Azaya 54 - Ạḍinya Iigbia

Ịdi Ọmoogh-we phọ ạphomoghian Ịzirel

¹ Jeruselem, nạ mạrol mụdi ẹ́mar ạnir, kụ nyịidipho nạ kạmoor sụor, ạlho ḍịolho iboh. Nyịidipho nạ kạmoogh ịbadi ạnmuny dị opu bụo ạnir dị odi ghan kꞌolhom!

² Bụghe ogbogo amarugh phọ ạna, ạdoonye iḍigh phọ ạkparamiom sịkan phọ!

³ Nạ kạteghe rụuku phọ ạna akoom; awe ạna kọḅile ni ọsighe de phọ ạḍiphe ịpheri phọ areelhe phọ odiighi bọ. Rạmha lọ osumughu ọḍuaghu, awe kọḅile omuza.

⁴ Kạ́moogh oghiilaan — nyịna kóofolomi mun; nyịna kósooromi mun. Nạ kabula ni olhe ẹmha ạna ịdipho esina ạnir ilhom, rꞌoku otu orugh ịdipho ekpukele ạnir.

⁵ Ọlemia phọ ạna kaḍighi ịdipho olhom esi ạna — Ọmoogh-we oomo ịikpo phọ kụ aḍien ọdi. Ẹnaan Iigbia phọ Ịzirel kẹphel li nyịna — ọdi kụ ạda bọ oomo aḅirini phọ.

⁶ Ịzirel, nạ ạkigh ọbam ạnir ilhom, dị olhom ọdi ạwile ạḍua kụ akururu. Kụ Ọmoogh-we phọ rạmagh ghan nyịna kaḅulemi kụ rạḅem ghan mọ:

⁷ “Ọony ẹkpor amem mọ mị ạwile bọ nyịna; rꞌegey ẹphomoghian kụ mị ạḅile ni ạmagh nyịna aḅulemi.

⁸ Mị ukiton ạḍua rꞌophin ologhi ẹnum amem, kụ mị kaḍeenaan nyịna ẹphomoghian ạmi kꞌagee-pọ.” Ịphen kụ ịdi Ọmoogh-we phọ rạphel ghan bọ nyịna ạḅem.

⁹ “Mem mọ aNoa mị uguanaan mọ aḍigho képun mun de phọ. Nyịidipho mị aguanaan mọ mị kạ́ghagham mun nyịna ologhi; mị kạ́kpalham mun nyịna ḅịle mꞌọlhiom ạna.

¹⁰ Ghạlamo aruugum mọ rꞌạraaḅaraph phọ keetughuḍian ni, ẹphomoghian ạmi esi ạna kékunughian; Mị kạpamanam kꞌagee-pọ oguanaan ẹepho phọ ạmi.” Ịduon kụ ẹdi Ọmoogh-we phọ ạphomoghian bọ nyịna rạḅem ghan.

Ịlo arisigh aJeruselem

¹¹ Ọmoogh-we phọ rạḅem ghan mọ, “Nạ aJeruselem ẹmha ịminimiin dị ẹloghonaan ụ́moogh, dị rꞌoye ọodereghi ạna kụ úlho, mị kạḅile ni ạsighe ịbekulari kụ apighiom ephighiom mọ ạna.

¹² Mị kạloghom ruutu ẹeghelemi phọ ạna rubi rụnhu-aḍibuo phọ ạna rꞌasighiigh dị kẹtaphan ịdipho ạnian, kụ iikpe phọ ekoom bọ rꞌịbekulari.

¹³ “Mị rꞌaloor kạtughemi we phọ ạna, kụ ạngo bịdi ẹepho rꞌedughom.

¹⁴ Apum rꞌakeel ịiruen kẹngo nyịna ịnyaam. Ịkpiloghom rꞌaḍiigu kẹ́teeny nyịna.

¹⁵ Oye lọ azuom nyịna ẹgham, pọ yoor kụ úupuruan. Tọrobo oye lọ ạwa nyịna sighiton kameel li.

¹⁶ “Mị kụ ụlhem bọ osughom ikah phọ rạlem ghan bọ rẹenema phọ. Mị kẹn kụ ụlhem bọ oye ẹgham mọ rạsighe ghan bọ reenema phọ kạziom we.

¹⁷ Kụ ẹenema ílho dị keḍighi nyịna ịyaar; nạ kạmoogh ni ọphagharanaan esi oomo ạbulo ọgbaanaan nyịna ịkaraph ạsiagba. Mị kabianaan ni butelhedom ạmi ạngo bịdi ọkpar opu.” Ọmoogh-we phọ kụ ạḅem.