Azaya 6 - Ạḍinya Iigbia

Ẹnaan ẹmagh Azaya oḍighi oyil

¹ Lhạ phọ ạḍiphe Uzaya ọdaam mọ amugh bọ, mị ụmiin ni Ọmoogh-we phọ. Ọdi ạrolom ạgada ọdaam mọ ọdi, apoph kụ rꞌarughuenian, kụ ẹsoph ạsuoma phọ ọdi eleeny oomo ologhi ogbogh Otu Ịiḅereghi phọ.

² Ạraraar asinem ạnian dị ẹmoogh ghuḍum ẹmeregha ekitonom nyọdi, tọrotoro ọnyo ạbidi ạmoogh odiiny araphaaph. Tọrobo ọnyo ạbidi apuom ghisigh ọdi ịyal araphaaph, ịyal loor ọdi, kụ ạsighe ịyal phọ ịpheri phọ ạpheephom.

³ Kụ oniin ạmagh ghan nyoniin ạḅeni mọ, “Iigbia, iigbia, iigbia! Iigbia kụ Ọmoogh-we oomo ịikpo phọ! Eegu ọdi eleeny ni aḅirini phọ.”

⁴ Ạḍiaḅa ạroḍogh phọ ạbidi iphighemi ni ephighiom Otu Ịiḅereghi phọ, kụ ạmughi amuza sịphe ogbogh Otu phọ rꞌaloor.

⁵ Kụ mị ạḅem mọ, “Oḍuom ologhi ịmi úlhoonaan. Ịmi moruule ịdi eḍighi bọ tọrobo ekpo ọnhu dị ẹḍua ịidoronhu ạmi emite eḍighi ịkaraph, kụ mị atughan rꞌawe dị tọrobo ekpo ọnhu ạbidi eḍighi ịkaraph. Ghạlamo ịduon phọ ni bịn mị mạsighe ni riḍien ạmi ạmiinom Ọdaam mọ, Ọmoogh-we oomo ịikpo phọ!”

⁶ Pọ kụ amem dị oniin ọnyo ạbuen phọ ọlhem bọ ạpheeph asoor ude aru ụteeny ịmi, ạpam eeḅu ạnian dị reemor dị ọdi ạsighenom ịkpapham ạnyu enmeny phọ.

⁷ Ọdi atirom ịidoronhu ạmi eeḅu ạnian phọ reemor bọ kụ ạḅem mọ, “Ọphon matir ịidoronhu ạna, kụ nyịidipho apum ạna mạḍua, ḅịle ịkaraph ạna mọsar ọbile.”

⁸ Pọ kụ amem dị mị ạnaghan Ọmoogh-we phọ dị ạḅem mọ, “Ạnhian kụ ọdi mị katom? Ạnhian kụ kaḍighi ọokpaany ayira?” Mị ạphagharanaan mọ, “Mị kạki ni! Ụlogh ịmi!”

⁹ Esi ịduon phọ ọdi ụḅeni ni ịmi ọghi ọngo awe phọ dom mọ ạḍien mọ, “Tọrobo ịlo nyina elher rụru, nyina kẹ́naghanan. Tọrobo ịlo nyina ephogh, nyina kélegheri ịpe remite bọ.”

¹⁰ Kụ ọdi agbi ọḅeni ạmi mọ, “Ḍighi ịdi iloghi awe phọ ạbuen kenukuru, areḅeri ạbidi ẹkanaghian, kụ ariḍien ạbidi eḍighi ikpom, ọbo kọmiin ghan bọ ọnaghan ọkpaph ọpam. Eru ni ịdipho, iini bịdi kokiton usoman ịmi kụ mị aakonom bịdi.”

¹¹ Mị apuru mọ, “Kꞌạpur amem kụ ẹdi kẹtol bọ ịduon, Ọmoogh-we?” Ọdi ụphagharanaan ịmi mọ, “Tụtu oogulemi rạmha phọ ọman — tụtu útughogh mun ruutu phọ — tụtu ade phọ rꞌaloor eḍighi ọkpagha.

¹² Mị kạsighe we phọ ạkele kụ aḍighi oomo ade phọ ọkpagha.

¹³ Ghạlamo oniin oye esi aḍioph asugha ni sịphe ade phọ, nyọdi kẹn kopiemi ni; ọdi kạkigh ịdipho egisi ạḍiogh dị mobenogh olher.” (Egisi phọ ẹmeera esi emoom emiighom ẹlo awe phọ Ẹnaan.)