Azaya 5 - Ạḍinya Iigbia

Ạḍuor phọ ozo iimuma avain mọ

¹ Iler rụru mem dị mị ịmooronaan inyina ḍụor phọ aḍien, ạḍuor ọyaghiri ạmi rꞌozo iimuma avain ọdi; Ọyaghiri ạmi ạmoogh ni ozo iimuma avain dị ạrol de dị ẹnuum iboom ạnyu eegbolom mọ.

² Ọdi aguph ni de phọ kụ ạsal ạsighiogh oomo ipoḍi asighiigh; ọdi ạzuph ọkaraghi ịma iizin avain. Ọdi ạlogh ni ogbogo aḍikori ozo phọ, odi aguph esi omiim ghan iimuma phọ. Ọdi akori ni dị arughuuny avain phọ kẹkpo, kụ tọrobo eghuuny rẹlagh.

³ Esi ịduon, nyịidipho ọyaghiri phọ ạmi ạḅem mọ, “Nyina awe phọ erugh bọ sịphe Jeruselem rꞌaJuda, isoph ọoruen ịngo ịmi rꞌozo iimuma avain phọ ạmi.

⁴ Ịyaar isugha ni dị mị ạpiom oḍighinaan ọdi ḍụghum? Iḍighi ika nụun kụ ọdi amuum bọ rughuuny avain dị rẹlagh kụ ạwile bọ igey phọ ịpe mị rạwa bọ?

⁵ “Ịphen kụ ịdi mị kaḍighi bọ ozo iimuma avain phọ ạmi; mị kabul li ireeny oghoony phọ akitonom bọ nyọdi, alereghi iikpe phọ ekoom bọ nyọdi, kụ ạbile mọ ịnam eḍum elhe ẹḅile ẹezeghi ẹlhogh ude.

⁶ Mị kạbile ni ạroogho ạsighe. Mị kákoy mun vain phọ, ọghoor ólho mun; kpạripe mị kạbile ạroogho iitoor rꞌiiḅurom ẹsighe. Mị kamirighan mọ aḍio eghire ọlophia ạlophom.”

⁷ Ịzirel kụ ozo iimuma avain Ọmoogh-we oomo ịikpo phọ; awe phọ aJuda kụ iimuma avain phọ ọdi ạzuph bọ. Ọdi ạwa mọ bịdi oḍighi ịpe ẹnighe bọ, kụ ọḅile ghụn bịn ọko enu. Ọdi ạwa bịdi oḍighi ịpe eḍighi bọ elhiom, kụ bụphe bịdi rọmiine bọ ọwaam ghan igey ịiruen.

Ịkaraph phọ awe roḍighi ghan bọ

⁸ Inyina moruule! Nyina reko ghan ịnon aruutu rꞌarere bịn kẹḅaram ịpe nyina mẹmoogh bọ. Ẹnum amem bịn esi késugha mun dị ọnon oye kạtol aani, kụ nyina bịn kụ ketughogh sịphe ade phọ.

⁹ Mị mạnaghan ni ịdi Ọmoogh-we oomo ịikpo phọ rạḅem mọ, “Oomo igbogh ịma aruutu phọ ịphen kepe ni oopho.

¹⁰ Arughuuny iimuma avain phọ remitiom bọ sịphe ozo phọ ạman bọ ḍioph arurugh ephegh aruwol phọ, ọsa kamite ọphaanya aruuku amiim bịn. Oniin okuron rꞌọphaanyadi aruuku ikpo ịbiakpa dị ọzuph kemuum ḍioph rꞌọphaanya aruuku bịn.”

¹¹ Moruule inyina! Nyina eḅetenu esoph ạḍiroor emiigh ịpughol, kụ nyina ẹtol oomo adulhe phọ tụtu amiim ịze inyina.

¹² Esi ạrayaal anyina, nyina ẹmoogh rẹne, rꞌịyekele ạrakama, rꞌaruuḍue — rꞌamiim. Kụ nyina ị́naghanan ịpe Ọmoogh-we phọ raḍighi bọ,

¹³ kụ esi ịduon phọ kịsighe ni inyina ọḍuanam ịdipho ạbuo ikoli. Abuḍiemiom anyina kọtol ọkoony kụ omuughu, kụ oopho awe komughom ịgbakuro ạmuum ọphughol.

¹⁴ Ọmar iḍim odi ọkoony kụ apoghoghomi ọnhu ọdi rakori ghan. Ọdi rạminogh kạmadan elhom kꞌude ikpolom rꞌiiguleeny awe aJeruselem rꞌọoloogh awe ịlooghi.

