Bụo aHibru 11 - Ạḍinya Iigbia

Omeeraam

¹ Ọmoogh omeeraam pọ ọminogh ịghor mọ kọmoogh ni rạraar phọ ịpe oḍuom bọ ologhi phọ, rꞌolegheri okuphom owol ịlo ạraraar phọ ịpe yira kọ́miin bọ.

² Omeeraam kụ aḍighi bọ ịyaar phọ Ẹnaan ẹsighe bọ weye agediidi phọ ẹloghoma.

³ Omeeraam kụ aḍighi bọ ịyaar phọ yira ọnaghan bọ mọ Ẹnaan ịḅem ọnhu bịn kụ ọlhem bọ aḅirini phọ. Esi ikpo ọnhu phọ ọdi, ụsighe ịpe rọ́miin bọ kụ ọlhem ịpe rọmiin bọ.

⁴ Omeeraam kụ aḍighi bọ ịyaar phọ ẹkia phọ Ebel ạphighiron bọ ạngo Ẹnaan ẹnighe bọ epu nyẹpe aKen. Ẹnaan rꞌaloor ọdi ịtuan omeeraam mọ Ebel kụ elhe bọ ẹkia phọ kụ ẹsighe bọ nyọdi mọ oye aruukuan ni. Loor omeeraam mọ ọphon phọ, Ebel rạḅa ni eye ghạlamo ịdipho ọdi mamugh bọ ni.

⁵ Omeeraam kụ aḍighi bọ ịyaar phọ Ẹnok úmugh bọ. Ọdi ạḍua ghụn ni agheel kꞌạke, bịn ụwa nyọdi ụ́miin, ịdi eḍighi bọ Ẹnaan mẹsighe nyọdi. Ạḍinya iigbia phọ rẹḅem ghan ni mọ, “Tụtu kọsighe bọ Ẹnok, ọdi ạḅaalami ni ologhi Ẹnaan.”

⁶ Oye dị ụ́moogh omeeraam kátue ạḅaalami ologhi Ẹnaan. Oye lọ ratu otuman Ẹnaan kameeraam mọ Ẹnaan edi ghan ni, ẹḅile ghan reenmo ruunmo bụphe ọsighe bọ oomo ologhi phọ ạbidi kụ rọwaam bọ nyọdi.

⁷ Omeeraam kụ aḍighi bọ ịyaar phọ aNoa ạnaghanan bọ ni mem mọ Ẹnaan ẹphur bọ nyọdi rụru ịlo ạraraar phọ kemiteghu bọ kụ ọdi kọ̋miin bọ. Ọdi ạnaghanan ni Ẹnaan kụ ạka bọ oboom oghuugh phọ ạphel bọ nyọdi rꞌọto ọdi atene. Ịphen dị aḍighi bọ kụ igananami bọ emeeraam aḅirini phọ. Ẹnaan ịtuan omeeraam mọ ọdi kụ ẹsighe bọ nyọdi mọ oye aruukuan ni.

⁸ Omeeraam kụ aḍighi bọ ịyaar phọ Ebraham ạnaghanan bọ, mem mọ Ẹnaan ẹmagh bọ nyọdi mọ ạḍua agheel eelhe phọ ọno kạngo bọ nyọdi. Ọdi ólhegheri ni ẹpe ọdi rạki bọ kụ aḅetenu ni bịn ạḍua eelhe phọ ọdi.

⁹ Omeeraam kụ aḍighi ịyaar phọ dị ạrol bọ ni dọl iiruen sịphe ade phọ Ẹnaan eguanaan bọ nyọdi. Ọdi rꞌẠizik rꞌạJekob, ạbuḅarama oniin phọ oguan phọ, kụ urughogh ghan bọ ni iloghi arogbogo phọ okpiom bọ rukpe phọ.

¹⁰ Ịyaar phọ eḍighi bọ, Ebraham agonom ghan ọmiin ẹmha phọ ẹpe Ẹnaan mẹtooghi bọ ephighi ẹtuugh ẹlogh.

¹¹ Omeeraam kụ aḍighi bọ ịyaar phọ aSera malhoologh bọ ni kụ ạmoogh bọ ni ịnyaam oomorom ọony phọ, ịdi eḍighi bọ ọdi ameeraam ni mọ ọpo aguanaan bọ nyịno kaḍighi ni ịpe oguan phọ amitiom.

