Azaya 65 - Ạḍinya Iigbia

Ịdi Ẹnaan rẹliom ghan bụlo ọḅaar ẹmhu

¹ Ọmoogh-we phọ ạḅem mọ, “Mị ụnya ghan ni ọnaghanan ịiḅereghi awe phọ ạmi, kụ bịdi ụ́uḅereghi ghan. Mị ụnya ghan ni dị bịdi kụmiin ịmi, kụ bịdi ịyaar úḍighi. Eelhe phọ ịmi ụ́uḅereghi ghan ungọ, ghạlamo ịdipho mị akori ghan bọ ni ọnaghanan phọ, ‘Pọrono ạmi. Mị kịphel inyina.’

² Mị ụnya ghan ni oomo amem ologhomaam awe phọ ạmi, bụphe esi ọḅaar ẹmhu oḍighi ghan bọ ịpe ị́nighe bọ kụ orelhe eten ẹlo ạbidi.

³ Bịdi umugholoor úlegheri kụ oḍighi ghan ịdi ephin ologhi ạmi. Bịdi ụphinyon ghan rịkia ologhi aroghoony iigbia kụ ọsuughi ịnsens renmeny ạbuo aruru.

⁴ Ḍughul bịdi ọghiighi ghan ropogh asighiigh rꞌiiḍi awe ọḅaanaan aruwaloor iḍim. Bịdi ạa ghan ẹnam ophoropo kụ ọmophoghi mooboph ịnam dị mọphinyonom rịkia aruru ạbidi.

⁵ Kụ bịdi ogbi ọḅeni ạbunon mọ, ‘Ịgbatanaan iyoor; yoor oseleman ọpughan dị nyina kẹḅogh!’ Mị kạ́merenyan rꞌawe dị ọrol ịdipho — ọghagh ologhi esi ạbidi ạkigh nịan dị réḍim ghan.

⁶ “Mị magbiighi ni ịlo ọlhiom ạbidi, ḅịle ịpe kọmiine bọ bịdi, ḅịle mọge ni ọoruen phọ ạbidi oseere esi. Mị kápogh ạḅitonaan ịpe bịdi moḍighi bọ kụ mị kaḅulemian ni bịdi

⁷ loor ịkaraph ạbidi rꞌịkaraph ạburude oko ạbidi. Bịdi mọsuughi ịnsens rubughotu aruru ạnyu ạraaḅaraph dị rọpinyon ghan rịkia kụ ọkaaph ịkaraph ịlo ạmi. Kụ mị kạliom ni bịdi ịdi ẹkpianaan rꞌigbaany ịkaraph phọ ạbidi.”

⁸ Ọmoogh-we phọ rạḅem ghan mọ, “Oye rạ́pueghi ghan igey iimuma avain, kpạripe ọsighe ghụn kụ roḍighinom miim. Ḅịle mị kápiemi oomo awe phọ ạmi — mị kạpel li bụphe rukumu ghan bọ ịmi.

⁹ Mị kạseph we Ịzirel bụphe oḍighi bọ bụo eghun aJuda, kụ ạnmuny-oko ạbidi kụ kọmoogh de aruugum mọ ạmi. Awe phọ ạmi ọsaḅar bọ, bụphe rukumu ghan bọ ịmi kụ kọtol sịphe.

¹⁰ Bịdi kuuseeny ịmi kụ otelhiom iyool-ịga rꞌạsinam ạbidi ọkimom ịḅal Ḍịyaghaghaany Ade phọ aSaron ẹpe emeelom erumuḍio phọ rꞌịsiphe Eḍiiny Ịiḅaghami ẹpe emitenom erumuḍio phọ.

¹¹ “Kụ ọlo, kẹtol li kịro rꞌanyina ạbuphe ụḅitonaan bọ ịmi, bụphe oghel bọ Zạyon, ẹeḅaraph iigbia phọ ạmi, kụ ooseeny Gạd rꞌaMeni, ruru ugho rꞌọda.

