Azaya 4 - Ạḍinya Iigbia

¹ Mem dị amem mọ ạmuphe eru, oḍual ạnmariir kosiph ni ọpam oniin olephiri ọony kụ ọḅem mọ, “Yoor kole ni ọḅile oonmenemi siloor ayoor, kụ seseeny meera ni yoor ọḅem mọ nạ olhom ayoor, bịn íḍigh mun umugholoor esi ayoor ọrol ghan ạdol ạregelenya phọ.”

AJeruselem koḅulemi ni

² Amem retu ni dị Ọmoogh-we phọ kaḍighi ịdi tọrobo ẹezupha rꞌoreeny ịsiphe ade phọ kapoph ạbugh kụ ạnighe. Oomo awe phọ Ịzirel bụphe okpetenaan bọ kọmoogh ni ḍịḅeeraan rꞌoobaga esi ariiḍien phọ ịpe kobugha bọ sịphe ade phọ.

³ Tọrobo oye lọ osugheeny sịphe Jeruselem dị Ẹnaan mẹsaḅar ọngo aghuḍum, kọmagh mọ iigbia.

⁴ Esi ịikpo ọdi, Ọmoogh-we phọ kasoph ni ọoruen kụ awoph eelhe phọ aatol kụ aatol ạsighe apum ịḅaal phọ mozu bọ sịphe Jeruselem.

⁵ Reru reten, ạnyu Eegum ạZayon rꞌạnyu oomo ạbuphe ookpomoghan bọ sịphe, Ọmoogh-we phọ kaseere ni ọotu ootaany phọ ḅịle rꞌạmughi rꞌanem ạnian dị kesoor ghan ḍughul. Eegu Ẹnaan kesoor eeko oomo ẹmha phọ.

⁶ Eegu ọdi kẹngo uba ẹmha phọ esi ẹghologhol aḍio phọ kụ eḍighi esi ẹereegh rꞌoghoph mem ọlophia rꞌoghim.