Bụo ạEfesos 6 - Ạḍinya Iigbia

Ạnmuny rꞌạburude rꞌaburunhiin ạbidi

¹ Nmụny, ịnaghanan ghan bụrude rꞌaburunhiin phọ anyina, ịdi eḍighi bọ ịphen kụ ịkpianaan dị bụphe rọdaph bọ ịgbaranuom aruwol Ọmoogh-we phọ koḍighi ghan.

² “Ọde rꞌonhiin lọgh eegu” kụ ọḅel ologh dị ạḅaram oguan,

³ “pịdi ẹnighenaan nyịna, ḅịle kẹn nạ ạrol sịen aḅirini phọ abia.”

⁴ Bụrude rꞌaburunhiin, kéḍighi ghan ịlo kepin iloghi ạnmuny phọ anyina. Iikonomom bịdi oroma Ọmoogh-we phọ, ímeera ghan bịdi ọḅaar ẹmhu.

Ạrebene rꞌạburude otu ạbidi

⁵ Rẹbene, ịnaghanan ghan bụrude-otu phọ anyina, ẹlhogh ghan bịdi eghuan rꞌiphooph iloghi, mụdi nyina rekumu ghan Kraist.

⁶ Kéḍighi ghan ịphen phọ, mem lọ riphogh inyina ekpeḍien ịlo ọseph anyina bịn. Ịsighe ghụn ni oomo iloghi anyina, ịdipho ạrebene aKraist, kụ eḍighinom ghan ịpe Ẹnaan rẹwa bọ.

⁷ Iḍighi ghan oḍighi phọ anyina rꞌọḅaal ologhi. Nyina rekumu ghan Ọmoogh-we phọ, káwe bịn.

⁸ Ilegheri mọ Ọmoogh-we phọ kaanmo ni tọrobo oye, ẹbene rꞌuwo ade, ruunmo ogey oḍighi phọ dị raḍighi bọ.

⁹ Bụrude-otu, ịtuugh egina phọ ẹphamam mọ kụ ẹpham rẹbene phọ anyina. Ịbile ọpaarogh ghan ạbidi. Ilegheri mọ nyina rꞌạrebene phọ anyina ẹḅoph nyoniin Ọde-otu ẹpe kꞌạke, dị rạpam ghan tọrobo oye eniin phọ ẹphamam mọ.

Oomo ịinya ẹgham mọ Ẹnaan

¹⁰ Esi ekureriom mọ, ịineghi ghan ịnyaam mọ anyina esi Ọmoogh-we phọ, ḅịle kẹn rꞌesi igbogh ịikpo phọ ọdi.

¹¹ Ịsighe oomo ịinya ẹgham mọ Ẹnaan, ẹnyaaghian, pịdi nyina erue ekoronaan ikeḍi phọ Eru,

¹² ịdi eḍighi bọ yira rꞌawe kụ róbeeghi bọ. Aruru phọ ẹda bọ aḅirini ufiri phọ ukoom bọ iyira, rꞌịkaraph aruwaloor phọ edi bọ kꞌạke ghụn rꞌayira kụ robeeghi.

¹³ Ịtuan ịphen phọ ẹnyaaghian oomo ịinya ẹgham mọ Ẹnaan, ọbo ẹteeny ḍio phọ ạbumulogh-ḍien phọ kizuom bọ inyina, nyina erue ẹmerenyan, pịdi ee ọman nyina ezin ḍịghaagh iphelegbe.

¹⁴ Ịmeera ni. Igey kụ eḍighi okuughaam ọkparamiom esin phọ anyina! Aruukuan kụ eḍighi ọsuaram ekpologhi phọ anyina!

¹⁵ Ookolobian ịlo oleenye eleeny ooḅi ọghaaph ẹepho phọ kụ aḍighi rokoro dị nyina kẹlogha!

¹⁶ Omeeraam kụ aḍighi ọsuaram dị nyina kẹpam ghan oomo amem ekoronaan oomo ịkpina epo phọ Eru ketum bọ nịan ẹtaph ghan etuom!

¹⁷ Ạpeleeny kụ aḍighi eghoony ọsuaram dị nyina kezua ghan; ḅịle, ikpo ọnhu phọ Ẹnaan kụ eḍighi elhool ẹgham mọ Uwaloor Iigbia phọ rạngo ghan bọ!

¹⁸ Ịiḅereghi ghan oomo amem, ẹlhom ghan Ẹnaan ẹloghonaan ạḍighaagh. Tọrobo eepoogh lọ nyina ẹmoogh, ịiḅereghi ghan ni esi ịikpo Uwaloor Iigbia phọ. Loor ịduon phọ, iimanam, inyina kị́pher. Ikol ghan oomo aweye phọ Ẹnaan ẹeḅereghi ghan oomo amem.

¹⁹ Ịiḅereghi ghan ni ịloghom aani ịmi, mọ Ẹnaan ịngo ghan ịmi ịlo ẹkpianaan ọghaaph, mem lọ mị ạtagharan ọnhu ạmi, ḅịle kẹn mọ mị ụkaaphom ghan ạkpo ologhi ugananami ịpe ạaghi bọ ịlo ooḅi ọghaaph phọ.

²⁰ Mụma ịmi oḍighi ọokpaany ooḅi ọghaaph phọ ọphon, ghạlamo ịduon mị odi bọ ni ikoli phọ nyịidipho. Kụ ịiḅereghi ghan mọ mị ụmoogh ạkpo ologhi dị ụmanam ịmi ọghaaphom mọ.

Ekureriom opurunaan

²¹ ẠTikikos, ọnyo asiya phọ yoor oḍuom bọ ni ologhi, kịḅeni ni inyina oomo ịlo ạmi, pịdi nyina elegheri ịlo mị odi. Ọdi aseere ni ologhi oḍighi ạsiosi phọ. Ọdi rꞌayoor kụ roḍighi ghan bọ oḍighi phọ kọngo Ọmoogh-we phọ.

²² Mị ratom mọ ọdi aru ịteeny inyina ạḅeni ịlo yoor odi, ọkparamiom iloghi phọ anyina.

²³ Ẹnaan Ọde phọ rꞌạJizos Kraist Ọmoogh-we phọ ọngo ghan oomo ạbuo asiya phọ ẹepho rꞌẹphomoghian dị ẹḅaram omeeraam!

²⁴ Ooḅi ọghor phọ kꞌẸnaan ạrolonaan oomo phọ ạbuphe ọsighe bọ ẹphomoghian dị rémugh ghan kụ ọphomoghianam Jịzos Kraist Ọmoogh-we phọ ayira.