Azaya 43 - Ạḍinya Iigbia

Ẹnaan eguanaan ọtagharan awe phọ ọdi

¹ We phọ Ịzirel, Ọmoogh-we phọ ịlhem bọ inyina rạḅem ghan mọ, “Kẹ́moogh oghiilaan — mị kịphel li inyina. Mị mạmagh ḍien anyina gai nyina ạbuo ạmi.

² Mem dị nyina rẹḅeeny mụum dị ạkel ude, mị kịrolan ni inyina; ịiḅaghami inyina kị́sighenom. Mem dị nyina eten esi ạnian, inyina kíkoph; ọgbagara ọdegh ophogh phọ katu bọ, inyina mạar káḍighi.

³ Mị kụ Ọmoogh-we Ẹnaan phọ anyina, Ọpo Aghuḍuul phọ Ịzirel, ọpo rịphel ghan bọ inyina. Mị katoka ni Ijipt kụ ịtagharan inyina; Mị katoka ni Sụdan rꞌaSeba.

⁴ Mị katoka ni reelhe kụ ạpel ghuḍum anyina, loor esi dị nyina eḍighi ni ịiseeny esi ạmi kụ mị ịphomoghian inyina kụ ịngo inyina eghuan.

⁵ Kẹ́moogh oghiilaan — mị odianaan ni rꞌanyina! “Emiigh kꞌẹekela emitenom erumuḍio phọ kụ esi kꞌẹekela emeelom mọ, mị kịsighe ni inyina asiemi ologhi otu.

⁶ Mị kạḅeni ephunom mọ mọ meera awe ạmi ogheel, kụ esoorom mọ kúkikima bịdi. Awe ạmi lọ odiighi rẹekela arikpisi origheleghu, bụlo odi tọrobo ạga aḅirini phọ.

⁷ Bịdi aweye ạmi, kụ mị ụlhem bịdi ọmooghom eegu.”

Awe Ịzirel kụ ạbugbaanaan Ọmoogh-we phọ

⁸ Ẹnaan rẹḅem ghan mọ, “Ịmagh we phọ ạmi ẹḅeni bịdi ookpomoghan sịphe otu ịiruen phọ. Bịdi ọmoogh ni riḍien kụ eten rọ́miin ghan; bịdi ọmoogh ni reḅeri, kụ ọḅaaghaph.

⁹ Ịimaghagh reelhe aḅirini phọ oruughi sịagba. Ẹghen eru ạbidi kụ ketue ẹmiin uḍien ịlo kemite iḍueneen? Ẹghen sịphe kꞌaḍita phọ ạbidi kụ ịghaaph ịphen remite bọ nyịidipho? Aruru phọ ịphen phọ ẹpham bụgbaanaan ạbidi erumom ẹghaaph mọ bịdi edi ni elhiom, ẹghaaph emitiom akeel esi ikpo ọnhu phọ ạbidi.

¹⁰ “Weye Ịzirel, nyina kụ ạbugbaanaan ạmi; mị ịsaḅar ri inyina oḍighi abutelhedom ạmi, ẹrol dị nyina ilegheri ịmi ẹḅile imeeraam ịmi kụ elegheri mọ mị bịn kụ Ẹnaan phọ. Emuton ịmi ẹnon ẹnaan ílho, kẹ̋rol ghan kụ kẹ́tol li.

¹¹ “Mị bịn kụ Ọmoogh-we phọ, ogina phọ ọpo kịphel bọ inyina.

¹² Mị ụmiin ni uḍien ịpe kemite bọ kụ mị aru ọlhoghonaan anyina ḍịghaagh. Eeruen ẹnaan dị meḍighi ịphen kꞌekulha kẹ̋rol ghan. Nyina kụ ạbugbaanaan ạmi.

¹³ Mị kụ Ẹnaan kụ kẹtol ghan ni kꞌagee-pọ. Oye ólho dị kakpetenaan ịikpo ạmi; oye ólho dị kanme ịlo mị aḍighi.”

