Azaya 32 - Ạḍinya Iigbia

Ọdaam Aruukuan

¹ Aḍio retu ni dị ọdaam kạtooghiom ruukuan rꞌabuḍiemiom dị kopoghom we akeel rꞌapum.

² Tọrobo ọnyo ạbidi kaḍighi ogbogo okaran ookuugh rꞌạaghian amem oghim. Bịdi kọkigh sikol dị ạmuum rakil de ịisaar, ịdipho oogho aḍigbogh aḍighiigh ade ọkpagha.

³ Bịdi kọmiin ni ọḅile ọnaghan rạraar phọ rẹeḅaghami bọ we phọ.

⁴ Bịdi kóokpeka mun kụ bịdi kọtolan ọnaghan ạḍughum rꞌọghaaph ịlo eḍighi ephigh.

⁵ Oye kạ́atughian mọ uwelologhi aḍigh ni eghuan, kạ́ḅem kẹn mọ ọbelebele oye rạgba ghan ni igey.

⁶ Uwelologhi rạkaaph ghan ọghaaph elologhi rꞌọotughian ịkaraph ạraraar oḍighi. Ọghaaph phọ rꞌeḍighinom ịyaar ọdi eḍighi itonyonaan esi Ọmoogh-we phọ, ḅịle rꞌamem rạ́ngo ghan eḍien rꞌạmuum bụphe rọwa bọ.

⁷ Oye dị ologhi úlho pọ ọkaraph oye kụ raḍighi ghan ịkaraph ạraraar; ọdi ạpam ọkpe ịlo ọogughuḍiom arukulom mọ kụ ạwa okikima ạbidi ọmoogh ariiliom ạbidi.

⁸ Kụ oye eghuan raḍighi ghan ịdi eru igey kụ kạphamanam ịpe eḍighi bọ elhiom mọ.

Ọoruen rꞌoḅulemi

⁹ Nyina ạnmariir edi bọ dọl ịyaar rẹ́eḅaghami phọ, iler rụru ẹnaghan ịphen mị rạḅem bọ.

¹⁰ Ịgbaanyan ni inyina nyịidipho, kụ nana nyina kekururu ni ịdi eḍighi bọ iimuma avain ọku ookpomoghi kẹ́tol.

¹¹ Nyina edi ghan ni ḍiidugha ạdol dị ịiḅaghami ílho, kụ nyịidipho iikpeka rꞌoghiilaan! Ịkaranaan rukpe anyina kụ ẹkagha ịpherepe igbaany arukpe ọto ekitonom esin anyina.

¹² Ipuma rạmamaam anyina esi oboom ọto, ịdi eḍighi bọ iizo ẹnuum mọ, rꞌiizo ireeny amiim mọ mophiemi,

¹³ kụ iitoor rꞌaruuḅurom resi sịphe ade awe phọ ạmi. Imoghinaan oomo aruutu phọ awe ọḅaal ghan bọ ologhi rꞌịlo ẹmha phọ ẹpe eghur ghan bọ.

¹⁴ Ghạlamo ogiga ọdaam mọ rꞌẹkpana ẹmha phọ kọḅile ni ọḍuaghu ọmadan. Asimarugh awe phọ rꞌaruutu ẹkpar ạbidi keḍighi ịzeghe kꞌagee-pọ. Ịnam adool eḍum dị oye ụ́moogh kekiraan ghan sịphe, kụ iyool-ịga ẹḅal ghan ịḅal sịphe.

¹⁵ Kụ amem kẹḅile ni ẹtol dị Ẹnaan kiruom iyoor uwaloor ọdi. Ade ọkpagha phọ ị́moogh bọ mạar oḍighinom kẹḅile ni ẹmoogh ẹnuum, dị iizo phọ kesoor riiḍien.

¹⁶ Tọrobo ekpisi sịphe ade phọ aruukuan rꞌiiḅi ịiruen kụ kẹtol.

¹⁷ Loor esi dị tọrobo oye kaḍighi bọ ni ịpe ẹnighe bọ, ẹepho rꞌạdol-ẹereegh kẹtol kꞌagee-pọ.

¹⁸ Awe phọ Ẹnaan kọḍua ni dọl ịiḅaghami, kụ asimarugh ạbidi ẹmoogh ẹereegh.

¹⁹ (Kụ iiḅoghoḍi ibikpo kẹkar sịphe ạruukpua phọ, kụ otukelemi egbogh ẹmha phọ.)

²⁰ Pọ eeghe ọdo ọḅaal ologhi dị tọrobo oye kạmoogh rꞌamuboom ạmuum mụo ịizupha phọ ḅịle rꞌạtuyoghoyogho ạroogho tọrobo ekpisi ọlo ịnam adool rꞌạsinam.