Azaya 40 - Ạḍinya Iigbia

Ikpo ọnhu oḍuom ologhi

¹ Ẹnaan ayira ẹḅem mọ, “Ịidereghi we ạmi. Ịidereghi bịdi!

² Ịkparami iloghi awe aJeruselem. Ịḅeni ni ịdi bịdi mọmiinom ịdi mẹkasian kụ nyịidipho mọsar ịkaraph ạbidi ọbilenaan. Mị mạlhiom bịdi amuneni esi oomo ịkaraph phọ ạbidi.”

³ Oye atu rạlooghi mọ, “Ịkoghoronaan eten ẹpe ẹdala phọ dị Ọmoogh-we phọ katelhe! Iselemi eten ẹpe ade ịisaar phọ dị Ẹnaan ayira katelhe!

⁴ Iḍueghi eḅologh oomo ariḍiiny; ẹewalami tọrobo eegum. Ạraaḅaraph phọ keten de dị ẹyaghagha, kụ ade phọ eegbughuḍian bọ kotene esi dị eeleeny.

⁵ Kụ kogananami eegu Ọmoogh-we phọ kụ oomo awe ọmiin. Ọmoogh-we phọ rꞌaloor kụ maguanaan ịphen.”

⁶ Oye atu rạlooghi mọ, “Igbeelom dom!” Mị apuru mọ, “Eeghe adom kụ ẹdi mị kagbeelom bọ?” “Gbeelom mọ oomo awe ọkigh rọogho; Aghuḍum ạbidi óbia opu kụo ạsifalaway ologhi eḍum.

⁷ Ạroogho renyororo ghan ni kụ ạsifalaway rekelele ghan ni, mem dị Ọmoogh-we phọ aruom ookuugh kụ aghugh ạḅeeny bịdi. Awe rótue mun kọkparam opu rọogho.

⁸ Ịduon phọ ni, ạroogho ranyororo ghan kụ ạsifalaway rekelele ghan kụ ọlo ikpo ọnhu Ọmoogh-we phọ edi ghan ni kꞌagee-pọ.”

⁹ Jeruselem, nạ kịa ạsiiny ạnyu eephopha eegum kụ agbeelom ooḅi ọghaaph phọ! Zạyon, lọ rꞌeboom ẹḍogh ạghiom ạnyu kụ ạghaaph alheenye ooḅi ọghaaph phọ! Kạaph amitiom kụ kákiilaan. Ḅẹni rạmha phọ aJuda mọ Ẹnaan ạbidi retu ni!

¹⁰ Ẹnaan Oomo Ịikpo, Ọmoogh-we phọ, ratu ọdaam rꞌịikpo, ạpamam we phọ ọdi mạtagharan bọ.

¹¹ Ọdi kạmaar ạpam ḍita phọ ọdi ịdipho okoriom iyool-ịga; ọdi kaakpomoghi nmụny iyool-ịga phọ eniin esi kụ aḅeton bịdi rạghaagh ọdi; ọdi kamiighe loor atelhiom burunhiin phọ ạbidi.

Ẹnaan Ịzirel dị ooleeny úlho

¹² Oye odi ni dị kạtooghiom mụum otu-ḅualhe phọ ẹda ạḍighaagh ḍụghum? Ḅịle ạtooghiom okuaḍio phọ rạghaagh ḍụghum? Oye odi ni dị kạlogh oomo ịisaar ade phọ ologhi ẹgo ạmuum ḍụghum? Ḅịle ạḅam ạnyu ọtoom ạto ẹemor ạraaḅaraph rꞌaruugum mọ ḍụghum?

¹³ Oye odi ni dị kạḅeni Ọmoogh-we phọ ịlo ẹkpe oḍighi ḍụghum? Ạnhian kụ kạtughemi nyọdi ạḅile ạngo nyọdi oroma?

¹⁴ Ạnhian kụ ẹdi Ẹnaan rẹmooghom ghan ruupuruan ịlo olegheri ọḅile ọnaghanan rꞌọḅile ọtuugha ịlo koḍighi ghan rạraar?

