Azaya 42 - Ạḍinya Iigbia

Otelhedom Ọmoogh-we phọ

¹ Ọmoogh-we phọ rạḅem ghan mọ, “Ọphon kụ otelhedom ạmi dị mị ạngo ịnyaam, ọpo mị mạsaḅar bọ. Eḍighinom ịyaar phọ ọdi ịḅeeraan ni ịmi. Mị mamuzeḍi uwaloor phọ ạmi loor ọdi, kụ ọdi kạsighe ịiruen aghuḍuul atuomaan tọrobo eelhe.

² Ọdi kạ́looghi ḅịle mꞌophoophe ẹḍogh ọdi mꞌọghaaph ạraghaaph ẹḍogh dị ẹghi ạnyu sịphe aroḅodo phọ.

³ Ọdi kábun ikpu dị eḍoghaan ḅịle mꞌoḍime ọtozi dị raanmeeghu. Ọdi kạsighe ịiruen aghuḍuul atuomaan oomo awe.

⁴ Ologhi ọdi káḅonyonu, ḅịle oḅio ọdi kạpo ni; ọdi kamitiom egey eḍighinom ịyaar sịen ade phọ. Arikpisi dị ẹkel epighi ni rekori ghan ịtughemi ọdi.”

⁵ Ẹnaan ịlhem ni sịke phọ kụ ẹetarion ẹreghe; ọdi ạnighemi ni de phọ rꞌoomo ạraraar phọ ẹdi ghan bọ sịphe; ọdi ạngo ni ghuḍum rꞌaḍiphooghu oomo awe ịsien aḅirini phọ. Kụ nyịidipho Ọmoogh-we Ẹnaan phọ ạḅeni otelhedom mọ ọdi mọ,

⁶ “Mị Ọmoogh-we phọ mạmagh nyịna kụ ạngo nyịna ịikpo ọmiin mọ egey eḍighinom ịyaar ẹtol sịen ade phọ. Esi ạna kụ ẹdi mị kakiran ịyo rꞌoomo areelhe phọ; esi ạna kụ ẹdi mị katuom ḍịḅaal reelhe phọ.

⁷ Nạ kạḅarion ni riḍien ạbuphe rọ́miin bọ eten phọ kụ aseere dọl ẹereegh bụphe odi bọ ufiri ruutu ikoli phọ.

⁸ “Mị bịn kụ Ọmoogh-we Ẹnaan phọ anyina. Eru ílho dị kedian eegu ạmi. Mị kámeera ịkaaghineen ạrumugh edian ḍịseph ạmi.

⁹ Ạraraar phọ mị ạghaaph bọ memiteghu. Nyịidipho mị kịḅeni inyina ịlo imoom ạraraar kụ egbi ọteeny amem dị kemite.”

Ạḍuor oboomiom Ẹnaan

¹⁰ Ịmoor ḍimoom ạḍuor eboomiom Ọmoogh-we phọ; ịmoor eboom nyọdi, oomo awe aḅirini phọ! Iboom nyọdi, nyina ạbuphe rẹzoghi bọ ọphiiny phọ, iboom nyọdi, oomo ịlo edi ọphiiny phọ kụ repooghu! Ịmoor sụor, rẹekela arikpisi rꞌoomo ạbulo orugh ẹpe.

¹¹ Arere ịisaar phọ rꞌạramha lọ ediighi, eboom Ẹnaan; awe aKedar oboom nyọdi! Bụphe orugh bọ ẹmha phọ ạSela ọlho ḍịolho iboh kꞌẹpe ạnyu aruugum mọ!

¹² Bụphe odi bọ rẹekela arikpisi phọ ọngo ḍịseph rꞌeegu Ọmoogh-we phọ!

¹³ Ọmoogh-we phọ rạki ghan kee ẹgham ịdipho ophelegbe; ọdi rạnya ghan rꞌẹephua ọghi ẹgham. Ọdi rạlo ghan ḍịolho ẹgham kạghiom ạnyu; Ọdi raḍeenaan ghan ịikpo phọ ọdi risigh ạbumulogh-ḍien.

