Azaya 48 - Ạḍinya Iigbia

Ẹnaan kụ ịmoogh ịlo arisigh

¹ Iler rụru ẹnaghan ịphen phọ, weye Ịzirel, nyina ẹemara ẹemara phọ aJuda. Nyina ekunya esi aḍien Ọmoogh-we phọ kụ ekophora mọ nyina reeseeny ghan Ẹnaan phọ Ịzirel — kụ rꞌeniin ekpo ọnhu ạna dị ẹman ịyaar ílho.

² Kụ nyina epoophe ni loor ọḅem mọ nyina ọkaraghi awe ẹmha iigbia phọ ni kụ mọ nyina ẹkpasi ologhi esi Ẹnaan phọ Ịzirel, ọpo aḍien phọ eḍighi bọ Ọmoogh-we oomo ịikpo phọ.

³ Ọmoogh-we phọ rạḅeni ghan Ịzirel mọ, “Mebia ni mị ạmiin bọ ịdi kemite; kụ ekperenom mị aḍighi amitiom.

⁴ Mị alegheri mọ nyina kẹḅaar ri ẹmhu, ịtol kikiki mụdi okuron ḅịle kéḍoghaan mụdi enaba.

⁵ Kụ mị ạmiin uḍien ịlo aghisigh anyina kꞌamem dị mebia, ạghaaphogh rạraar kụ egbi omite ọbo nyina kẹ́ḅem ghan bọ mọ aruru rꞌịkaaghineen ạrumugh anyina kụ iḍighi kụ emite bọ.

⁶ “Oomo ịpe mị ạmiin bọ uḍien phọ memiteghu kụ nyina kemeeraam mọ ịmiin phọ ạmi agey ni. Nyịidipho mị kịḅeni inyina ịlo imoom ạraraar dị kemite, rạraar dị mị úgananami uḍeenaan.

⁷ Ạnyiidipho bịn kụ ẹdi mị raḍighi kamitiom; ịyaar dị ẹrol ịduon ke̋mite ghan kꞌekulha. Eḍighi ịyaar lọ emite, nyina mịḅem mọ nyina ilegheri ni oomo phọ ịdi.

⁸ Mị ulegheri ni mọ nyina ị́kpe oseere ologhi, mọ molhegheriom mọ nyina awe ọḅaar ẹmhu. Ịdipho kụ iḍighi kụ ighine bọ inyina ịphen phọ, kụ rꞌeniin ekpo ọnhu reḅeri anyina íḍigh bọ.

⁹ “Ẹrol dị awe oboom ḍien phọ ạmi, mị rạpamaghan ni ophin ologhi ạmi, mị aḅoronom ni kụ inyina kíphiemi.

¹⁰ Mị miphoghom ni inyina nịan ịminimiin, ịdipho ọḅile ghan bọ kụ roselemi silva ologhi ạnian. Kụ mị mạmiin mọ nyina ị́moogh ịyaar oḍighinom.

¹¹ Ịlo mị aḍighi, pọ mị ụtuan ẹmhu ạmi — mị kámeera umugholoor asiph ḍien phọ ạmi, ḅịle ọnon oye adian eegu phọ ạmi, eegu dị eḍighi ẹlo ạmi, ẹlo ogina ạmi bịn.”

ẠSairos, oḍiemiom dị Ọmoogh-we phọ ạsaḅar

¹² Ọmoogh-we phọ rạḅem ghan mọ, “Iler rụru ẹnaghan, Ịzirel, awe phọ mị mạmagh bọ! Mị kụ Ẹnaan, emiighom mọ, ekureriom mọ, egina Ẹnaan phọ!

¹³ Ạraghaagh ạmi kụ ịlhem bọ ephighiom ade phọ kụ ạreghe bọ sịke phọ. Mem lọ mị ạmagh de phọ rꞌokuaḍio phọ, bịdi rotu ghan ni egina amem koḍeenaan siloor ạbidi.

¹⁴ “Oomo phọ anyina, iikpomoghan eniin esi ẹnaghan! Rꞌeniin ẹmugh ílho dị mẹmiin ghan uḍien mọ oye phọ mị mạsaḅar bọ kazuom ni ẹgham Bạbilon; ọdi kaḍighi ịlo mị ạwa mọ ọdi aḍighi.

¹⁵ Mị kụ ụghaaph bọ ạmagham nyọdi; mị arelhiom nyọdi amitenom kụ ạngo nyọdi iiḅi.

¹⁶ “Nyịidipho itu ituman ịmi kụ ẹnaghan ịlo mị rạḅem. Kꞌemiighom mọ mị mạghaaph ni amitiom kụ mị maḍighi ghan ịlo mị ạghaaph amitiom.” (Nyịidipho Ogbogh Ọmoogh-we phọ mụngo ịmi ịikpo kụ uromom ịmi.)

Igbiighi dị Ọmoogh-we phọ ạmooghaan we ọdi

¹⁷ Ẹnaan Iigbia phọ Ịzirel, Ọmoogh-we phọ, ọpo rịphel ghan bọ inyina, ạḅem mọ, “Mị kụ Ọmoogh-we Ẹnaan phọ anyina, ọpo rạwa ghan bọ ọtughemi anyina ịlo ạsuo anyina, kụ oḍeenaan anyina eten dị ẹkpe orelhe.

¹⁸ “Mụghumo nyina ịnaghan ni ịtooghi phọ ạmi, ọbo ạḍiseph mikiil li eru ịteeny aani inyina ịdipho arookpogh ọologh ọphiiny. Ọkpar opu mịteeny inyina ịdipho oologh phọ raakila ghan bọ ọgbal ọphiiny.

¹⁹ Ạnmuny ạnmuny anyina muḍiza mụdi ikpo ịisaar kụ mị mụmiin ni mọ bịdi útue uguulemi.”

²⁰ Ịḍua sịphe ẹmha ạBabilon egheel rꞌẹereegh! Ịlo egbeel ooḅi ọghaaph phọ eleenye tọrobo esi: “Ọmoogh-we phọ mạphel Ịzirel otelhedom mọ ọdi!”

²¹ Mem dị Ọmoogh-we phọ arelhiom bọ we phọ ọdi ạḅeenyom ḍịghologhol ade ịisaar phọ, ẹphuom ạmuum bịdi ị́iḅaghami. Ọdi aḍighi ni ịdi ạmuum ạḍua ghan loor aḍighiigh amite; ọdi ạay ni ḍighiigh phọ kụ ạmuum akiil ghan amite.

²² “Ẹepho ílhoonaan ghan buḍighinom ịkaraph,” Ọmoogh-we phọ kụ rạḅem ghan.