Azaya 55 - Ạḍinya Iigbia

Ẹnaan emerenyan ọnma ighirigiir

¹ Ọmoogh-we phọ rạḅem ghan mọ, “Tue, tọrobo oye lọ ạmuum rạpu — pọono sịen ạmuum. Tue, nạ phọ ọpo ụ́moogh bọ ikpoki, agho ọbiakpa alhe! Tue agho miim rꞌạmamaam ẹnam — okpoki rạ́ḍua ḍịghaagh ạna!

² Eeghe kụ nạ kaliom ikpoki esi ịyaar dị pẹreeny kẹ́ngo? Eeghe kụ nạ kaliom ikpoki ạna kụ ọkoony ạḅile rasiph nyịna? Ụnaghanan ịmi aḍighi ịlo mị ạḅem, bịn nạ kale eḍien dị ẹdugh epu oomo ariiḍien.

³ “Ịnaghanan nyịidipho, we ạmi, kụ eru esi ạmi; itu esi ạmi, kụ nyina kẹmoogh ni ghuḍum! Mị kighiran inyina ịyo dị kẹtol kꞌagee-pọ kụ ịngo inyina ḍịseph phọ mị aguanaan bọ Devid.

⁴ Mị ụma nyọdi oḍiemiom rꞌoye ịtooghi areelhe phọ, kụ esi ọdi kụ ẹdi mị aḍeenaan bịdi ịikpo phọ ạmi.

⁵ Nyịidipho nyina keekpomoghi iiruen areelhe; eniin amem bịdi inyina ílegheri kụ nyịidipho bịdi kokiil otu ọḅophan anyina! Mị Ọmoogh-we Ẹnaan phọ anyina, Ẹnaan Iigbia phọ Ịzirel, kaḍighi ni ịphen phọ amitiom. Mị kịngo inyina rughuenian rꞌeegu.”

⁶ Ikiton esoman Ọmoogh-we phọ, ẹeḅereghi ghan ẹngo nyọdi, nyịidipho ọdi mạabeeph bọ.

⁷ Ạbukaraph awe ọwile ẹkaraph eḍighinom ịyaar phọ ạbidi, onmeeghi ịitughian phọ ạbidi. Bịdi okiton osoman Ọmoogh-we Ẹnaan phọ ayira; ọdi ạmoogh igbiririph kụ raagborion ghan ọsar ọwilenaan.

⁸ Ọmoogh-we phọ rạḅem ghan mọ, “Ịitughian ạmi ị́kigh ịpe anyina, kụ areten ạmi ẹgbatanaan ni ịpe anyina.

⁹ Ịdipho ạsike phọ epeleghom bọ de phọ, ịdipho kụ ẹdi areten ạmi rꞌịitughian ạmi epeleghom ịpe anyina.

¹⁰ “Ekpo ọnhu ạmi ẹkigh ibikpo rꞌọlophia dị rẹḍua ghan kꞌokuaḍio kesoor ọngo ạmuum de phọ. Bịdi reḍighi ghan ịdi ịizupha phọ keḍum kụ emitiom iḅepheeny ịlo ọḅile oḅeph rꞌeḍien olhe.

¹¹ Ịduon kẹn kụ ẹdi ekpo ọnhu lọ mị ạghaaph — kẹ́piom oḍighi ịlo mị agbiighi; keḍighi ni tọrobo ịlo mị ạḅeni mọ eḍighi.

¹² “Nyina kẹḍua ni Bạbilon rꞌibo; kirelhiom inyina rꞌẹepho omitenom ẹmha phọ. Aruugum mọ rꞌạraaḅaraph phọ kẹlataan sụor kụ ireeny phọ ẹlo ḍịolho iboh.

¹³ Ireeny ạḍiipioph kụ kesi riisi dị nyịidipho iiḅurom kụ esiighi; aramamaam kꞌạke kụ kesi riisi dị iitoor kụ edi. Ẹphen keḍighi eḍeenaan dị kẹtol kꞌagee-pọ, ịyaar ọotughianam ghan ịdi mị Ọmoogh-we phọ maḍighi.”