¹⁵ Tọrobo oye koofolomi ni, kụ oomo ạbuphe ophoophe bọ siloor kosooromi ni.

¹⁶ Kụ Ọmoogh-we oomo ịikpo phọ raḍeenaan ghan igbogh ọdi esi oḍighi ghan ịpe eḍighi bọ elhiom, kụ ọdi ragananami ghan dọl iigbia phọ ọdi esi oogbo ghan ịiruen awe phọ ọdi.

¹⁷ Sịphe ogbo ạramha phọ ophiemi bọ, ạnmuny iyool-ịga kẹtaal li rọogho kụ ạnmuny ạrutu-ịga kẹmiin ni ịḅal.

¹⁸ Inyina moruule! Nyina ítue itunyi igbaḅiri ịkaraph phọ anyina itoph.

¹⁹ Nyina ẹḅem mọ, “Ọmoogh-we phọ aagborion kụ aḍighi ịpe ọdi ạḅem bọ mọ ọno kaḍighi phọ ọbo yira ọmiin aani! Oye Aghuḍuul phọ Ịzirel aḍighi amitiom igbiighi ọdi ọbo yira ọmiin ịpe edi bọ sịphe ologhi phọ ọdi!”

²⁰ Inyina moruule! Nyina ẹmagh ịkaraph igey kụ ẹmagh igey ịkaraph. Nyina ekiton ufiri eḍighi ḍịḅaal kụ ekiton ḍịḅaal eḍighi ufiri. Nyina eḍighi ịpe rekiḍim bọ ḍịmen, kụ ịpe rẹmen bọ nyina eḍighi eghiḍim.

²¹ Inyina moruule! Nyina ẹetughian mọ nyina elegheri mạar, ẹkaraghi ẹmaar ikeḍi.

²² Inyina moruule! Abuukoom ạsikarama amiim! Oḅom ẹmhu rꞌékiilaan mem dị ẹteeny esi ọguaghi!

²³ Kụ loor ẹmhu ịgara, nyina emeera awe dị ọmoogh apum okeel oopho, kụ nyina ekikima akeel bụphe úlegheri aani bọ esi ọmoogh ọoruen.

²⁴ Esi ịduon phọ, ọkaraghi ịdipho ịgharaghar ikpo ịbiakpa rꞌipu rẹkporoghaam ghan bọ keemor ologhi ạnian, kụ ẹdi ạsini anyina kẹḅor kụ ịizughum anyina ẹkaraghar kụ opula otoph ịdi eḍighi bọ nyina meghel ịpe Ọmoogh-we oomo ịikpo phọ, Oye Aghuḍuul phọ Ịzirel, mụtughemi bọ iyira.

²⁵ Ọmoogh-we phọ rạkagham ologhi we phọ ọdi kụ mạgbuton ḍịghaagh ọdi ọlhiom ạbidi. Aruugum mọ kepiigha ni, kụ bụphe momuughu bọ kọbile ni sịphe areten phọ ịdipho atopha. Ghạlamo ịduon ni bịn ọghagh ologhi Ọmoogh-we phọ kákunughian, kụ ọdi kạḅile ni asele ḍịghaagh ịlo ọlhiom.

²⁶ Ọmoogh-we phọ rạngo ghan eḍeenaan ẹlo ọmagham eelhe dị ẹkel. Ọdi rạapioph ghan ịlo bịdi kọḍua ruukuna aḅirini phọ otu. Kụ sịen bịdi mokem, oogborion otu.

²⁷ Rꞌoniin ọnyo ạbidi rẹ́per ghan; rꞌoniin ọnyo ạbidi ókpetaan ghan ḅilẹ rꞌọ́naani ghan. Bịdi róduga ghan mꞌọnaani. Okuughaam ọ́katanu; oḍigh okoro óruuru.

²⁸ Ịkpina ạbidi etoph, kụ ạsikumugh ạbidi eekolobian ọraph. Ạrada aruwol ạrusu ạbidi ẹkpar ịdipho aḍighiigh, kụ idighila arughuugh ẹgham ạbidi reeghiraan ghan mụdi kẹpeeph ni ịdipho olhom ookuugh.

²⁹ Awe ẹgham mọ rọmophoghuan ghan ịdipho aḍita ạnam-dịka dị meghiigh ẹnam kụ ẹpham rẹḍuanam ọghi ekpisi dị oye bịdi kạ́boor ạḍuanam.

³⁰ Mem dị aḍio phọ ạḍiphe eru, bịdi komooghaam ni Ịzirel ịdipho otu-ḅualhe phọ. Pogh eelhe phọ ẹphen! Ufiri rꞌeephina! Ufiri mạmin ḍịḅaal phọ!