Azaya 33 - Ạḍinya Iigbia

Ịiḅereghi ọlhemom ẹloghonaan ạḍighaagh

¹ Moruule bụmulogh-ḍien ayoor! Bịdi momiighi ọḅile ụyegheron iyoor, kụ ạri oye bịdi kőmi ghan mꞌaal ạbidi. Kụ ọlo amem imi rꞌọyegheron phọ ạbidi kekunughian ni, kụ imi rꞌọyegheron phọ kemeel li epum bịdi.

² Ọmoogh-we, ụnma iyoor ighirigiir. Yoor mọkpasi oḍuom ologhi ayoor esi ạna. Uuko iyoor aḍio etum ḍio kụ ụphel iyoor mem ịiḅaghami.

³ Mem dị nạ reenan iyoor, areelhe rọnaghan ghan oghur ẹgham bịn koghiil ọḍua.

⁴ Ruphua ạbidi rokpobiom ghan bịn kowum ọsighe.

⁵ Pọ eeghe ạḍibugh Ọmoogh-we phọ! Ọdi rạtooghi ghan kạngo oomo ạraraar. Ọdi kamuzeḍi Jeruselem dọl aghuḍuul rꞌooḅi ọoruen,

⁶ kụ ạmeremi eelhe phọ zim. Oomo amem ọdi raako ni we phọ ọdi kạngo bịdi olegheri-ịyaar rꞌọnaghanan ạḍughum. Ẹkpana ịyaar ạbidi, pọ oghueni ghan Ọmoogh-we phọ.

⁷ Awe ạkpo ologhi rọwa ni ẹloghonaan ạḍighaagh. Abutelhedom areelhe phọ ọnya bọ ọsighe ẹepho oru phọ romoghi ni iboom.

⁸ Aroḅodo phọ menyonono dị awe róten mun loor aruugu. Moogbonyon iilogh ọḅile ọka mụḅoph phọ. Rꞌeniin úkueni mun.

⁹ Okinom de phọ kụ ọbile. Ạruukpa phọ ạLebanon megheel ọnam, eḍiiny ẹnuum mọ aSaron mẹghigh ịdipho ẹdala ịisaar, kụ sịphe Bạsan rꞌạnyu Eegum ạKarmel ạrinya ireeny phọ rẹkar.

Ọmoogh-we phọ ạpur rụru ạbumulogh-ḍien ọdi

¹⁰ Ọmoogh-we phọ ạḅeni reelhe phọ mọ, “Nyịidipho mị kakpom. Mị kaḍeenaan ọdo ịikpo dị mị ạmoogh.

¹¹ Igbiighi phọ anyina ị́man mạar, kụ tọrobo ịyaar dị nyina eḍighi oopho ni bịn. Uwaloor ạmi ạkigh ịdipho ạnian dị kiphiemi inyina.

¹² Nyina keetughuḍian ịdipho asighiigh dị ọlogh nịan ịlo oḍighi ẹna, ịdipho iitoor dị oguom nịan eten ọoru.

¹³ Tọrobo ọlo atuman rꞌọlo ạkel, ịmaar ẹnaghan ịpe mị maḍighi bọ kụ eloghoma ịikpo phọ ạmi.”

¹⁴ Abuḍighinom ịkaraph awe phọ ạZayon ropiigha ni rꞌaḍiigu. Bịdi ọḅem mọ, “Ọoruen Ẹnaan ạkigh nịan dị reemor ghan kꞌagee-pọ. Rꞌoniin katue ni akpetenaan nịan dị ẹrol ịdipho ḍụghum?”

¹⁵ Rꞌoniin ọnyo anyina kakpetenaan ni eḍighi mạar dị ọghaaph phọ rꞌeḍighinom ịyaar anyina eru ni ịne. Kẹ́sighe ịikpo anyina eegbegheḍiom rukulom mọ ḅịle kéle ghan oti-ọman. Kẹ́ḅophan rꞌạbuphe rogbiighi bọ ịlo ọko enu mꞌoḍighi ịnon ọdo ịkaraph.

¹⁶ Pụruku nyina kẹtol ẹereegh; nyina kẹmoogh oghoph mụdi nyina ịrol ologhi esi ẹkpar. Nyina kẹmoogh ni eḍien olhe rꞌạmuum ọphughol.

Ịpe edi bọ ghisigh kẹnighe ni

¹⁷ Amem kẹḅile ni etu dị nyina kẹmiin ọdaam dị ạsighe igbogh phọ ọdi rạtooghiom rạraar kạngo rere dị ẹrara ẹghi tọrobo ạga.

¹⁸ Oghiilaan dị aruuruen kụ ọḅile rọbonyi ghan bọ iisogh koḅiligha de phọ anyina maten.

¹⁹ Nyina kẹ́miin mun rꞌoniin ooruen dị kaphoophe loor ọdi kụ ạḅa ọnhu dị nyina ị́naghan.

²⁰ Ipogh Zạyon ẹmha phọ yira role ghan bọ rạyaal iigbia phọ ayira. Ipogh Jeruselem. Pọ eeghe esi ẹereegh orugh! Ọdi kạtol ịdipho ogbogo erelhe dị ogim rọ́sighe ghan, sịkan rọ́kporion ghan kụ iḍigh phọ rétunyian ghan.

²¹ Ọmoogh-we phọ kuḍeenaan ni iyira eegu ọdi. Yira kotugh ọgbal ịiregha ạriphiiny rꞌasikol, kụ ạrunwunyaru ọwa asighiton kẹ́zooghi sịphe.

^22-23 Oomo iḍigh phọ ẹphamagh bọ sịvala ạnyu ạrunwunyaru phọ oopho ni bịn; ạsivala phọ kẹ́etaranu. Yira kobum ẹgham oomo ẹelha ạbuo ẹpomoghian phọ, kụ kẹbugh ni iboom sịphe dị ghạlamo rꞌạrukugha kọmoogh ni bin. Ọmoogh-we phọ rꞌaloor kaḍighi ọdaam mọ ayira; ọdi kụ kụda iyira kụ uuko iyira.

²⁴ Rꞌoniin ólho dị arugh sịphe ade phọ ayira dị kạḅile ạnun ịlo emoon, kụ oomo ịkaraph kọsar ri ọbilenaan.