Osuma ọḍua ẹpe Bạbilon

¹⁴ Ọmoogh-we Ẹnaan Iigbia phọ Ịzirel, ọpo rịphel bọ inyina, rạḅem ghan mọ, “Esi ọphel anyina, mị katom ni ḍita awe ẹgham ozuom ạBabilon; Mị kalereghi ni rụnhu-aḍibuo iikpe ẹmha phọ, kụ ịlooghi awe phọ ọdi kekitonu eten emoghi.

¹⁵ Mị kụ Ọmoogh-we Ẹnaan Iigbia phọ Ịzirel. Mị kụ ịlhem bọ inyina, kụ mị kụ ọdaam mọ anyina.”

¹⁶ Mem dị mebia Ọmoogh-we phọ ạkoghoron ni oḅodo ạḅeenye ọphiiny, eten orelhe loor ạmuum dị raaghiraan.

¹⁷ Ọdi arelhiom ḍigbogh aḍita awe ẹgham ạghi aphiemi: we ẹgham dị ọphamagh rughuugh ẹgham, rꞌịnam-ạrusu. Bịdi umeel li bịn úḅerenu mun, ịdipho anem ọtozi dị oḍime!

¹⁸ Kụ Ọmoogh-we phọ rạḅem ghan mọ, “Kẹ́kuom loor igbaany ịlo meten, ḅịle mꞌọotughian ạraraar lọ emiteghu mem dị mebia.

¹⁹ Igon emoom ịyaar dị mị kaḍighi — memiigh ni remite — nyina kẹmiin ni nyịidipho. Mị kạkoghoron oḅodo atene ẹdala phọ kụ ịngo inyina sikol ạmuum sịphe.

²⁰ Ghạlamo ịnam eḍum kịlhogh ni ịmi eghuan; asuogh eḍum rꞌịnun ude kiboom ni ịmi mem dị mị amitiom rịphiiny ẹpe ade ịisaar phọ ọngo ạmuum we phọ mị ạsaḅar bọ.

²¹ Bịdi kụ awe bụo ạmi dị mị ạlhem, kụ bịdi kọmoor ghan sụor oboomiom ạmi!”

Ịkaraph dị Ịzirel oḍighi yogh

²² Ọmoogh-we phọ rạḅem ghan mọ, “Weye Ịzirel, kụ mị ịpher inyina, dị nyina ịmi íiseeny mun.

²³ Nyina ị́pighironaan mun ẹkia oguom ạnian iyool-ịga phọ, ịngo ịmi. Nyina íghueniom mun ịmi rịkia phọ anyina. Mị inyina ị́leti dool ọphinyon ghan ạrikia, ḅịle mꞌopuru ịnsens dị aloor kisoroghuom inyina.

²⁴ Nyina ịmi íghoonaan ịnsens ḅịle mꞌọngo ẹnuum ịnam mọ anyina ẹlo ịgbaanyan ịmi. Kpạripe ghụn nyina ẹḅile rịiḅaghamiom ghan ịmi ịkaraph anyina; nyina medughiom loor ạmi sịpioghom anyina.

²⁵ Ghạlamo rꞌịduon phọ ni bịn, mị kụ Ẹnaan phọ rẹsar ghan bọ ịkaraph kẹwilenaan, kụ mị raḍighi ghan ịphen phọ loor ọdo oye dị mị aru. Mị kạ́ḅam ịkaraph anyina rụmhu anyina.

²⁶ “Itu osoor erugh ịiruen; ẹghaaph ịkpalagham mọ anyina emitiom! Ẹgba sịagba anyina egananami eḍeenaan akeel phọ anyina!

²⁷ Ọḅel oghiil phọ anyina uḍighi ni ịkaraph; abuḍiemiom anyina ụpioman ni ịmi,

²⁸ kụ ạbudaam anyina ụupu ni dọl iigbia phọ ạmi. Ịduon kụ iḍighi kụ mị aphiemi bọ Ịzirel; mị ạngo ọgel mọ oronyon yogh we phọ ạmi.”