Bụo aHibru 2 - Ạḍinya Iigbia

Oboom mọ ạpeleeny phọ

¹ Ịdipho kụ ịdi ẹkpe bọ ni dị yira kọkuami ọpam igey phọ yira mọnaghan bọ ọkananaam, ọbo yira kọkororo ghan bọ omeel.

² Ịdipho ikpo ọnhu adom mọ ạruukpaany phọ Ẹnaan orelhe bọ ẹmoogh bọ ni ịnyaam dị oye lọ ụ́naghanan ụḅile ụdaph, ọliom ghan bọ ni ịdi ẹkasian,

³ kụ ẹghiom ologhi ịdi ạghelhe phọ kạtol, eḍighi ịyaar lọ yira ọḅitonaan oboom mọ ạpeleeny phọ ọphon? Ọmoogh-we phọ rꞌaloor ọdi kụ ạphur ri agbeelom pẹleeny phọ ọphon phọ, kụ bụphe ọnaghan aani bọ uḍeenaan ni iyira ọkpaariom mọ agey phọ ni.

⁴ Igina igina phọ kẹn ni, esi ọḅaram ịpe ạbidi, Ẹnaan iḍighi yogh ghan ni iiḍighi aruugu rꞌareḍeenaan rꞌịiḍaany kịrokiro, kụ ẹsighe ghan ruunmo Uwaloor Iigbia phọ edi ẹngo we, ịdipho ẹḅeeraan bọ nyọdi.

Ọpo rạkonyon ghan bọ reten ạpeleeny phọ kạngo we

⁵ Ẹnaan ị́ḅogh aḅirini phọ katu bọ yoor oghol ghan bọ rọkaaph, ịlogh ḍịghaagh ạruukpaany phọ ọdi.

⁶ Ọḅile ghụn ọḅem eniin esi sịphe ạḍinya iigbia phọ mọ, “Ẹnaan, oye ạman eeghe kụ nạ ạsighe bọ aseerian ologhi? Oghiil phọ oye kụ ẹdi nạ rapogh ghan ni ịdipho?

⁷ Nạ ụlhem nyọdi asooromi ẹphurukpu apuemi rụukpaany phọ. Nạ uzu nyọdi eghoony eghuan rꞌigbogh,

⁸ akpologhi oomo ạraraar phọ sịphe rạda aruwol ọdi mọ ọdi aphogh ghan.” Ịdipho “akpologhinaan bọ nyọdi oomo ạraraar phọ”, rꞌeniin ísugha mun dị oye kụ rapogh. Kụ nyịidipho yira rọ́miin ghan dị oye kụ rapogh oomo phọ ạraraar phọ.

⁹ Yira rọmiin ghan ghụn Jịzos phọ osooromi bọ ẹphurukpu opuemi rụukpaany phọ, pịdi ọdi ạtuan ọnma ighirigiir phọ Ẹnaan aghol oomo awe amugh. Yira rọmiin ghan nyọdi dị moghol ḍuugh phọ dị amugh bọ ozu nyọdi eghoony eghuan rꞌigbogh nyịidipho.

¹⁰ Ịkpianaan bịn dị Ẹnaan phọ rẹlem ghan bọ oomo ạraraar phọ kesereghi, keḍighi dị ạJizos kạtuan ịminimiin kụ aakuan aseleman, pịdi ọdi adi bin igbogh phọ ọdi ạloghom aani ịbadi ạnmuny, loor esi dị ạJizos bịn kụ rạkonyon ghan reten ạpeleeny kạngo bịdi.

¹¹ Ọdi bịn kụ rawoph ghan bọ we esi ịkaraph phọ ạbidi, kụ ọdi rꞌạbuphe mowopha yogh bọ mọḅoph oniin Ọde. Ịduon kụ iḍighi kụ ạJizos rákiil bọ umugholoor oghol ghan awe mọ abumor ọno ni,

¹² mem mọ ọdi ạḅem bọ mọ, “Ẹnaan, mị kạkaaph ni ịlo ạna ạḅeni bumor phọ ạmi. Mị kạmoor ri sụor aboomiom sịphe ogbo aḍita awe phọ ookpomoghan bọ.”

¹³ Ọdi ạḅile kẹn ni rạḅem ghan mọ, “Mị kạkpasaghiom Ẹnaan oḍuom ologhi phọ ạmi.” Kụ ạḅile kẹn ni rạḅem ghan mọ, “Mị odi ni sịen rꞌịbam ạnmuny phọ Ẹnaan mịngo bọ ịmi.”

¹⁴ Ịdipho bụphe ọdi aghol bọ mọ “ịbam ạnmuny” phọ oḍighi bọ weye dị ọmoogh ịḅaal rꞌiphulupul phọ, ạJizos rꞌaloor ọdi asoor ri dọl phọ ạḍiphe phọ aḍighi aani oye ịdipho ạbidi. Ọdi asoor dọl phọ ạḍiphe phọ, ọbo ọdi ạsighe ḍuugh phọ ọdi aphiemiom Eru phọ ẹmoogh bọ ịikpo aḍuugh phọ,

¹⁵ ạḅile ạtagharan bụphe moghol bọ oghiilaan aḍuugh bịn oḍighi rẹbene oomo aghuḍum mọ ạbidi.

¹⁶ Eganana ni mọ ạruukpaany phọ Ẹnaan kụ úlho ghan bọ ologhi phọ ọdi. Ịdipho ghụn ạḍinya iigbia phọ rẹḅem ghan bọ mọ ẹemara etum ẹemara phọ Ebraham kụ edi ghan ologhi phọ ọdi.

¹⁷ Ẹphen kụ ẹmhu ịyaar phọ ẹkpe bọ ni dị ọdi kúsugheeny rꞌeniin ịyaar ọrol ghan ịdipho abumor phọ ọdi, pịdi ọdi aḍighi uwo ẹmhu oyil ạrikia dị ạmoogh igbiririph ạḅile aseere ghan ologhi ọdi esi oḍighi phọ Ẹnaan ịdipho ọdi ạsighe bọ loor phọ ọdi oḍighi ọmur rꞌiphorobo owophom awe ọsighe esi ịkaraph phọ ạbidi.

¹⁸ Ịdipho ọdi rꞌaloor ọdi mạmiinom ghan bọ ịminimiin ọdegh ophogh, ọdi katue ni ạloghonaan ḍịghaagh bụlo ọdegh ophogh asoorom.