¹² Kiseenaan inyina ọda omugh aḍuugh egbo, loor esi dị nyina ímeera mem dị mị ịmagh inyina ḅịle íler rụru mem dị mị ạghaaph. Nyina iphin ọḅaar ẹmhu esi ạmi kụ ẹpioghom.

¹³ Kụ mị rịḅeni ghan inyina mọ bụphe ooseeny bọ kụ ụnaghanan ịmi kọmoogh ni eboom ẹlo olhe rꞌọphughol, kụ ọlo ọkoony eḍien rꞌạmuum kisiph ni inyina. Bịdi kọmoogh ni ọḅaal ologhi, kụ ọlo inyina koofolomi ni.

¹⁴ Bịdi kọmoor sụor iboh, kụ ọlo nyina kemoghiom rꞌokururu.

¹⁵ Awe phọ ạmi ọsaḅar bọ kọsighe ḍien anyina ịdipho igurughian. Mị Ọkar Ogbogh Ọmoogh-we phọ kịze ni inyina. Kụ ọlo, mị kạngo ḍimoom aḍien bụphe ụnaghanan bọ ịmi.

¹⁶ Tọrobo oye lọ odi sịen ade phọ lọ ạwa ḍịseph kạlom mọ Ẹnaan phọ rébi ghan bọ ạseph nyịno. Tọrobo oye lọ aghunya kakunya ni rꞌaḍien Ẹnaan phọ rébi ghan bọ. Ịiḅaghami phọ ịpe emite bọ mem dị ebia, meten kụ obula.”

Omoom ọlhem mọ

¹⁷ Ọmoogh-we phọ rạḅem ghan mọ, “Mị rạlem ḍimoom ade rꞌimoom ạsike. Rạraar phọ ịpe meten bọ kọ́otughian mun.

¹⁸ Ịmoogh iboh rꞌọḅaal ologhi kꞌagee-pọ esi ọlhem mọ ạmi. Sịphe omoom aJeruselem mọ mị ạlhem bọ, iboh kụ kemuza, kụ awe phọ kọḅaal li ologhi.

¹⁹ Mị rꞌaloor kạmoogh ọḅaal ologhi loor ẹmhu aJeruselem rꞌawe phọ ọdi. Emoghi kẹ́tol mun sịphe, ạḍimagh ẹloghonaan kẹ́tol mun.

²⁰ Ạnmuny asipugh kómugh mun ẹghoroghor kụ oomo awe kọtol li opeele ọnhu ạsia phọ ạbidi. Bụdi ọteeny oniin okuron ạsia bịn kọḅem mọ ọbam oki. Aḍuugh dị emite kụ egbi ọteeny oniin okuron ạsia pọ ịlo eḍeenaan mọ mị mạlhiom bịdi.

^21-22 Awe kodoghoḍi ruutu kụ otughogh rꞌaloor — bụnon awe kụ kótughogh. Bịdi kọzuph iimuma avain kụ ọpughol miim mọ — bụnon awe kụ kọ́pughol. Ịdipho ireeny, awe ạmi kọtol kụudoony aghuḍum. Bịdi kọkar kụ oliom rạraar lọ bịdi moḍighi yogh.

²³ Oḍighi lọ bịdi oḍighi kạnighe ni riḍien awe, kụ ạnmuny ạbidi kóozuanan imananaan. Mị kạseph bịdi rꞌạnmuny oko ạbidi oomo amem dị retu ghisigh.

²⁴ Tụtu bịdi rọoḅereghi kọwile, mị kạnaghanan ni ịiḅereghi phọ ạbidi.

²⁵ Ilhom ịnam rꞌạnmuny iyool-ịga kolian eniin esi; ạnam-dịka kẹtaal rọogho ịdipho ạsinam rẹtaal ghan bọ, kụ ạrakaraph-ịyaar kéḍighi mun rạraar oghiilaan. Sịphe ạZayon, ẹeḅaraph iigbia phọ ạmi, ịyaar oḍighi oye ịlo eeph rꞌịlo ị́nighe kẹ́tol mun.”