¹² Kụ Ebraham mọ ọphon phọ mạrol bọ ni rapogh ḍuugh, kụ aḍighi bọ ọde ẹemara ẹemara phọ eḍiza bọ ịdipho ạraanaan phọ ịpe edi bọ kꞌạke, ḅịle rꞌikpo ịisaar phọ kótue bọ ọbal omuneni edi bọ oogbom ọphiiny phọ.

¹³ Oomo phọ awe phọ ạbuphe phọ umughom ni omeeraam. Bịdi ụ́teeny rạraar phọ Ẹnaan eguanaan bọ, kụ ụrol li kꞌegher kụ ọmiin rꞌọḅaal ologhi kụ ọḅile ọghaaph omitiom mọ bụno aruuruen rꞌabuteneneen sịen aḅirini phọ.

¹⁴ Bụphe rọkaaph ghan bọ rạraar phọ ịphen roḍeenaan ghan mọ ạbuno rọwa ghan ẹmha ẹlo ạbuno.

¹⁵ Bịdi ụ́kiom ghan mun ologhi ẹmha phọ ẹpe bịdi ọwile bọ ọḍua. Mọ ụghiom ghan ni ologhi, ọbo bịdi mụmoogh ni eepoogh ọḅile origheel.

¹⁶ Bịdi umoghi ghan ghụn ọmoogh ẹmha phọ kꞌạke, ẹpe ẹnighe bọ epu nyẹpe bịdi ọwile bọ. Bịn íḍigh umugholoor esi Ẹnaan bịdi ọmagh nyọdi mọ Ẹnaan ạbuno, ịdi eḍighi bọ ọdi mạlhogh ni ẹmha aseenaan bịdi.

¹⁷ Omeeraam kụ aḍighi bọ ịyaar phọ Ebraham ạsighe bọ Ạizik ọony phọ ọdi ọphighironom ẹkia, mem mọ Ẹnaan ẹwa bọ olegheri ologhi phọ ọdi. Ebraham kụ ọdi Ẹnaan eguanaan bọ ni oguan phọ, kụ ạnyaaghian ni ọsighe ogina ọony phọ ọdi ọphighironom ẹkia.

¹⁸ Ẹnaan mẹḅeni ghan ni nyọdi mọ, “Nạ kạtuan Ạizik kụ ạmar ẹemara etum ẹemara.”

¹⁹ Ebraham agbiighiom ni mọ Ẹnaan ketue ni eḅeton Ạizik esi aḍuugh — kụ esi ọghaaphom, Ạizik aḅetenu ni sịphe aḍuugh phọ Ebraham ạḅile ạsighe nyọdi.

²⁰ Omeeraam kụ aḍighi bọ ịyaar phọ Ạizik aghol bọ ni ịdi edi ghisigh ạngo Jẹkob rꞌỊso ọghor phọ.

²¹ Omeeraam kụ aḍighi bọ ịyaar phọ, mem mọ ạJekob ramugh bọ, kụ ạngo bọ ọghor nmụny phọ ạJosef, oniin atum nyoniin. Ọdi ạgoḍian loor ịkpara phọ ọdi kụ aaseeny Ẹnaan.

²² Omeeraam kụ aḍighi bọ ịyaar phọ, mem mọ ạJosef ramugh bọ, kụ ạghaaph bọ mọ aweye phọ Ịzirel kọḍua ni Ijipt ạḅile bọ ạto ạḅeniom ịdi koḍighinom ḍizu phọ ọdi.

²³ Omeeraam kụ aḍighi bọ ịyaar phọ, mem mọ ọmar bọ Mozis, ọde rꞌonhiin phọ ọdi ạaghi bọ nyọdi ịraar ụnwanyu phọ. Bịdi ọmiin bọ ẹnighe dị ọony phọ ạnighe, bịn ị́kigh ịyaar esi ạbidi ọka ologh phọ aFero, ọdaam eelhe phọ.

²⁴ Omeeraam kụ aḍighi bọ ịyaar phọ, mem mọ aMozis ạmanam bọ, úmeera bọ mọ oghol nyịno mọ ọony ọnyani ọdaam eelhe phọ.

²⁵ Ọdi aphin ọḅarama aweye phọ Ẹnaan ọmiinom aani, kpạripe rꞌọrolom ịkaraph olhe uruur mọony amem.

²⁶ Ọdi agbiighiom ni mọ oghol aMesaya phọ ọminoghom ịgilaam, kụ ịman ịyaar epu oomo phọ ẹelha phọ Ijipt, ịdi eḍighi bọ ọdi agbi ni riḍien ọdi ọmiin aruunmo dị edi ghisigh.

