Azaya 64 - Ạḍinya Iigbia

¹ Uḍighi ika kụ nạ ọphaar bọ okuaḍio phọ osoor ude? Aruugum mọ kẹmiin nyịna kụ epiigha rꞌaḍiigu.

² Bịdi kepiigha ịdipho ạmuum dị ọdepheri kụ rapul ạnyu ạnian. Tue agananami ịikpo phọ ạna aḍeenaan bụmulogh-ḍien phọ ạna kụ aḍighi ịdi areelhe phọ kepiigha egbodo ạna.

³ Amem ịrol li dị nạ aru aḍighi imananaan dị yoor ologhi úseere; aruugum mọ ẹmiin nyina kụ ephiigha rꞌaḍiigu.

⁴ Oye kꞌekulha kọ̋rol ghan dị mạmiin ghan, ạḅile ạnaghan ịlo ọdo Ẹnaan dị ẹrol ịdipho ạna, dị aḍighi ọdo ạraraar phọ ịphen ạngo bụphe ọkpasi bọ oḍuom ologhi ạbidi esi ọdi.

⁵ Nạ aloghomaam bụphe ọmoogh bọ iboh oḍighi ghan ịdi ẹnighe, bụphe ọotughian bọ ịpe nạ rạwa bọ mọ bịdi ọrol phọ. Nạ ụghagham ni iyoor ologhi, kụ yoor uḍighi ghan ni ịkaraph phọ; ghạlamo rꞌoboom ophin ologhi phọ ạna, yoor roḍighi ghan ịpe ị́nighe bọ bịn kꞌamem ageedi.

⁶ Oomo ayoor moḍighi ni ịkaraph, ghạlamo rꞌegey eḍighinom ịyaar ayoor bịn eḍighi eeku ẹenir agey. Loor ịkaraph phọ, yoor ọkigh ịdipho ạrinya ireeny dị enyororo kụ ookuugh aghughom ạsighe.

⁷ Oye ólho dị akiton aphogh nyịna esi ịiḅereghi; oye ólho dị aru esi ạna ọwa ẹloghonaan. Nạ mạaghi loor ạna esi ayoor kụ ụḅitonaan iyoor loor esi ịkaraph ayoor.

⁸ Kụ nạ kụ ọde ayoor, Ọmoogh-we. Yoor ọkigh ạḅay, kụ nạ ạkigh ọlemom aroko. Nạ kụ ụlhem iyoor.

⁹ Loor ịduon phọ kạ́moogh oboom ophin ologhi esi ayoor; kạ́pam ịkaraph ayoor useenaan iyoor kꞌagee-pọ. Yoor awe ạna; ụnma iyoor ighirigiir.

¹⁰ Ạramha iigbia phọ ạna mẹghigh de ịisaar; aJeruselem ẹmha dị mosumughu kụ eegulaan,

¹¹ kụ Otu Ịiḅereghi phọ ayoor, esi iigbia phọ ẹnighe bọ, esi phọ ạburude oko phọ ayoor oboom ghan bọ nyịna, ạnian mephiemi. Oomo ariisi phọ yoor ọphomoghian bọ meegulaan.

¹² Ọmoogh-we, oomo ịphen phọ nyịna ítir ḍụghum? Nạ ịyaar káḍighi kụ kụmiine iyoor opuemi ịdi yoor kotue mun ọkparam ḍụghum?