Azaya 46 - Ạḍinya Iigbia

¹ “Ịsien kụ ekureriom ạrumugh phọ ạBabilon! Amem ịrol li dị ooseeny ghan Bẹl rꞌaNebo, kụ nyịidipho rọsaany ghan bịdi ọman ịnam adool, iboom ịiḅaghami ọman ịnam dị aloor medugh.

² Ịkaaghineen ạrumugh phọ kétue ẹpela siloor ạbidi; Mọsighiogh bịdi otool ọḍuanam. Ịsien kụ ekureriom ạrumugh phọ ạBabilon!

³ “Iler rụru ịnaghanan ịmi, ẹemara ẹemara phọ ạJekob, oomo awe phọ ạmi osugha bọ. Mị mịpham ni inyina kꞌamem mọ ịmar bọ inyina.

⁴ Mị kụ Ẹnaan anyina kụ kạmaar ri ịpham inyina tụtu nyina ẹkpo, esi sụol rụmhu anyina. Mị kụ ịlhem inyina kụ kạmaar ri ịpham inyina; mị kịlhoghonaan inyina ḍịghaagh kụ ịtagharan inyina.”

⁵ Ọmoogh-we phọ rạḅem ghan mọ, “Ạnhian nyina kịtomaam bọ ịmi? Ọnon odi ni dị ụghigh ịmi ḍụghum?

⁶ Awe rokpenyon ghan rukuru ikpoki ạbidi kụ rooku ghan gol komitiom; bịdi ọḅamaghi silva esi olegheriom ẹemor phọ. Bịdi opir ọlemom agol mọ ạlhem ẹmugh agol kụ bịdi okpuḍian kụ ooseeny!

⁷ Bịdi opoophe ọḅam rụpha ạbidi kụ ọgban; kụ esi lọ bịdi oseere bịn ạmeera, órue ọḍua esi phọ oseere bọ. Eḍighi ịyaar dị oye kụ ạaḅereghi aphoghomiom, kátue ạtagharan ọnhu ḅịle mꞌọphel ọdi ọsighe esi imananaan.

⁸ “Ịitughian ịphen, nyina abuḍighinom ịkaraph; igbiighi ịpe mị maḍighi bọ.

⁹ Ịitughian ịpe emite bọ mem dị mebia; imeeraam mọ mị bịn kụ Ẹnaan kụ mọ ọnon ólho dị ụghigh ịmi.

¹⁰ Kꞌemiighom mọ mị ụmiin ni ịphen emite bọ; kꞌaḍiodi mị ụḅem ni ịphen memite bọ. Mị ụḅem mọ igbiighi ạmi kẹ́piom ghan, mọ mị kaḍighi ni tọrobo ịyaar lọ mị agbiighi oḍighi.

¹¹ Mị rạmagh ghan oye mọ ạḍua emitenom erumuḍio phọ aru; ọdi kasoor ude nmananam ịdipho ọogho kụ aḍighi amitiom ịpe mị magbiighi bọ. Mị mạghaaph, kụ koḍighi ni.

¹² “Ịnaghanan ịmi, nyina awe ọḅaar ẹmhu dị ogbi mọ ọkpar opu ạkelan ni.

¹³ Mị raḍur ḍio ọkpar opu phọ kạabemi — ị́kelan mun rꞌẹnum. Ọkpar opu phọ ạmi kóobinyemi. Mị kạpel li Jeruselem atene kụ atuomaan eghuan Ịzirel sịphe.”