Bụo ạEfesos 1 - Ạḍinya Iigbia

¹ Mị ạPol phọ Ẹnaan ẹsaḅar bọ oḍighi otelhedom ạJizos Kraist kụ ụge ḍịnya phọ ạḍien riruomaan inyina aweye phọ Ẹnaan odi bọ Ẹfesos, bụphe omeeraam aani bọ Jịzos Kraist.

² Ọghor rꞌẹepho kꞌẸnaan Ọde phọ ayira, rꞌạJizos Kraist Ọmoogh-we phọ ịrolonaan inyina!

AKraist mụngo iyira ruunmo aruwaloor

³ Ẹkpe ni dị yira kọseph Ẹnaan rꞌỌde phọ ạJizos Kraist Ọmoogh-we phọ ayira. Ịduon yira mọḅophoghan bọ Kraist, ọdi mụngo iyira oomo aruunmo aruwaloor phọ ịpe edi bọ ẹpe kꞌạke ụsephom iyira.

⁴ Ẹnaan ịsighe ni iyira mọ ạbuo ọno esi aKraist kꞌamem mọ kọ̋lhem bọ aḅirini phọ, pịdi yira ookuan oseleman ghisigh ọdi. Loor esi ẹphomoghian,

⁵ Ẹnaan egbiighi ni ẹmadan mọ ọno kạtuan Jịzos Kraist kụ ụsighe iyira ạloghoma mọ ạnmuny ọno. Ịphen kụ ịdi ẹḅeeraan nyọdi oḍighi ịlo omitiom ịpe ọdi ạwa bọ.

⁶ Ẹkpe ni dị yira kọseph Ẹnaan ịlo ọghor eegu phọ ọdi. Ọdi uḍighi ni iyira iiḅi phọ ịphen oopho, ịdipho ọdi ụngo bọ iyira ogina Ọony phọ ọdi.

⁷ Ịdipho aKraist azu bọ ịḅaal ẹkia phọ ọdi, pọ mụtagharan iyira aatol ịkaraph phọ ayira. Pọ eeghe ọdo ạḍibugh dị ọghor phọ Ẹnaan ạbugh,

⁸ dị aleeny ịdipho! Esi ọbalabala olegheri ịyaar rꞌọnaghan ạḍughum mọ ọdi.

⁹ Ẹnaan iḍighi ni emuneni ịpe ọdi agbiighi bọ, kụ ạma ịdi ọdi ạaghi bọ uḍeenaan iyira mọ ọno kạsighe Kraist amuneniom.

¹⁰ Ịphen kụ ịdi ọdi agbiighi bọ, mọ ẹteeny mem dị mẹkpianaan, ọno kạsighe oomo ạraraar phọ edi bọ kꞌạke rꞌịsien aḅirini phọ aakpomoghi kụ aKraist aḍighi uwo ẹmhu.

¹¹ Oomo ạraraar remite ghan ịdipho Ẹnaan ẹsighe bọ ịitughian phọ ọdi kụ ẹtooghiom bọ mọ emite ghan. Kụ ọdi mụsaḅar bọ iyira mọ oḍighi bụo ọno ọḅophoghan Kraist, ịdipho ọdi agbiighi bọ kꞌẹḅel emiighom mọ.

¹² Ịduon yoor kụ oḍighi bọ bụḅel dị ọmoogh oḍuom ologhi esi aKraist, ọdi mụsaḅar iyoor mọ ọrol dọl dị awe kọtuan oboom ghan eegu phọ Ẹnaan.

¹³ Ịphen kụ ịdi imitenaan aani bọ ni inyina, mem mọ nyina ẹnaghan bọ ọghaaph igey phọ, Ooḅi Ọghaaph phọ ọpo iruom bọ inyina ọphel otene phọ. Nyina imeeraam ni Kraist, kụ Ẹnaan ịngo bọ inyina Uwaloor Iigbia phọ, ịdipho ọdi iguanaan bọ inyina, ọloghom elegh mọ nyina ạbuo ọno ni.

¹⁴ Uwaloor Iigbia phọ kụ enye oḍeenaan mọ yira kopin aani ni bin ịpe Ẹnaan eguanaan bọ we phọ ọdi, rꞌokoriom amem mọ Ẹnaan kịtagharan bọ iyira ẹmadan. Itu ni oboom eegu phọ ọdi!

Ịiḅereghi phọ ạPol

¹⁵ Loor ịphen phọ, kꞌaḍio phọ mị ạnaghan bọ ịlo omeeraam mọ anyina esi ạJizos Ọmoogh-we phọ rꞌịdipho nyina ẹphomoghian bọ oomo awe phọ Ẹnaan,

¹⁶ mị úsoph mem ọsephenaan ghan anyina Ẹnaan esi ịiḅereghi.

¹⁷ Mị rạlom ghan Eegu Ẹnaan Ọde phọ ạJizos Kraist Ọmoogh-we phọ ayira mọ ịngo inyina Uwaloor Iigbia phọ kaḍighi bọ ịdi nyina kelegheri ịyaar, ạḅile iḍeenaan inyina Ẹnaan, ọbo nyina elegheri nyọdi.

¹⁸ Mị rạlom ghan mọ ọdi aghunyon iloghi phọ anyina ẹmiin ẹphalaḅaal phọ ọdi, ọbo nyina elegheri ọdo oḍuom ologhi phọ ọdi ạtu bọ kụ ịmagh bọ inyina, rꞌọdo eboom ẹelha ạḍiseph phọ ọdi aguanaan bọ we phọ ọdi,

¹⁹ rꞌọdo oḍighi dị igbogh ịikpo phọ ọdi riḍighinaan iyira phọ momeeraam bọ. Ịikpo phọ ịphen edi bọ loor phọ ayira ị́gbatanaan rꞌịnyaam mọ

²⁰ ịpe ọdi aḅetenom bọ Kraist sịphe aḍuugh phọ ạrolomi ḍịghaagh elhiom mọ ọdi ẹpe kꞌạke.

²¹ Ẹpe kụ ẹdi aKraist odi bọ. Ọdi kụ ạda oomo ạraraar dị ẹmoogh ịikpo ẹpe kꞌạke. Ọdi kụ ogbogh dị apu oomo aruwaloor rꞌạruukpaany kịrokiro phọ Ẹnaan. Ọdi ạzola ḍuphuuph dị epu oomo ạraraar phọ ịpe rokol ghan bọ sịen aḅirini phọ ọphon rꞌọpo katu bọ.

²² Ẹnaan iseere oomo ạraraar phọ mọ aKraist ạkpasaghiom ruwol, kụ ẹmha nyọdi eḍighi uwo ẹmhu oomo ạraraar ẹngo sịosi phọ.

²³ Ạbuo ạsiosi phọ kụ eye phọ aKraist, rꞌemuneniom mọ ọdi. AKraist kụ ramuneni ghan oomo ạraraar oomo arikpisi.