Azaya 47 - Ạḍinya Iigbia

Ịiruen edianaan Bạbilon

¹ Ọmoogh-we phọ rạḅem ghan mọ, “Nạ ạBabilon, soor ude sịphe ạgada ọdaam mọ ạna, kụ ạrol oopho ude sịphe ophugh phọ. Amem ịrol li dị nạ ụghigh ịdipho esina ọnyani dị kőlhegheri olephiri ọony, ẹmha dị ke̋meel ghan ẹgham kụ nạ ódugh mun, ọ́bile mun ọrol ịlo ịyaar dị keḅomaan. Nyịidipho nạ maḍighi ẹbene.

² Kiton ḍighiigh ọgbiom mọ ạḅekenemi! Gbẹ ịbiakpa phọ! Sịghenaan ạnmana phọ ạna! Kạranaan ịma arukpe phọ ạna! Kpạakpalha ạsuoma phọ ạna ạghiom ạnyu ẹrol dị nạ atue ạḅeeny sikol phọ!

³ Awe kọmiin ni ẹdaḅa ạna; bịdi kọmiin dị nạ asooromi loor rꞌumugholoor. Mị kaḅulemian ni, kụ oye ólho dị kusophoghom ịmi.”

⁴ Ẹnaan Iigbia phọ Ịzirel ruseere ghan iyoor ẹereegh — aḍien ọdi Ọmoogh-we Oomo Ịikpo phọ.

⁵ Ọmoogh-we phọ rạḅeni ghan Bạbilon mọ, “Tọl ude aḅoorian esi ufiri; oye nyịna kạ́magh mun mọ ukueni areelhe phọ!

⁶ Mị ụghagham ni ologhi we phọ ạmi; mị uḍighi ni mụdi kạ́buo ạmi mun: Mị ạlogh bịdi eeḍian ịikpo phọ ạna kụ ọlo nạ óḍeenaan bịdi ọnma ighirigiir; ghạlamo rꞌikumoor awe phọ bịn, nạ ụkporoghom ni.

⁷ Nạ ugbi mọ nạ kaḍighi ukueni kꞌagee-pọ kụ nạ ọ́sighe ịphen phọ ọlogh ologhi, ọ́bile kẹn ọotughian ịpe oomo phọ ịne kekureri bọ.

⁸ “Nạghan ịphen phọ, nạ dị ạphomoghian olhe ịma, nạ dị ạḅem mọ ịyaar nyịna kẹ́ḅogh kụ ạmaar ạtol. Nạ ughophora mọ nạ rꞌẸnaan mooleeny — mọ ọnon ọlo ạghigh nyịna ólho. Nạ ugbiom mọ nạ kaḍighi ekpukele ạnir, ḅịle mọ ạnmuny ạna kómuughu.

⁹ Kụ egina amem, ḍiniin aḍio, ịyal ạraraar phọ ịphen kemite ni. Ghạlamo oomo oḍighi ịiḍaany phọ ạna, olhom mọ rꞌạnmuny phọ kokpetenaan ni nyịna.

¹⁰ “Nạ uloghoma loor ạna esi ịkaraph phọ ạna; nạ ugbi mọ oye nyịna kạ́miin. Olegheri-ịyaar rꞌẹmaar phọ ạna ebi ni nyịna, kụ nạ ạḅenian loor ạna mọ, ‘Mị kụ Ẹnaan — ọnon oye ólho dị ụghigh ịmi.’

¹¹ Imananaan kesoorom ni nyịna, kụ rꞌoniin oḍighi ịiḍaany kétue esophoghom. Oogulaan kạteeny ni nyịna ekperenom, oogulaan dị nạ ologhi úseere!

¹² Seere oomo ire ịiḍaany phọ ạna rꞌạrugba; nạ maḍighinom ghan ni kꞌamem ugheel ạna. Iini sịen kẹlhoghonaan ni nyịna ḍịghaagh; iini nạ katue ni ạpaaroghom bụmulogh-ḍien ạna oḅio-kakaph.

¹³ Ịikpo nyịna ílho ghạlamo rꞌoomo oroma phọ nạ ạmoogh bọ. Awe phọ ạna ọtuugha bọ ịlo ạraanaan phọ omite oru ọphel nyịna — awe phọ ạbuphe phọ ọtuugha bọ ịlo ạraanaan phọ, bụphe ọkonyon bọ rịikpigh okuaḍio phọ kụ rọḅeni ghan bọ nyịna ụnwanyu atum ụnwanyu ịdi kemitenaan nyịna.

¹⁴ “Bịdi kọkigh mụdi ikpo ịbiakpa, kụ ạnian kekoph, eemor epiemi. Bịdi kótue ọpel siloor ạbidi — asinem ạnian phọ kẹkologhol ẹpughan esi ạbidi, kị́ma ạnian ọonma bịn.

¹⁵ Ịphen bịn kụ oomo iiḅi dị bịdi koḍighi nyịna — awe ịtuugha ạraanaan phọ nạ mạteeny bọ oomo aghuḍum mọ ạna. Bịdi kọwile ni nyịna, ọki ḍịa ạbidi, kụ rꞌoniin kásugha ọphel ạna.”