Ẹnaan eguanaan ẹloghonaan

¹⁴ Ẹnaan rẹḅem ghan mọ, “Kꞌamem dị mebia mị uḅoorian ni; mị ụ́pagharanaan we phọ ạmi. Kụ nyịidipho amem oḍighi ịyaar mẹteeny; mị ạlho amitiom mụdi ạnir dị oghunughun rakun.

¹⁵ Mị kapiemi ni rạaḅaraph rꞌaruugum kụ ạkaragharami rọogho rꞌireeny. Mị kakiton riḍiiny ọphiiny atene de ịisaar kụ arabaraph ạmuum emoopha yogh.

¹⁶ “Mị kaḍiemiom ni we ikpom ariḍien phọ ạmi reten dị bịdi kőrelhe ghan. Mị kakiton ufiri ạbidi atene ḍịḅaal kụ aḍighi ịdi ẹmha lọ egbughagbugha kẹmaar eeleeny esi ạbidi Ịphen kụ ịpe mị aguanaan bọ, kụ mị kaḍighi ni amitiom dị kẹ́piom.

¹⁷ Oomo ạbuphe oḍuom bọ ologhi ịkaaghineen ạrumugh, bụphe oghol bọ ịkaaghineen ạraraar mọ ạrumugh ạbuno koofolomi ni kụ osiphe umugholoor.”

Émeera ọtuugha phọ Ịzirel

¹⁸ Ọmoogh-we phọ rạḅem ghan mọ, “Iler rụru ẹnaghan, nyina ạbuḅaaghaph ḅạghaph! Ipogh ekiririom, nyina awe ikpom ariḍien.

¹⁹ Oye odi ni dị ariḍien ọdi eḍighi ikpom epu otelhedom mọ ạmi ḍụghum, dị ạḅaaghaph apu otelhedom mọ mị arom bọ ḍụghum?

²⁰ We Ịzirel, nyina mẹmiin ni iboom, kụ ẹkigh eeghe esi anyina?” Nyina ẹmoogh ni reḅeri ọnaghanam kụ nyina ẹkaraghi ẹnaghan eeghe?

²¹ Ọmoogh-we phọ kụ Ẹnaan dị rẹnya ghan ọphel. Ịdipho kụ iḍighi kụ ọdi ạmanami bọ ịyaar iilogh rꞌịtughemi phọ ọdi. Kụ ọdi ạwa mọ awe ọdi ọlogh ịphen phọ eegu.

²² Kụ nyịidipho mowum ọpueghiom rạraar awe phọ ọdi; mọkasaghiom bịdi ruutu ikoli ologhi ude kụ ọbooghi bịdi ruutu ikoli. Usophoghom bịdi eten ozirion rạraar, dị oye ọtagharan ạbidi ụ́tol.

²³ Rꞌoniin ọnyo anyina kạnaghan ni ịphen phọ ḍụghum? Emiigh kꞌạnyiidipho kụ ẹghiom ghisigh, nyina kemighe ni loor ẹnaghan ḍụghum?

²⁴ Ạnhian kụ ạḅogh bọ Ịzirel ạngo bụo ibum mọ? Ọmoogh-we phọ, ọpo yira roḍighi ghan bọ ịkaraph phọ kophoghom! Yira úmeera ọrol ạdol phọ ạḍiphe ọdi ạwa bọ mọ yira ọrol phọ, ḅịle ụ́naghan ịtughemi phọ ọdi ụtughemi bọ iyira.

²⁵ Loor ịphen phọ, ọdi aḍighi ịdi yira ologhoma ịdi ophin ologhi ọdi ạman kụ ọmiinom ịminimiin igirigiri ẹgham. Mụdi ạnian, ọghagh ologhi phọ ọdi aamor oomo Ịzirel, kụ ọlo yoor úlegheri ịlo remite. Ịyaar lọ yoor ọtuugha esi ịphen phọ ị́tol.