¹⁵ Esi Ọmoogh-we phọ, areelhe aḅirini phọ kị́yaar, ị́bugh ipu mụum dị atephaan. Arukpu-ogbo arikpisi dị ẹkelogh eephoogh ịdipho ophugh.

¹⁶ Oomo ịnam ạruukpua phọ ạLebanon bịn ígeni ọphighironom ẹkia ịyaar ọngo Ẹnaan phọ ayira kụ ireeny ịsiphe phọ ị́manam ọkpooniom ạnian.

¹⁷ Areelhe aḅirini phọ kị́yaar esi ọdi.

¹⁸ Ạnhian kụ ẹdi kọtomaam bọ Ẹnaan? Ika kụ ẹdi nạ kạkaaph bọ mọ ọdi ạtol?

¹⁹ Ọdi ọ́ghigh ẹmugh dị oye kụ ạka, kụ awe ọlhem okpoghom gol kụ eeḍian ẹtolom mọ asilva.

²⁰ Oye dị kátue ạmoogh silva mꞌagol ạsighe oreeny dị kạ́ḅor. Ọdi ạwa oye ẹmaar ạmaka ọdi ạkaam ịyaar dị kémeel ude.

²¹ Nyina ílegheri ḍụghum? Inyina ị́ḅeni kꞌamem dị mebia? Nyina kẹ̋naghan ịpe aḅirini phọ amiigh bọ?

²² Ọpo ạlhem bọ kụ ạrolom bọ ạgada ọdaam mọ ọdi apeleghom de phọ atenom okuaḍio phọ; awe dị odi ude okomogh mụdi ịimara. Ọdi ạtara okuaḍio phọ ịdipho ukpe dị ọkpo osophom, ịdipho ogbogo dị kotugh.

²³ Ọdi rasooromi ghan we ịikpo rꞌịtooghi kụ kạar ịikpo phọ ạman.

²⁴ Bịdi ọkigh ịizupha dị pụruku ọzuph dị ạsini phọ ude kẹ̋kpaph. Mem dị Ọmoogh-we phọ aruom ookuugh, bịdi ẹkaraghar kụ ẹpepheghu ịdipho ikpo ịbiakpa.

²⁵ Ạnhian kụ ẹdi kọtomaam Ẹnaan Iigbia phọ? Ọnon oye odi ni dị ạghigh nyọdi ḍụghum?

²⁶ Ipogh ạnyu okuaḍio phọ! Ạnhian kụ ạlhem ghan bọ rạanaan phọ nyina rẹmiin bọ? Ọpo raḍiemiom ghan bịdi mụdi awe ẹgham, ọdi alegheri ni ịdi bịdi ọman kụ rạmagh ghan ḍien ạtorobo ọnyo ạbidi! Ịikpo ọdi ẹbugh iboom — dị rꞌoniin ọnyo ạbidi kꞌekulha óphe!

²⁷ Ịzirel, nạ rạnun eeghe mọ Ọmoogh-we phọ ólhegheri ịiḅaghami ạna ḍụghum? Ḅịle ọ́miin mọ rịgbiphoghom ni inyina?

²⁸ Nạ ólhegheri? Nạ kọ̋naghan? Ọmoogh-we phọ kụ Ẹnaan kꞌagee-pọ; ọdi kụ ạlhem oomo aḅirini phọ. Nyọdi rẹ́per ghan ḅịle rádugh ghan. Oye ólho dị alegheri ịitughian ọdi.

²⁹ Ọdi rạngo ghan ịnyaam bụphe modugh bọ ẹḅile ẹpher.

³⁰ Ghạlamo ugheel ạnmuny bịn aloor redugh ghan ni; ugheel ạnmuny kọkporokporo ni omeel.

³¹ Kụ bụphe oḍuom bọ ologhi Ọmoogh-we phọ ọloghonaan ạḍighaagh kọmiin ni ịdi bịdi kọlogha loor. Bịdi kọpeephom rꞌaraphaaph ịdipho aruga; bịdi kokiil li kụ kẹ́per; bịdi kotelhe kụ kọ́kaaru.