Bụo ạEfesos 3 - Ạḍinya Iigbia

Oḍighi phọ ạPol aḍighinaan bọ ruuruen phọ

¹ Esi ịphen phọ, mị ạPol ọnyo-ikoli phọ ạJizos Kraist ạtuan bọ rụmhu anyina aruuruen phọ, righol ghan ni inyina kạaḅereghi Ẹnaan.

² Mị ragbi mọ nyina mẹnaghan ni mọ Ẹnaan ịtuan ọnma ighirigiir kụ ụngo bọ ịmi oboom oḍighi phọ ọphon oḍighinaan anyina.

³ Ẹnaan igananami ni ịpe ọdi ạaghi bọ iḍeenaan ịmi. (Mị aworogh ni ẹphurukpu phọ ịphen phọ bịn ạge bọ.

⁴ Kụ nyina ạal ịphen mị mạge bọ, nyina kẹtuugha ni ịpe mị malhegheri bọ ịlo ạraraar phọ Ẹnaan ạaghi bọ ịlo aKraist.)

⁵ Mem dị meten, ụ́ḅeni we ịlo ịphen ạaghi bọ kụ nyịidipho Ẹnaan memeera mọ Uwaloor Iigbia phọ agananami rạraar phọ ịphen aḍeenaan butelhedom mọ rꞌariil phọ.

⁶ Ịbooghi phọ ịduon mọ aruuruen phọ mọtuan ooḅi ọghaaph phọ olhe aani erua ạraraar phọ Ẹnaan eguanaan bọ. Bịdi ọḅoph oniin ookpomoghan ropin aani bin, ịdipho Ẹnaan ẹngo aani bọ bịdi Jịzos Kraist ịlo oḍighinom oguan phọ ọdi omuneni.

⁷ Ẹnaan kụ ịma ịmi kịro ọdo ịmaam ọghaaph ghan adom mọ ọdi oleenye. Ẹnaan ịsighe ịikpo phọ ọdi kụ ịngoom bọ ịmi ịnyaam oḍighinom oḍighi phọ ọphon.

⁸ Ọbo mị kụ ọkaraghi ọbam esi oomo aweye phọ Ẹnaan, kụ ọdi ụngo bọ ịmi eghuan ọghaaph ghan ịlo ẹeḍiom mọ aKraist eekuna ílho bọ ọḅeni aruuruen phọ.

⁹ Ọdi ụngo ịmi eghuan ogananami ạraraar phọ ịpe Ẹnaan ạaghi bọ reḍighi. Ẹnaan Ọlemia oomo ạraraar phọ ạaghi ni ịpe ọdi agbiighi bọ kꞌẹḅel emiighom mọ,

¹⁰ ọbo nyịidipho, ọtuan bụo ạsiosi phọ, kụ ạruukpaany ịtooghi phọ Ẹnaan rꞌịikpo phọ ịpe edi bọ kꞌạke elegheri ẹkpigh kịrokiro olegheri ịyaar phọ Ẹnaan.

¹¹ Ịpe kꞌaḍio phọ ọdi agbiighi bọ, aḍighi amuneni mem mọ ọdi arom bọ Jịzos Kraist Ọmoogh-we phọ ayira kụ aru bọ.

¹² Ịduon yira mọḅophoghan bọ Kraist, ọḅile bọ omeeraam nyọdi, kụ ẹdi iloghi ayira mesoor ọghi aghisigh Ẹnaan, ịdi okaphian oḅio úlho.

¹³ Ịduon kụ iḍighi kụ mị rạlhom bọ mọ kẹ́tuan ịdipho mị ighol bọ inyina rạmiinom bịn edughe yogh iloghi phọ anyina. Ịduon phọ ọbo ịnighenaan inyina.

Ẹphomoghian phọ aKraist

¹⁴ Loor ịphen phọ kụ mị akpuḍian bọ rạaḅereghi ghan ghisigh Ọde phọ,

¹⁵ ọpo oomo asiḍien arughunughun phọ kꞌạke rꞌịsien ade phọ ẹḍua bọ esi ọdi kụ emite kụ oghola yogh bọ.

¹⁶ Mị rạlom ghan Egbogh Ẹnaan phọ mọ ạsighe ẹeḍiom eegu phọ ọdi, ạtuan Uwaloor Iigbia phọ, ịngo inyina ịikpo, ọbo aruwaloor phọ anyina ẹmoogh ịnyaam,

¹⁷ ḅịle aKraist ạtuan omeeraam mọ anyina ạgbema sịphe iloghi phọ anyina aḍighi marugh ọdi. Mị rạaḅereghi ghan ni Ẹnaan mọ ẹphomoghian kụ eḍighi sịni rꞌephighiom anyina.

¹⁸ Ọbo nyina rꞌoomo awe phọ Ẹnaan ẹmoogh ịikpo ọkpaph ọpham ẹreghe rꞌạḍidoony, ḍiphoph ạnyu rꞌạḍikel ude ẹphomoghian phọ aKraist,

¹⁹ elegheriom ịphen phọ rólegheri ghan bọ kọman, ọbo oomo igey ạroozo phọ emunughan bọ esi Ẹnaan, emunughan aani sịphe iloghi phọ anyina.

²⁰ Itu oboom nyọpo ạtuan bọ ịpe ịikpo phọ reḍighi bọ ruwaloor phọ ayira, kụ arue ghan bọ ni raḍighi kapuemi ịpe yira rọlom ghan bọ, ọḅile bọ rọotughian ghan.

²¹ Ạḍiseph ẹrolonaan ni Ẹnaan oomo amem esi ạbuo ạsiosi phọ rꞌạJizos Kraist kꞌagee-pọ kꞌagee-pọ! Ẹrol li ịdipho!