Bụo aHibru 4 - Ạḍinya Iigbia

¹ Ịdipho oguan phọ Ẹnaan mọ yira koḍigh aani ni dọl ophooghian phọ ọno udianaan bọ ni iyira, ẹkpe ghụn ni dị yira komiigha loor ọbo rꞌoniin ọnyo anyina kạpiom ghan bọ owol oḍigh aani ạdol ophooghian phọ ạḍiphe phọ.

² Yira mọnaghan ni ooḅi ọghaaph phọ ịdipho bụo ọrugh phọ aMozis ọnaghan bọ. Ọghaaph phọ bịdi ọnaghan bọ bịdi sụo ọ́ngo, ịdi eḍighi bọ bịdi ụ́sighe omeeraam kụ ọnaghanam bọ.

³ Yira phọ momeeraam bọ kụ roḍigh ghan dọl ophooghian phọ Ẹnaan. Emeghenom ịdipho ọdi ạḅem bọ mọ, “Mị ụghagh ni ologhi kụ aghunya mọ ‘Bịdi kóḍigh aani dọl ophooghian phọ ạmi.’” Ọdi ạḅem ni ịphen phọ, ghạlamo ịdipho oḍighi phọ ọdi amuneen bọ ni kꞌamem mọ dị ạlhem bọ aḅirini phọ.

⁴ Eniin esi sịphe Ạḍinya Iigbia phọ ọkaaph ịphen ịlo aḍio phọ ạḍiphe emuneniom bọ oḍual phọ mọ, “Ẹnaan iphooghian esi oomo iiḍighi phọ ọdi, ḍio phọ ạḍiphe emuneniom bọ oḍual phọ.”

⁵ Ọḅile kẹn ni ọkaaph ogina phọ ọghaaph phọ ọphon mọ, “Bịdi kóḍigh aani dọl ophooghian phọ ạmi.”

⁶ Ạbuḅel phọ ọnaghan bọ ooḅi ọghaaph phọ ụpiom ni owol bịn úḍigh aani dọl ophooghian phọ Ẹnaan, ịdi eḍighi bọ bịdi úmeeraam; kụ ạbunon ạbudi momeeraam koḍigh ni.

⁷ Ịphen phọ ẹmeeraam ịdipho Ẹnaan egu bọ ḍịnon aḍio dị oghol mọ “arodon.” Ịbadi ạsia meten ni kụ ọdi ạḅeni bọ Devid mọ ạghaaph ịlo ịphen phọ, sịphe ẹkpigh ạḍinya iigbia phọ moghol bọ ni mọ, “Rodon, mem lọ nyina ẹnaghan ẹḍogh phọ Ẹnaan, kẹ́ḅaar mun ẹmhu.”

⁸ Eru mạar dị aJosua aḍiemiom ni we phọ asiemi esi ophooghian phọ Ẹnaan, Ẹnaan mị́ḅile mun ịkaaph ikol ḍịnon aḍio.

⁹ Ọtuan ịduon phọ ẹrol bọ, oseenaan ni we phọ Ẹnaan dọl ophooghian, dị ẹghighom ḍio phọ emuneniom oḍual phọ Ẹnaan ephooghian bọ.

¹⁰ Tọrobo oye lọ maḍigh dọl ophooghian phọ Ẹnaan, pọ rapooghian esi oḍighi phọ ọdi, ịdipho Ẹnaan ephooghian bọ.

¹¹ Loor ịphen phọ, ọkparami igey ḍịghaagh oḍighi ghan ịlo yira koḍigh dọl ophooghian phọ Ẹnaan! Rꞌoniin ọnyo ayira kụ́ḅaar ẹmhu, ịdipho ạbuḅel phọ oḍighi bọ kụ ophe bọ eten phọ.

¹² Ikpo ọnhu phọ Ẹnaan rẹḅa ni eye, ḅịle relom ni. Etoph epu elhool ẹgham ịyal ọman, egim ghan ni rẹteeny ọku uwaloor rꞌaghuḍum, ḅịle ọphuuny rꞌạriikpighonu. Rẹeḅeghion ghan ni ịitughian rꞌiloghi awe phọ kephogh.

¹³ Ịyaar dị kọbooghinaan Ẹnaan ílho ghan. Ozu ni ạwaay oomo ạraraar phọ ọlhem bọ, mọ ọdi ạmiin ghan. Kụ ọdi kụ ẹdi oomo phọ ayira kọkaaph bọ ịlo yira moḍighi oḍighi phọ ọḅeni.

ẠJizos ogbogh oyil ạrikia phọ

¹⁴ Esi ịphen phọ, ọpham ghụn omeeraam mọ ayira ọkparami, ịdi eḍighi bọ yira ọmoogh ni ogbogh uwo ẹmhu oyil ạrikia, ạJizos Kraist Ọony phọ Ẹnaan, dị mạghi ni asi ọkaraghi egbodo phọ Ẹnaan!

¹⁵ Oyil abiil phọ ayira aḍighi ni oye dị alegheri igbiririph mọ yira odugh ni. Esi dị uwo ẹmhu oyil ạrikia phọ ayira ạgbatanaan, ịsiphe ọdegh bọ ni nyọdi ophogh oomo areten ịdipho ayira, kụ ọdi úmeel bọ uḍighanaan ịkaraph phọ.

¹⁶ Ọpham oḍuom ologhi orumom ghan sịphe ạgada ọdaam ẹmha phọ Ẹnaan ọghor phọ odi ghan bọ! Sịphe kụ ẹdi yira kọmoogh ọnma ighirigiir, ọḅile ọboor ọghor dị kụloghonaan ghan iyira ḍịghaagh mem lọ ikuom iyira.