iikunya kụ rẹpoomi ghan oomo ịnunian.

¹⁷ Ẹnaan ịwa ni ogananami oḍeenaan ạbuphe kọboor bọ ịpe ọdi aguanaan bọ mọ ọno kánme ịitughian phọ ọno. Ịduon phọ, pọ ọdi ạsighe iikunyian phọ kụ ạḅaram oguan phọ.

¹⁸ Ịyal phọ ạraraar phọ ịphen phọ rénmia ghan bọ, kụ Ẹnaan iyira ọkpe kị́gbaam bọ, imoogh ni iyira phọ moḍigh bọ ḍibuo phọ ọdi, ọpham oḍuom ologhi phọ ọpo odi bọ ghisigh phọ ayira ọkparami.

¹⁹ Oḍuom ologhi phọ ọphon phọ ạkigh ịdipho ẹkan dị ọkananaan ruwaloor phọ ayira; oogho ni oseere ḅịle kẹn rápiigha ghan. Oḍuom ologhi phọ ọphon phọ raḍigh ghan ni kꞌạke katenom ọman ukpe phọ osophom bọ, ạghi asi Ẹphan phọ.

²⁰ ẠJizos maghol rụmhu ayira ạpur ạki ẹpe phọ. Ọdi maḍighi uwo ẹmhu oyil ạrikia kꞌagee-pọ sịphe ạbaay ariil ạrikia phọ kꞌạMelkizedek.