Azaya 9 - Ạḍinya Iigbia

¹ Ịdi bịdi kokpetenaan mem ịiḅaghami phọ ịphen phọ ílho. Mem dị eten, ade phọ arughunughun phọ ạZebiulon rꞌạNaftalai uufolomi ni, kụ amem dị edi ghisigh kẹsighe eghuan etuom eelhe phọ ẹphen, emiigh kꞌỌphiiny aMeditarenian kụ ẹghi ẹpe erumuḍio phọ remite ghan bọ ẹghi esi ẹpe ade phọ edi bọ ḍịeri ạḍighaagh phọ ạJodan, kụ ghạlamo kꞌẹpe Galili rꞌaloor, ẹpe aruuruen phọ orughogh bọ.

Ọdaam amem dị retu ghisigh

² Awe phọ bụphe orelhe bọ esi ufiri mọmiin ḍigbogh ạḍiḅaal. Bịdi urugh de aroogho, kụ nyịidipho ạḍiḅaal mesooraan bịdi rẹmuom.

³ Nạ mạngo bịdi oboom ọḍe, Ọmoogh-we; nạ mạngo bịdi ọḅaal ologhi. Bịdi robo esi ịpe nạ maḍighi bọ, ịdipho awe robo ghan bọ mem dị bịdi oogbo ịbiakpa ạbidi mꞌamem dị bịdi rodian ẹelha dị owum.

⁴ Ịdi eḍighi bọ nạ mawunughi ọfeguma adool ẹninom bọ bịdi rꞌịkpara phọ ẹgur ghan bọ rụpha phọ ạbidi. Nạ mạkpar apu eelhe phọ ẹpe ẹmiine ghan bọ kụ ẹkpiloghom we phọ ạna, ọkaraghi ịdipho nạ ạkpar bọ apu we ẹgham mọ ạMidian geediidi.

⁵ Arokoro phọ ạbuo ẹgham mọ ạbuphe oru bọ ozuom rꞌoomo ibura phọ ạbidi ịḅaal phọ ẹsaraghiom bọ ạnian kụ kepiemi.

⁶ Mụmaranaan iyira mọony! Mụngo iyira ọkpana! Ọdi kaḍighi ọdaam ayira. Nyọdi kọmagh mọ, “Ịiḍaany,” “Uwo Oroma,” “Ẹnaan oomo ịikpo,” “Ọde kꞌagee-pọ,” “Ọkpana Ẹepho.”

⁷ Ịikpo ẹdaam mọ ọdi eekuna ílho; ọmar phọ ọdi kạmoogh ẹepho oomo amem. Ọdi kạda ịdipho ọdi ạsighe esi aDevid ọdaam mọ, ịikpo ọdi kẹdaph ghan elhiom rꞌooḅi ọoruen, emiigh kꞌạnyiidipho tụtu kꞌeekuna amem. Ọmoogh-we oomo ịikpo phọ ạnya ni oḍighi oomo ịphen phọ.

Ọmoogh-we phọ kạliom ni Ịzirel

⁸ Ọmoogh-we phọ masoph ọoruen ạḅam ẹmhu ọmar phọ Ịzirel, esi ẹemara ẹemara phọ ạJekob.

⁹ Oomo awe phọ Ịzirel, tọrobo ọlo arugh sịphe ẹmha phọ aSameria, kolegheri ni mọ ọdi kụ aḍighi ịphen phọ. Nyịidipho bịdi opoophe loor kụ roobaga. Bịdi ọḅem mọ,

¹⁰ “Aruutu ọogha phọ odoghoḍi bọ memeleghu ni, kụ yira kọḅile ni ọloghoḍi ruutu asighiigh. Ịgurom ipoḍi oreeny ạsikamor moogbo olereghi, kụ yira kọḅile ni ọkanam ruutu ọkaraghi ogey ọsaga.”

¹¹ Ọmoogh-we phọ magir ạpue iloghi ạbumulogh-ḍien phọ mọ ozuom bịdi ẹgham.

¹² ẠSiria ạga phọ ọpo erumuḍio phọ remite ghan bọ rꞌaFilistia ạga phọ ọpo erumuḍio phọ remeel ghan bọ mọnya ophiemi Ịzirel. Ghạlamo ịduon ni bịn, ọghagh ologhi Ọmoogh-we phọ kősi eekuna; ạḅile ni ạgbuton ḍịghaagh ọdi ịlo ọlhiom ạbidi.

¹³ Awe phọ Ịzirel kőkiton; ghạlamo ịduon Ọmoogh-we oomo ịikpo mạlhiom bọ ni bịdi, bịdi kőḅula esi ọdi.

¹⁴ Esi aḍiniin aḍughul-otu Ọmoogh-we phọ kạliom ni buḍiemiom mọ rꞌawe phọ Ịzirel; ọdi kapiemi ni bịdi ẹmhu rꞌẹsoph.

¹⁵ Ikumoor rꞌikpolom awe kụ ẹmhu phọ — kụ ẹsoph phọ pọ ariil ịtughemi ọkpe phọ!

¹⁶ Bụphe oḍiemiom bọ we phọ ạbuen morelhiom bịdi ẹkaraph eten bịn úlegheri mun ịlo oḍighi kụ ọgbaragbarami bịdi ọmadan.

¹⁷ Kụ esi ịduon Ọmoogh-we phọ kámeera rꞌoniin onyugheel akpetenaan, kụ ọdi káḍeenaan ọnma ighirigiir esi oniin ekpukele ạnir mꞌoniin ọnyigo ọony ịdi eḍighi bọ oomo awe phọ úlegheri Ẹnaan kụ obeeph kụ tọrobo ịyaar dị bịdi ọḅem pọ ịkaraph. Ghạlamo ịduon ni bịn ọghagh ologhi Ọmoogh-we phọ kákunughian kụ ạḅile ni ạgbuton ḍịghaagh ịlo ọlhiom ạbidi.

¹⁸ Ịkaraph dị awe phọ moḍighi reemor ghan ịdipho ạnian dị repiemi ghan ruuḍum iitoor rꞌiiḅurom. Reemor ghan ịdipho ọnuza dị rale ẹekpua kụ rẹdumughu rookpoogh ạmughi.

¹⁹ Loor esi dị Ọmoogh-we oomo ịikpo phọ rạkagh bọ ologhi ẹliomom mọ ọdi raamor ghan ịdipho ạnian oomo arikpisi sịphe ade phọ kaphiemiom we phọ. Ạgba ẹmhu, ạgba ẹmhu!

²⁰ Tọrobo ekpisi sịen eelhe phọ awe rozirion ghan kolhe ọony eḍien lọ ọmiin, kụ ọkoony phọ odi ni. Bịdi ọḅile ghụn rọba ghan nmụny ạbidi!

²¹ Awe eghun phọ ạManase rꞌawe eghun phọ Ifraim robian ghan rạagham, kụ ọḅophoghan ozuom Juda. Ghạlamo ịduon phọ bịn, ọghagh ologhi Ọmoogh-we phọ ókunughian; ạḍighaagh ọdi ẹḅile ni esel ịlo ọlhiom ạbidi.