²⁷ Omeeraam kụ aḍighi bọ ịyaar phọ aMozis úkiilaan bọ ophin ologhi ọdaam eelhe phọ kụ aḅom bọ ni ẹmhu ạḍua Ijipt. Ọdi abigh ni ekpom mụdi ạmiin Ẹnaan phọ rọ́miin ghan bọ ekpeḍien phọ.

²⁸ Omeeraam kụ aḍighi bọ ịyaar phọ dị agim bọ ẹko ẹyaal ọphel otene phọ, ạḅile bọ ạto ạḅeni mọ ọsighe ịḅaal phọ ọsaraghiom ịḅaghaghaam aruutu phọ, ọbo ọpo kạze bọ ịkpana ạnmuny phọ kạḅogh ghan bọ bịdi ḍịghaagh.

²⁹ Omeeraam kụ aḍighi bọ ịyaar phọ aweye phọ Ịzirel orelhe bọ ḍịgharaghar ade ọḅeeny Ọphiiny Igbilha phọ, kụ aweye phọ Ijipt oru bọ ọḅeeny aani phọ, kụ ạmuum mọ ạminoghom bọ.

³⁰ Omeeraam kụ aḍighi bọ ịyaar phọ iikpe phọ oghoonyom bọ Jeriko emeleghu bọ, mem dị awe phọ orelhe okitonom ḍio etum ḍio tụtu ẹman oḍual aḍughul-otu.

³¹ Omeeraam kụ aḍighi bọ ịyaar phọ úkiigh aani bọ Rehab oliom ẹmha phọ, ịdipho ạbuphe ụ́naghanan bọ Ẹnaan, ịdi eḍighi bọ ọdi ạlogh ni otu we phọ oru bọ iḅiligha phọ.

³² Mị ụgo ni ụkiom ḍụghum? Amem ílho mun ọghaaph oghol ạGidion, rꞌạBarak, rꞌạSamsin, rꞌaJefta, rꞌaDevid, rꞌạSamuel, rꞌariil phọ Ẹnaan.

³³ Bụphe ọsighe bọ omeeraam eenan rụmhu ạrama, bịn ọkpar opuughi. Bịdi ụpham ni we phọ ịlo aghuḍuul, kụ ọmoogh bọ ịpe Ẹnaan eguanaan bọ. Bịdi ụkasaghi ni rụnhu ạnam-dịka,

³⁴ oḍimighi ịikpo ạnian, okpetenaan ḍuugh elhool ẹgham. Bịdi udugh ni, kụ ụḅile ni ọkpar; oḍighi iphelegbe ẹgham, ọkaaghi bụo ẹgham aruuruen phọ ọowalami.

³⁵ Ạnmariir ụḅile ni ọsighiogh weye ạbidi dị moḅerenu esi aḍuugh ọloghoma. Buniin ạbudi ọkasaghiom úmeeraam mọ osereghi bụno, umughanaan ghụn ni ịgbiphoghom mọ, pịdi bịdi oḅerenu oḍigh ghuḍum dị ạnighe apu kụḅel phọ.

³⁶ Ụnmoghoghoom ni ọgurogh buniin; ụphaḍi yogh ni buniin ọloghoḍi ikoli.

³⁷ Uroḅol li ikpo buniin; ạayagh buniin ịyal ipoḍi; ọziom buniin elhool ẹgham. Buniin ụkpologhian ghan ruzu iyool-ịga rꞌạrutu kụ ooghiraan ghan rꞌekulom, rꞌịminimiin, rꞌịgbiloghom.

³⁸ Bịdi ụnighe ọphughan ọrol aḅirini phọ ọphon. Bịdi urelhe yogh ghan rạdala rꞌaroogbolom mọ, ịdipho abuteneneen, orughogh ghan ikuru aroogbolom rꞌaropogh ude.

³⁹ Asiḍien oomo ạbuen phọ edi ni eboom esi loor omeeraam mọ ạbidi. Ghạlamo rꞌịduon phọ ni bịn bịdi ụ́teeny aani ịpe Ẹnaan eguanaan bọ,

⁴⁰ ịdi eḍighi bọ Ẹnaan megbiighi ịnon ịma iseenaan iyira, mọ bịdi kụḅophoghan iyira kụ ogbi ọteeny ạdol oseleman phọ.