Azaya 7 - Ạḍinya Iigbia

Adom ọghiomonaan Ehaz ọdaam mọ

¹ Mem mọ ọpo Ehaz ọdaam mọ, ọony phọ aJotam ḅịle rꞌọnyanyan phọ Uzaya, ạda bọ Juda, ẹgham imite ni. ARezin ọdaam mọ ạSiria, rꞌaPeka ọony phọ ạRemalaya ọdaam mọ Ịzirel ozuom Jeruselem kụ útue ụ́kpar upu.

² Mem dị ekpo ọnhu ẹteeny bọ ọdaam mọ aJuda mọ awe ẹgham ạSiria moḍigh ni ologhi eelhe phọ Ịzirel, aḍiboom aḍiigu isiph ni nyọdi rꞌoomo awe ọdi dị bịdi ophiigha ịdipho ireeny dị ookuugh rapighemi.

³ Ọmoogh-we phọ ạḅeni Azaya mọ, “Sịghe mọony phọ ạna Shiar Jashub kụ ạghi ozuan Ehaz ọdaam mọ. Nạ kạmiin nyọdi sịphe eten phọ abuloom arukpe phọ rolho ghan bọ, ẹpe eekuna eḍiiny okol phọ rẹsighe ghan bọ mụum ẹpe ọodu phọ keru.

⁴ Ḅẹni mọ ọdi agona loor, ạrol oḅoorian kụ kụ́moogh okpereghaan mꞌọoḅaghami. Ọghagh ologhi aRezin ọdaam mọ rꞌawe ạSiria phọ ọdi, rꞌọpo aPeka ọdaam mọ óḍighi mun ọlo oboom oghiilaan omuzaan aḍuugh ópu mụghi ịyal ikulha ịpe dị ạnian reḍim ghan.

⁵ ẠSiria rꞌỊzirel rꞌọdaam mọ ọdi oopilian omite ẹkaraph ezue.

⁶ Bịdi ogbiighi ozuom ẹgham Juda, ọngo eepuph we phọ ịlo koḍighan bịdi kụ obe, ọrolomi ọony aTabeel ạgada ọdaam eelhe phọ.

⁷ “Kụ mị Ọmoogh-we phọ ạgba amitiom mọ ịphen kétue emite.

⁸ Eeghe kụ iḍighi? Ịdi eḍighi bọ ạSiria ụ́kpar upu Dạmaskos ẹkpana ẹmha phọ ọdi, kụ ạDamaskos ọ́kpar opu Rezin ọdaam mọ. Ẹlo Ịzirel, esi odiinydi rꞌoogh ạsia, eelhe phọ kepe ni dị kékola mun mọ ọno eelhe ni.

⁹ Ịzirel ọ́kpar opu Sameria ẹkpana ẹmha phọ ọdi, kụ aSameria ọ́kpar opu Peka ọdaam mọ. “Eḍighi mạar dị omeeraam anyina ụ́kpar, nyina kẹ́kparam.”

Eḍeenaan phọ Emanuel

¹⁰ Ọmoogh-we phọ ạghiom ḍịnon adom Ehaz:

¹¹ “Puru Ẹnaan phọ ạna Ọmoogh-we phọ ọngo ạna eḍeenaan. Ketue ni ẹḍua eekuna ọmar iḍim mꞌegher ạnyu ẹpe kꞌạke.”

¹² Ehaz ạphagharanaan mọ, “Mị kápuru eḍeenaan. Mị akel ọdegh Ọmoogh-we phọ ophogh.”

¹³ Pọ kụ esi dị Azaya ạphagharanaan mọ, “Ler rụru nyịidipho, ọnyo ẹemara ẹemara aDevid ọdaam mọ. Ebeeph iboom dị nyina mẹpher we — nyina kẹḅile ẹper Ẹnaan kẹn ḍụghum?

¹⁴ Ọmoogh-we phọ rꞌaloor kạngo nyịna eḍeenaan: esina ọnyani dị odi rꞌeghun kạmar olephiri kụ kokol nyọdi mọ Emanuel.

¹⁵ Ẹteeny mem dị ọdi ạmanam oḍighi igbiighi ịlo ọdi, awe kọmoophi ghan mạmaam ạsinam kụ ọlaay ghan ẹnuum aḍiowo.

¹⁶ Ghạlamo tụtu arere ịyal ạbudaam mọ ạbuphe ịngo bọ inyina okaphian oḅiom mọ keḍighi ni ọkpagha.

¹⁷ “Ọmoogh-we phọ kiruom inyina rꞌawe anyina, rꞌịsiphe oomo eghun ọdaam mọ, riiḍio ịiḅaghami dị eeph epu ịnon ịdi meru ghan emiigh kꞌamem mọ ọmar phọ Ịzirel ạgbatanaan bọ ạḍua esi aJuda — ọdi kạki ạsighe ọdaam mọ Asiria kụ atu.

¹⁸ “Ẹteeny mem mọ ạmuphe eru, Ọmoogh-we phọ kạapioph kụ asita ạbuo ẹgham Ijipt ọḍuaghu rikpisi asikol Ọphiiny aNail dị ẹkel iboom kụ otu ịdipho ịphi, ọḅile ọḍuaghu ẹpe eelhe Asiria kụ otu ịdipho aḍiowo.

¹⁹ Bịdi kokpuulan osoroghu ologhi igbughagbugha ariḍiiny ạrana phọ rꞌologhi aropogh ude asighiigh phọ kụ oleeny eleeny tọrobo ekpu eḍum iitoor rꞌạtorobo ạroogho ịḅal.

²⁰ “Ẹteeny mem mọ ạmuphe, Ọmoogh-we phọ kapir ọsam-rụmhu dị kạḅeeny ọphiiny phọ aYufratis kụ atu — ogbogh ọdaam eelhe phọ Asiria — kụ ọdi kakulogh ịleem anyina rꞌạsilaal ạrumhu rꞌạburu asiloor anyina.

²¹ “Ẹteeny mem mọ ạmuphe, ghạlamo eḍighi ịyaar dị oḅephom ozo marue aako oniin ọony ạnam rꞌịyal ạrutu-ịga bịn,

²² bịdi kẹmoogh muboom ạmamaam dị kạkasian ịlo ọdi rạwa. Agey ni, ịphurukpu awe phọ ạbuphe kokpetenaan bọ oḍum sịphe ade phọ kọmoogh ni mạmaam ạsinam ọmoophi rꞌẹnuum aḍiowo ọlaay.

²³ “Ẹteeny mem mọ ạmuphe, ịma phọ iizo iimuma avain phọ, oniin kạmoogh ghan bọ oniin ọonir iizin avain ạman ghan bọ oniin ọonir ipoḍi asilva, ạroogho iitoor rꞌaruuḅurom kụ kẹsighe iizo phọ.

²⁴ Awe kọpam ghan sịkumugh rꞌịkpina ọkimom ghan ịtaya sịphe phọ. Agey ni, oomo eelhe phọ aruuḅurom rꞌiitoor kụ kemuza.

²⁵ Oomo ạraaḅaraph phọ ịpe ịizupha eḍum ghan bọ, iitoor kesiighi egimi dị rꞌoniin oye kạ́ki ghan mun. Keḍighi ni esi dị ạsinam rꞌiyool-ịga kụ kẹḅal ghan.”